رائٹرز گلڈ آف امریکہ نومبر سے ہڑتال کیے ہوئے ہے

فلم اور ٹی وی مصنفین کی تنظیم رائٹرز گلڈ آف امریکہ نومبر سے ہڑتال کیے ہوئے ہے۔ اس کا مطالبہ ہے کہ کہانی نویسوں کو ان کے کام کی ڈی وی ڈیز اور آن لائن فروخت سے حاصل ہونے والی آمدنی میں سے بھی حصہ دیا جائے۔

اس تنازعے کے نتیجہ میں ٹی وی کے تقریباً تمام ڈراموں اور مزاحیہ پروگراموں پر کام روک گیا ہے۔ مصنفین کی ہڑتال کی وجہ سے اس سال گولڈن گلوب ایوارڈ کی تقریب کو بھی صرف پریس کانفرنس تک محدود کرنا پڑا ہے۔

ڈائریکٹرز گلڈ آف امریکہ اور ایلائنس آف موشن پکچر اینڈ ٹیلی ویژن پروڈیوسرز کے درمیان پانچ روز تک جاری رہنے والے مذاکرات کے بعد انٹرنیٹ کے ذریعے ڈاؤن لوڈ کیے جانے والے پروگراموں سے حاصل ہونے والی آمدنی میں حصے داری کا طریقۂ کار بھی طے پایا ہے۔

رائٹرز گلڈ نے مذاکرات کو خوش آئند قرار دیا ہے۔ تاہم اس کا کہنا ہے کہ وہ ہر ایسی کوشش کی مزاحمت کی جائے گی جس کے تحت مصنفین کو کسی غیر تسلی بخش معاہدے کو تسلیم کرنے پر مجبور کیا جائے گا۔