وزیرِ اعلیٰ وائے ایس راجہ شیکھر ریڈی نے پیکج کا اعلان کیا ہے

بی بی سی کے نامہ نگار کے مطابق حکومت کی طرف سے گزشتہ پانچ سالوں کے دوران خود کشی کرنے والے کسانوں کے خاندانوں کے لئے ڈیڑھ لاکھ روپے فی خاندان کے اقتصادی پیکج کے اعلان کے بعد سے لے کر اب تک بارہ کے قریب افراد خود کشی کر چکے ہیں۔

حکام نے اس خدشے کا اظہار کیا ہے کہ ہو سکتا ہے مجوزہ پیکج سے فائدے کی بجائے الٹا نقصان ہو جائے۔

ریاست آندھرا پردیش کے وزیرِ اعلیٰ وائے ایس راجہ شیکھر ریڈی نے لوگوں سے ایک مرتبہ پھر اپیل کی ہے کہ وہ اپنی جان لینے سے پہلے اپنے اور اپنے خاندانوں کے اوپر ہونے والے اس کے اثرات کے متعلق اچھی طرح سوچ لیں۔

یاد رہے کہ ریاست میں کانگریس پارٹی کی نو منتخب حکومت نے انتہائی غربت کی وجہ سے خود کشی کرنے والے کسانوں کے خاندانوں کے لئے امدادی پیکج کا اعلان کیا تھا جس میں ان کے قرضوں کی ادائیگی اور نئے کاروبار کے لئے پیسے دینا شامل تھا۔

سرکاری اعدادوشمار کے مطابق گزشتہ چھ سالوں میں تقریباً چھ سو کسانوں نے خودکشی کر لی تھی لیکن آندھرا پردیش کے نئے وزیرِ اعلیٰ وائے ایس راجہ شیکھر ریڈی کا کہنا ہے کہ صحیح تعداد چھ ہزار کے قریب ہے۔

گزشتہ دس سال سے آندھراپردیش پر بی جے پی کی اتحادی تیلیگودیشم پارٹی کی حکومت تھی جسے اب انتخابات میں شکست ہوئی ہے۔