یہ صفحہ دوست کو ای میل کیجیئے		پرِنٹ کریں

انٹرنیٹ اب گاؤں گاؤں پہنچے گا

ہندوستان میں حکام کا کہنا ہے کہ اگلے چند برسوں میں انٹر نیٹ کے فروغ کے لئے ملک میں ڈھائی ارب ڈالر خرچ کئے جائیں گے۔ حکام کا کہنا ہے کہ وہ ایک ایسا سستا کمپیو ٹر بنانے کی کوشش کر رہے ہیں جو منہ سے ادا کئے گئے زبانی احکامات سمجھ سکے گا یعنی ایسے لوگ بھی کمپیوٹر استعمال کر سکیں گے جو پڑھنے لکھنے کی اہلیت نہیں رکھتے-

ہندوستان میں صنعتی پالیسی کے سیکرٹری راجیو رتنا شاہ کے مطابق یہ کمپیوٹر اصل میں سمپیوٹر نامی اس چھوٹی مشین کیطرح ہوگا جو دو برس پہلے ہندوستانی انجیئرز نے بنایا تھا جس میں ای میل کی سہولت زبانی ادا کئے جانے والے احکامات کے ذریعے موجود تھی۔

مسٹر راجیو کا ماننا ہے کہ ہندوستان میں موجود ناخواندگی انٹرنیٹ کی عام لوگوں تک رسائی کی راہ میں رکاوٹ نہیں بننی چاہئے اور یہ کہ انٹرنیٹ جیسی اہم ٹیکنالوجی سماجی تقسیم کا باعث نہیں بننی چاہئے۔

ہندوستان میں تجرباتی طور پر جاری ایک منصوبے میں ڈاکئیے چھوٹے کمپیوٹرز مے ذریعے گاؤوں میں عام لوگوں کو ای میل پیغامات پہنچاتے ہیں اور یہ لوگ اپنے جوابات اسی طرح بھیج سکتے ہیں ۔