 |  رپورٹ تین ماہ میں شائع ہو جائےگی |
بھارت کے ریلوے کے وزیر لالو پرساد یادو نے 2002 میں گودھرا میں ہونے والے حادثے کی تحقیقات کا اعلان کیا ہے۔ لالو پرساد یادو نے لوک سبھا میں ریلوے بجٹ پر ہونے والے تبصرے کا جواب دیتے ہوئے اس بات کا اعلان کیا۔ انہوں نے کہا کہ تحقیقات کی رپورٹ تین ماہ میں آجائے گی۔ لالو پرساد یادو نے لوک سبھا کے تمام ارکان کو یقین دلایا کہ ان فسادات میں ملوث سبھی افراد کو سخت سے سخت سزا دی جائے گی۔ انہوں نے یہ بھی کہا کہ غیر ذمہ دار سرکاری افسروں کو بھی نہیں بخشا جائےگا۔ ان کا کہنا تھا کہ انسٹھ لوگوں کی ہلاکت کے باوجود سابق حکومت نے اس حادثے کی تحقیق نہیں کروائی تھی۔ انہوں نے کہا ’ مجھے افسوس ہے کہ اتنا بڑا حادثہ ہونے کے باوجود ریلوے نے اپنی طرف سے تحقیق کرنا ضروری نہیں سمجھا۔‘ 27 فروری 2002 کو گجرات کے گودھرا ریلوے سٹیشن پر سابرمتی ایکسپریس کے ایک ڈبے میں آگ لگنے کے بعد تمام ریاست میں فرقہ وارانہ فسادات شروع ہو گئے تھے۔ لالو پرساد یادو کا کہنا ہے کہ اس تحقیق سے اس بات کا پتا لگایا جائےگا کہ آگ شارٹ سرکٹ ہونے کی وجہ سے لگی تھی یا کسی آتشگیر مادے کی وجہ سے۔ | 
یہ صفحہ دوست کو ای میل کیجیئے
پرِنٹ کریں
