شکیل اختر بی بی سی اردو ڈاٹ کام، دلی

کلکتہ سے بی بی سی کے نامہ نگار نے ریاستی حکومت کے حوالے سے خبر دی ہے کہ ریاستی انتظامیہ نے مرکز سے کہا ہے کہ ’تسلیمہ نسرین کی کلکتہ میں موجودگی سے مذہبی کشیدگی پیدا ہو سکتی ہے کیونکہ بیشتر مسلم شہری انہیں پسند نہیں کرتے۔‘

تسلیمہ نسرین ایک عرصے سے خود ساختہ جلاوطنی کی زندگی بسر کر رہی ہیں۔ وہ یورپ میں رہائش پذیر ہیں اور اکثر کلکتہ آتی ہیں۔

مغربی بنگال کی ریاستی حکومت نے یہ بھی کہا ہے کہ وہ ان کے نئے ناول ’دوی کھنڈیتو (دو حصوں میں منقسم)‘ پر سے پابندی نہیں ہٹائے گی۔ کمیونسٹ حکومت کا کہنا ہے کہ ’یہ پابندی مذہبی کشیدگی میں اضافے کے امکان کو روکنے کے لئے ضروری ہے۔ "

ڈاکٹر نسرین نے مغربی بنگال کی حکومت کے فیصلے پر حیرت ظاہر کی ہے ۔ حقوق انسانی کی تنظیموں نے بھی ریاستی حکومتوں کے فیصلے پر نکتہ چینی کی ہے۔ انکا کہنا ہے کہ کتابوں پر پابندی سے اظہار خیال کی آزادی کو زک پہنچی ہے۔

مغربی بنگال کی تقریبا 25 فی صد آبادی مسلمانوں پر مشتمل ہے جو بیشتر دیہی علاقوں میں آباد ہیں ۔ مسلمانوں کی اکثریت ریاست میں بايئں بازو کی جماعتوں کی حمایت کرتی رہی ہے۔

مرکزی حکومت نے ڈاکٹر تسلیمہ نسرین کی شہریت کی درخواست موصول ہونے کے بعد کہا تھا کہ وہ اس پر غور کر رہی ہے۔ لیکن ریاستی حکومت کی مخالفت کے بعد مرکز کے لئے محترمہ نسرین کو رہائشی ویزا یا شہریت دینا مشکل ہوحائے گا۔