اوما بھارتی نے پارٹی کے اہم رہنماؤں کے خلاف بات کی ہے جس کے بعد ان پر پارٹی کے نظم و ضبط کو توڑنے کے الزامات لگائے گئے ہیں۔ سابق وزیرِ اعلیٰ اوما بھارتی نے سابق وزیرِ اعظم اور بی جے پی کے سابق سربراہ اٹل بہاری واجپئی کے خلاف بھی بیان بازی کی تھی۔

بی جے پی کا پارلیمانی بورڈ اس بات کا فیصلہ کرےگا کہ کیا اوما بھارتی کے خلاف ایکشن لیا جائے یا نہیں اور اگر ان کے خلاف کوئی کارروائی کی گئی تو اس کا ردِ عمل کیا ہو سکتا ہے۔

بورڈ کے سامنے یہ بات رکھی جائے گی کہ اوما بھارتی نے پارٹی کے اہم لیڈروں سے اختلاف کرکے پارٹی کے نظم اور ضابطوں کو توڑا ہے لہذا ان کے خلاف انضباطی کارروائی کی جانی چاہیے۔

اوما بھارتی نے بی جے پی کے رہنماؤں سے اس بات پر اختلاف کیا تھا کہ ریاست مدھیہ پردیش کے نئے وزیرِاعلیٰ کو کس طرح منتخب کیا جانا چاہیے۔

دو ہزار چار میں بھیبھارتیہ جنتا پارٹی کی جنرل سیکریٹری اوما بھارتی کو معطل کر دیا گیا تھا۔ یہ اقدام پارٹی کے عہدیداورں کی ایک میٹنگ سے اوما بھارتی کے واک آؤٹ کے بعد اٹھایا گیا تھا۔

اوما بھارتی نے اجلاس کے دوران پارٹی کے صدر ایل کے اڈوانی کے خطاب کے دوران یہ الزام لگایا تھا کہ بعض رہنما آف دی ریکارڈ بیانات کے ذریعے انہیں تنقید کا نشانہ بنا رہے ہیں۔

اوما بھارتی نے مسٹر اڈوانی سے مطالبہ کیا تھا کہ وہ ان رہنماوں کے خلاف کاروائی کریں لیکن جب مسٹر اڈوانی نے کہا کہ یہ معاملہ ختم ہوچکا ہے تو وہ میٹنگ سے اٹھ کر باہر چلی گئی تھیں۔

اس واقعے کے بعد اوما بھارتی کو پارٹی کی بنیادی رکنیت سے معطل کر دیا گیا تھا۔