گوہر نزیر شاہ سرینگر

	جنسی سکینڈل کی مبینہ ملزمہ کا گھر جہاں وہ یہ دھندا کرتی تھی

عدالت نے دوروز کے اندر دونوں کے بیانات کو انگریزی اور اردو زبان میں قلمبند کرنے کا حکم دیا ہے۔

سی بی آئی نے جنسی سکینڈل کی تفتیشی رپورٹ ہائی کورٹ میں پیش کی ہے اور ڈویژن بینچ نے اس کا جائزہ لیا ہے۔ اس موقع پر جسٹس حکیم امتیاز حسین اور جسٹس بشیر احمد کرمانی نے سی بی آئی کی طرف سے دونوں خواتین کا بیان ہندی میں تحریر کرنے کا نوٹس لیا۔ اسی کیس میں دیگر افراد کے بیانات کا انگریزی زبان میں ترجمہ پیش کیا گیا تھا۔

مقدمے کی سماعت کے دوران ہائی کورٹ بار ایسوسی ایشن کے صدر میاں عبدالقیوم نے ڈویژن بینچ کو بتایا کہ ’ہندی زبان میں ملزمان کے بیانات درج کرنے سے کچھ حاصل نہیں ہوگا۔‘

	سکینڈل سامنے آنے کے بعد اس کے خلاف احتجاجی مظاہرے جاری ہیں

پہلے سیشن کی کارروائی کے بعد عدالتی کارروائی دس منٹ تک کے لیئے ملتوی کر دی گئی، اس دوران سی بی آئی کے افسر اور ایڈوکیٹ شبیر احمد نائیک جج کے چیمبر میں بھی گئے تھے۔

ڈویژن بنچ کی کارروائی دوبارہ شروع ہونے پر بنچ نے کہا کہ سبینہ کو عدالتی تحویل میں رکھنے سے پہلے ہی سی بی آئی کو ان کا بیان قلمبند کرنا چاہیئے تھا۔ عدالت نے خدشہ ظاہر کیا کہ چونکہ سبینہ کوسوچنے کے لیئے کافی موقع ملا ہے اس لیے ممکن ہے کہ وہ اپنے بیان سے منحرف ہوجائیں۔

اب اگلی سماعت انیس مئی جمعہ کو ہوگی۔ سی بی آئی کے وکیل نے عدالت کو بتایا ہے کہ وہ آئندہ ہندی کے بجائے اردو اور انگریزی زبان میں بیانات پیش کریں گے۔