بھارتی حکومت 2005 کے آخر تک تیس لاکھ براڈ بینڈ اور ساٹھ لاکھ ڈائل اپ کنکشن دینا چاہتی ہے

وزیرِمواصلات دیانیدھی مارن نے ایک بیان میں کہا ہے کہ بھارت سنچار نگم اور مہانگر ٹیلیفون نگم ابتدائی طور پر چھ شہروں میں سروس کا آغاز کرے گی۔

اس سروس کے تحت براڈ بینڈ کی سہولت پانچ سو روپیہ میں دستیاب ہو گی جبکہ آج کل یہ سہولت تین ہزار روپے میں ملتی ہے۔

اس وقت بھارت میں انٹر نیٹ ڈائل اپ کنکشن ساڑھے سات سو روپے میں ملتا ہے۔

بھارت سنچار نگم نامی کمپنی کلکتہ،مدراس، بنگلور اور حیدرآباد میں جبکہ مہانگر ٹیلیفون نگم ممبئی اور نئی دہلی میں یہ سہولت مہیا کرے گی۔

ان دونوں کمپنیوں کو مارکیٹ میں بھارتی ٹیلی ونچرز، ٹاٹا گروپ اور ریلائینس انفو کام جیسی نجی کمپنیوں سے مقابلہ درپیش ہے۔

بھارت کی ایک ارب سے زیادہ آبادی میں سے محض 0.4 فیصد کو انٹرنیٹ کی سہولت مہیا ہے جبکہ براڈ بینڈ صرف 0.02 فیصد آبادی استعمال کرتی ہے۔

بھارتی حکومت 2005 کے آخر تک تیس لاکھ براڈ بینڈ اور ساٹھ لاکھ ڈائل اپ کنکشن دینا چاہتی ہے جبکہ 2010 کے اختتام تک بھارتی حکومت کا ہدف انٹرنیٹ صارفین کی تعداد چار کروڑ جبکہ براڈ بینڈ صارفین کی تعداد دو کروڑ تک پہنچانا ہے۔