نادیہ پرویز بی بی سی اردو ڈاٹ کام ، دلی

	حکومت کو کئی مسائل پر مخالفت کا سامنا ہے

پارلیمنٹ میں بجٹ اجلاس کے آغاز پر دونوں ایوانوں سے روایتی خطاب میں صدر نے کہا کہ ’اس پروگرام کا مقصد تمام اقلیتوں کی اقتصادی طور پر خود مختار بنانا ہے‘۔

انہوں نے یہ بھی کہا کہ حکومت نے ملک میں فرقہ وارانہ ٹکراؤ روکنے کی پر زور کوشش کی ہے اور فسادات سے متاثرہ افراد کو دوبارہ بسانے کے لیے کئی اقدامات کیے گئے ہیں۔

مسلمانوں کے بارے میں سچر کمیٹی کے جائزے کا ذکر کرتے ہوئے بھارتی صدر نے کہا کہ ’یہ خصوصی مطالعہ اقلیتوں کے حالات مفصل طور پر جاننے کی ایک کوشش ہے اور یہ اقلتیوں کی سماجی اور اقتصادی ترقی کا پروگرام تیار کرنے میں مدد گار ثابت ہوگا‘۔

موجودہ بجٹ سیشن میں حکومت کے سامنے کئی چیلنج ہیں۔ ایک طرف ایران کے معاملے پر حکومت کی حامی بائيں بازوں کی جماعتیں مکمل بحث کرانے کا مطالبہ کر رہی ہيں وہیں ہوائی اڈوں کی نجکاری کی پالیسی کے خلاف بھی ہيں۔

ملائم سنگھ یادو کی سماج وادی پارٹی پہلے ہی کہہ چکی ہے کہ وہ ایران کی ووٹنگ کے معاملے میں حکومت کے خلاف عدم اتحاد کی تحریک پیش کرے گی۔

دوسری جانب بھارتیہ جنتا پارٹی تیل کے بدلے عراق میں رشوت دہی اور بوفورس توپوں میں کمیشن کے سلسلے میں ایک اطالوی کاروباری فرد کے کردار پر بحث کرنا چاہتی ہے۔

حکومت کے لیے ایک ہی اچھی خبر ہے کہ بی جے پی نے ایران اور امریکہ سے جوہری معاہدے کے سلسلے میں حکومت کی مخالفت نہ کرنے کا فیصلہ کیا ہے۔مجموعی طور پر بجٹ اجلاس کافی ہنگامہ خیز رہے گا۔