شکیل اختر بی بی سی اردو ڈاٹ کام، دلی

پریڈ کے راستے کو کل رات سے ہی سیل کر دیا گیا تھا

دارالحکومت نئی دہلی میں پریڈ کے تقریبا 8 کلومیٹر لمبے راستے کو کل رات سے ہی پوری طرح سیل کر دیا گیا تھا۔ پولیس کے علاوہ پورے علاقے میں نیم فوجی دستے تعینات تھے۔ سب سے بڑی تقریب دہلی میں منعقد ہوئی جہاں تاریخی راج پتھ پر ہونے والی پریڈ سے صدر جمہوریہ اے پی جے عبدالکلام نے سلامی لی۔

پریڈ کے دوران بچوں نے مختلف ریاستوں کے رقص و موسیقی اور ثقافتی زندگی کی جھلکیاں پیش کیں۔

اس موقع پر پریڈ میں اگنی ، پرتھوی اور برہموس میزا ئلوں ، ٹی 90 ٹینکوں، ایڈوانس لائٹ ہیلی کاپٹر ، دھرو، بغیر پائلٹ کے اڑنے والے جاسوس طیارے سرچرایم اور 30 ایم کے جنگی طیاروں کی نمائش کی گئی اور ان کی جنگي صلاحیتوں کا مظاہرہ کیا گیا ۔

یوم جمہوریہ کی پریڈ کے وقت میں کچھ کمی کی گئی تھی ۔ حالیہ سونامی لہروں کی تباہی اور مہاراشٹر کے ایک مندر میں مچنے والی بھگدڑ میں ہونے والی ہلاکتوں کا اثر بھی آج کی تقریبات میں محسوس کیا گیا۔ کئی مقامات پر ہلاکتوں کی یاد میں ایک منٹ کی خاموشی بھی اختیار کی گئی۔