 |  دونوں ملکوں کے درمیان ایک حالیہ میٹنگ |
انڈیا اور پاکستان کے حکام پیر کے روز نئی دہلی میں منشیات کی سمگلنگ کے مسئلے پر دو روزہ مذاکرات شروع کررہے ہیں۔ اس سلسلے میں ایک پانچ رکنی وفد نئی دہلی پہنچ چکا ہے۔ انسداد منشیات فورس کے ڈائرکٹر جنرل میجر جنرل ندیم احمد پاکستانی وفد کی سربراہی کررہے ہیں۔ انڈیا کی جانب سے منشیات کنٹرول بیورو کے سربراہ سوراج پوری وفد کی سربراہی کریں گے۔ خبررساں ایجنسی پریس ٹرسٹ آف انڈیا کے مطابق دونوں ممالک سرحد پر منشیات کی سمگنلگ روکنے کے مؤثر طریقے تلاش کرنے کی کوشش کریں گے۔ اسی طرح اسلام آباد میں منگل کے روز دونوں ممالک ایٹمی تنازعات روکنے کے طریقۂ کار پر دو روزہ بات چیت شروع کریں گے۔ ایٹمی مذاکرات کے لیے پیر کے روز ایک بھارتی وفد اسلام آباد پہنچ رہا ہے۔ پاکستانی وزارت خارجہ کے ترجمان مسعود خان نے بتایا: ’ان مذاکرات کا مقصد ہے کہ بیلسٹِک میزائل ٹیسٹ کے بارے میں فریقین کو پہلے اطلاع کرنے کے طریقۂ کار پر ایک سمجھوتہ کیا جاسکے۔‘ اسی ماہ نئی دہلی میں دونوں ملکوں کے وفود سرینگر اور مظفرآباد کے درمیان بس سروِس شروع کرنے کے بارے میں اپنے اختلافات دور نہیں کرسکے تھے۔ مظفرآباد اور سرینگر کے درمیان بس سروس انیس سو سینتالیس سے بند ہے۔
| 
یہ صفحہ دوست کو ای میل کیجیئے
پرِنٹ کریں
