ریحانہ بستی والا بی بی سی اردو ڈاٹ کام، ممبئی

	ممبئی میں واقع حج ہاؤس

ممبئی کا حج ہاؤس وہ عمارت ہے جہاں سے حاجیوں کو حج کے لیے روانہ کیا جاتا ہے اور حج کے دوران یہاں پورے بھارت سے حاجی آتے ہیں۔ اس کی تیسری منزل پر مسجد ہے جہاں امام غلام نماز پڑھاتے تھے۔

اے ٹی ایس کے جوائنٹ پولس کمشنر کے پی رگھوونشی نے بی بی سی اردو ڈاٹ کام سے بات کرتے ہوئے پیش امام کی گرفتاری کی تصدیق کی۔ انہوں نے بتایا کہ مولانا کے بارے میں انہیں گرفتار ملزمین سے تفصیلات کا پتہ چلا ہے۔

اے ٹی ایس نے ممبئی کے ناگپاڑہ علاقہ سے جمعہ چھ جنوری کو لشکر طیبہ کے مبینہ تین ممبران کو بم بنانے کے سامان کے ساتھ گرفتار کیا تھا۔ پولیس کمشنر اے این رائے نے ایک پریس کانفرنس کے دوران کہا تھا کہ رمضان عبدالقاضی، خورشید احمد عرف لالہ اور ارشد غلام حسین بدرو شہر میں دہشت گردی کے مقصد سے آئے تھے۔

رگھونشی کے مطابق رمضان نے دوران تفتیش بتایا تھا کہ انہیں شہر کے ایک باعزت شخص سے ملاقات کرنے اور ان سے ہدایت لینے کے لیے کہا گیا تھا اور وہ باعزت شخص یہی مولانا ہیں۔

چوالیس سالہ مولانا بنگال کے رہنے والے ہیں اور انیس سو چھیانوے سے ممبئی کے حج ہاؤس میں امامت کر رہے تھے۔

اے ٹی ایس اسکواڈ کے سینئر پولیس انسپکٹر سنیل دیشمکھ نے بی بی سی کو بتایا کہ مولانا کو ابھی عدالت میں پیش کیا جارہا ہے اور عدالت سے پولیس حراست ملنے کے بعد بہت سی باتوں کا خلاصہ ہوگا۔

دیشمکھ نے بتایا کہ انہیں شبہ ہے کہ مولانا کو رقم ’حوالہ‘ کے ذریعہ ملتی تھی اور اس کی جڑیں لشکر کے کمانڈر ان چیف صلاح الدین سے ملی ہوئی ہیں۔ مولانا ممبئی میں ڈونگری کے چکالا علاقہ کی لوکھنڈ والا بلڈنگ میں اپنے خاندان کے ساتھ رہتے ہیں۔

جوائنٹ پولس کمشنر (نظم و نسق) اروپ پٹنائیک نے بی بی سی کو بتایا کہ حالانکہ ایک امام کی گرفتاری نہایت افسوسناک امر ہے لیکن اس سے یہ نہیں سمجھ لینا چاہیئے کہ ہر امام کو اب پولیس غلط نظر یا شک و شبہ کے ساتھ دیکھے گی، بالکل اسی طرح جیسے ایک پولیس سب انسپکٹر کی گرفتاری یا اس کا برا فعل پورے پولیس فورس پر دھبہ نہیں ہو سکتا۔

بھارتی حکومت لشکر طیبہ کے اراکین کو دہشت گردی پھیلانے کے لیے ذمہ دار ٹھہراتی رہی ہے اور ممبئی کےاعلی پولیس افسران کے مطابق شمالی بھارت کے بعد اب جنوبی بھارت میں لشکر نے اپنے پیر پھیلانے شروع کر دیے ہیں اور اس میں بنگلور اور ممبئی ان کے نشانے پر ہیں۔