نادیہ پرویز بی بی سی اردو ڈاٹ کام، دلّی

	امریکہ اس گیس پائپ لائن منصوبے کے حق میں نہیں

بھارتی دارالحکومت دلی ميں دونوں ملکوں کے توانائی ادارے کے سینئر اہلکاروں کی بات چیت کے دوسرے اور آخری روز ایران میں تیل کے نائب وزير محمد ہادی نژاد حسنین نے نامہ نگاروں سے بات چیت کرتے ہوئے کہا کہ’ہندوستان اور پاکستان کسی بھی طرح کے دباؤ میں نہیں ہیں اور یہ پائپ لائن پورے خطے میں امن کا پیغام لے کر آئے گي‘۔

ہادی حسنین نے اس بات سے انکار کیا کہ امریکہ کے دباؤ کی وجہ سے یہ منصوبہ درمیان میں ہی ختم کر دیا جائے گا۔ انہوں نے کہا امریکہ نے ایران پر جو پابندیاں عائد کی ہیں وہ اصل میں کبھی بھی عمل میں نہیں آئی ہیں اور فی الوقت کئی امریکی کمپنیاں ایران میں تجارت کر رہی ہیں ۔

ایران اور بھارت نے بات چیت کے بعد ایک مشترکہ بیان بھی جاری کیا ہے۔ اس بات چیت میں دونوں ممالک نے گیس کی قیمت سے لے کر اگلے برس مارچ میں تہران میں تینوں ملکوں کے تیل کے وزراء کا ایک اجلاس بلانے جیسے تمام پہلوؤں پر غور کیا گیاہے۔

بھارتی وزارتِ تیل کے سیکرٹری ایس سی تری پاٹھی نے اس موقع پر کہا کہ’دو روزہ بات چیت کافی کامیاب رہی ہے اور بھارت نےگیس کی قیمت کے بارے چند وضاحتیں ایرانی وفد کے سامنے پیش کر دی ہیں‘۔

اگلے برس مارچ میں ہونے والی بات چیت کے بارے میں مسٹر حسنین نے کہا کہ ’مارچ میں معاہدے کا ایک مسّودہ تیار کر لیا جائے گا جس ميں اس منصوبے کے خاکے سے لےکر تینوں حکومتوں کی الگ الگ ذمہ داریاں اور قیمت جیسے تمام پہلو شامل ہوں گے‘۔