فِل مرسر بی بی سی نیوز، سِڈنی

	راک اینڈ رول کے شہنشاہ کی یاد میں یہ میلہ پندرہ سال سے منایا جا رہا ہے

راک اینڈ رول کے شہنشاہ کی یاد میں آسٹریلوی صوبے نیو ساؤتھ ویلز کا قصبے پارکس میں یہ سالانہ میلہ انیس سو ترانوے سے منایا جا رہا ہے۔

شائقین کی اتنی بڑی تعداد کے پارکس پہنچنے سے اس آخرِ ہفتہ میں قصبے کی آبادی تقریباً دو گنا ہو گئی ہے۔

اس برس کے میلے میں شائقین کے درمیان کئی مقابلے ہوں گے جن میں ایلوس پریسلے کا بہترین روپ دھارنے والے اور ان کی آواز کی بہترین نقل پیش کرنے والوں کو انعامات دیے جائیں گے۔ ان کے علاوہ مقامی گرجے میں ایلوس کی یاد میں خصوصی دعائیہ تقریب بھی ہو گی۔ اس برس کے میلے کا مرکزی خیال ایلوس پریسلے کی انیس سو اکسٹھ کی مشہور فلم ’بلُو ہوائی‘ اور اور انیس سو چھپن کے مشہور گانے ’بلو سوئیڈ شوز‘ سے متاثر ہے۔

قصبے میں جوش و خروش
اگر ان کا جوانی میں انتقال نہ ہو گیا ہوتا تو ایلوس پریسلے اس ہفتے تہتّر برس کے ہو جاتے۔ ’پارکس ایلوس فیسٹیول‘ نامی اس میلے کی ابتدا پندرہ سال قبل قصبے کے ایک چھوٹے سے ریستوران میں ان کی بعد از مرگ سالگرہ کی تقریب سے ہوئی تھی۔ گزشتہ برس اس میلے میں ایلوس کے سات ہزار سے زائد چاہنے والوں نے شرکت کی تھی اور اس میں درجنوں مختلف مقابلوں اور تقریبات کا اہتمام کیا گیا تھا۔

گزشتہ برسوں کے دوران یہ میلہ اتنا مقبول ہوگیا ہے کہ اب اس کا انعقاد ایک سُپر مارکیٹ کی وسیع و عریض پارکنگ میں کیا جاتا ہے۔

	میلے کی وجہ سے تین دنوں کے لیے قصبے کی آبادی دوگنا ہو گئی

’مجھے نہیں معلوم کہ ایسا کیوں ہوتا ہے، لیکن یہ سچ ہے کہ بہت سے شائقین کے لیے یہ میلہ روحانیت کا پیغام لاتا ہے اور ان پر اس کے اچھے اثرات پڑتے ہیں۔‘

گزشتہ برس کے میلے میں ایک نیا ریکارڈ بھی قائم ہوا تھا جب کسی ایک مقام پر ایلوس پریسلے کا رُوپ دھارے شائقین کی سب سے بڑی تعداد پارکس میں موجود تھی۔ انیس سو ستتر میں بیالیس برس کی عمر میں انتقال کر جانے والے راک اینڈ رول کے شہنشاہ کا روپ دھارنے کے لیے ضروری ہے کہ آپکی زلفیں دراز ہوں اور آپ کی سفید ’بیل باٹم‘ پتلون کے پائنچے بھی خوب کھُلے ہوں۔

پارکس پہنچنے والے شائقین میں سے سینکڑوں ’ایلوس ایکسپریس‘ نامی خصوصی ریل گاڑی کے ذریعے یہاں پہنچے ہیں۔

میلے کے تماشائیوں کی توجہ کا خاص مرکز قصبے کی مرکزی سڑک پر ایلوس پریسلے کے بہروپیوں کی وہ پریڈ ہوتی ہے جس کے نکلتے ہی آسٹریلیا کے اس دور دراز قصبے کی کچی سڑک چمک اٹھتی ہے۔