صلاح الدین بی بی سی اردو ڈاٹ کام، دلی

	بھارت کی ریاست تامل ناڈو میں بارشوں سے زندگی مفلوج ہو گئی ہے

سیلاب کے سبب جمعہ کے روز دو بسیں پانی میں بہہ گئی تھیں۔ اب تک ان بسوں سے تقریبا اسّی لاشیں نکالی جا چکی ہیں۔ اس میں تئیس خواتین اور چھ بچے شامل ہیں۔ حکام کا کہنا ہے ابھی بہت سے لوگ پھنسے ہیں اور اب کسی کے بچنے کی امید نہیں ہے اس لیے مزید ہلاکتوں کا اندیشہ ہے۔

خلیج بنگال میں ہوا میں دباؤ میں کمی کے سبب تامل ناڈو میں کئی روز سے زبردست بارش ہورہی ہے۔ پوری ریاست میں سیلاب کی صورت حال ہے۔ سبھی دریاؤں اور جھیلوں میں طغیانی ہے ۔ روڈ پر پانی بھرنے سے ریاست میں طویل مسافت کی تقریبا پانچ سوبسیں روک دی گئی ہیں۔

متعدد جگہوں پر ریل کی پٹری اکھڑ گئی ہے اور ریاست میں چلنے والی تقریبا تمام ریل گاڑیاں فی الوقت بند کردی گئی ہیں۔ حکام کا کہنا ہے کہ ریل پٹری کی مرمّت میں تین روز لگ سکتے ہیں۔گزشتہ تین روز سے بیشتر علاقوں میں بجلی غائب ہے اور مواصلاتی نظام بھی متاثر ہوا ہے۔

ضلع کڈلور سب سے زیادہ متاثرہوا جہاں تقریبا دو سو گاؤں زیر آب آگئے ہیں۔ ریاست کا بڑا اور جنوبی علاقہ دارالحکومت چینئی سے منقطع ہوگیا ہے۔ حکام کا کہنا ہے کہ ریاست کے پانچ سو گاؤں پوری طرح سیلاب کی زد میں ہیں۔ لاکھوں لوگوں کو امدادی کیمپوں میں پہنچایا گیا ہے اور بہت سے لوگوں نے محفوظ مقامات پر پناہ لے رکھی ہے۔

انتظامیہ فوج کے ساتھ امدد ی کاموں میں مصروف ہے۔ ہیلی کاپٹر کے ذریعے خوراک کے پیکیٹ گرائے جارہے ہیں۔ ریاست کی وزیر اعلٰی جے للیتا نے بعض متاثرہ علاقوں کا دورہ کیا ہے اور متاثرین کو ہر ممکن مدد کی یقن دہانی کرائی ہے۔ جے للیتا نے مرکزی حکومت سے بھی امداد کی اپیل کی ہے۔

اس برس تامل ناڈو میں برسات کے موسم میں ریکارڈ توڑ بارش ہوئی تھی لیکن بے موسم بارش اس سے بھی زیادہ ہوئی ہے جس کے سبب تقریبا پوری فصل تباہ ہوگئی ہے۔