شکیل اختر بی بی سی اردو ڈاٹ کام دلی

	امریکہ نے گجرات کے وزیراعلیٰ نریندر مودی کو بھی ویزہ منع کردیا تھا

پروفیسر مہتہ اورگینِک کیمسٹری کے سائنس دان ہیں اور وزیراعظم کی سائنس اور ٹیکنالوجی سے متعلق مشاورتی کمیٹی میں شامل ہیں۔ بعض اطلاعات میں بتایا گیا ہے کہ انہیں امریکہ نے ویزا دینے سے انکار کردیا ہے کیونکہ وہ ’کیمیاوی اور حتیاتی ہتھیاروں‘ کے شعبے میں کام کررہے ہیں۔

لیکن امریکی سفارتخانے کی طرف سے ایک بیان جاری کیا گيا ہے کہ پروفیسر مہتہ کے ویزا کے بارے میں ابھی تک کوئی فیصلہ نہیں گیا گيا ہے۔’ہم نے بعض اضافی معلومات طلب کی ہیں جو ویزا کی درخواست کے لیے ضروری ہیں۔‘

پرفیسر مہتہ انڈین انسٹی ٹیوٹ آف سائنس بنگلور کے سابق ڈائریکٹر ہیں اور اس سے قبل کم از کم بیس بار امریکہ جا چکے ہیں۔ آخری بار وہ تقریبا سات مہینے قبل واشنگٹن میں نیشنل اکیڈمی آف سائنسیز میں لیکچر دینے کے لیے گیے تھے۔ انہیں فلوریڈا یونیورسٹی میں وزٹنگ پروفیسر کی حیثیت سے امریکہ آنے کی دعوت دی گئی تھی۔

بعض اخبارات کے مطابق مہتہ نے ویزا نہ جاری کیے جانے پر شدید تکلیف کا اظہار کیا ہے۔ ’یہ میری زندگی کا سب سے ذلت آمیز تجربہ ہے۔ یہ امریکہ کے موجودہ غرور اور لاعلمی کا عکاس ہے۔‘

اطلاع کے مطابق مہتہ نے نو فروری کو چینئی میں ویزا کے سلسلے میں انٹرویو کے لیے قونصل خانے گئے اور ویزا قونصلر نے ان سے یہ کہکر ’بار بار توہین کی‘ کہ وہ اپنے بارے میں کچھ چھپا رہے ہیں۔ قونصلر جاننا چاہتے تھے کہ کیا انکا کوئی تعلق کیمیاوی اور حتیاتی ہتھیاروں سے ہے۔

سفارتخانے کے بیانات پر افسوس کا اظہار کیا گیا کہ مہتہ کو انٹرویو کے عمل سے دکھ پہنچا ہے۔ ’ہم ہر شخص سے وقار اور احترام سے پیش آنے کے پابند ہیں لیکن ساتھ ہی ان معلومات کو بھی حاصل کرنا ضروری ہے جو ویزا کی منظوری کے لیے مطلوب ہیں۔‘

امریکی سفارتخانے کے ترجمان ڈیویڈ کینیڈی کا کہنا ہے کہ پروفیسر مہتہ سے اضافی معلومات حاصل کی گئی تھیں اور انکے نہ ملنے کے سبب ہی ویزا کی درخواست پر غور کرنے میں تاخیر ہوئی ہے۔

چند مہینے قبل امریکہ نے گجرات کے وزیر اعلی نریندر مودی کو ویزا نہیں دیا تھا۔ ہندوستان کی حکومت نے اس پر شدید احتجاج کیا تھا لیکن امریکہ نے یہ احتجاج یہ کہہ کر مسترد کردیا تھاکہ ویزا نہ جاری کرنے کا فیصلہ امریکہ کے بعض اہم اصولوں کی بنیاد پر کیا جاتا ہے۔