ریحانہ بستی والا بی بی سی اردو ڈاٹ کام، ممبئی

	سیف علی خان نے رانی مکھرجی کے ساتھ بھنگڑہ ڈالا

اتوار کو سنہ دو ہزار چھ کے دولت مشترکہ کھیلوں کا آخری دن تھا۔ سن دو ہزار دس میں یہ کھیل دہلی میں ہوں گے اور اسی سلسلے میں اختتامی تقریب کو پرشکوہ بنانے اور آئندہ کھیلوں کے میزبان ملک کو روشناس کروانے کے لیئے بالی وڈ فنکاروں نے رقص اور نغمے پیش کیئے۔

میلبورن میں انڈین فنکاروں کی دھمال

دولتِ مشترکہ کی اختتامی تقریب میں اپنے فن کا مظاہرہ کرنے والے بھارتی فنکاروں میں ایشوریہ رائے، رانی مکھر جی، سیف علی خان،لارا دتہ، پریانکا چوپڑہ، سونو نگم، شریا گھوشال ، سنیدھی چوہان اور شیامک داور شامل تھے۔

میلبورن کے سٹیج پر سونو نگم، شریا گھوشال ، سنیدھی چوہان اور شیامک داور کے گائے گئےگیت ’دلی میں جو ہم دل والوں کو بلائیں گے، ہو گا کمال یار دھمال ،دلی دے دھمال‘ پر سیف علی خان نے رانی مکھرجی کے ساتھ بھنگڑہ ڈالا جبکہ ایشوریہ نے بھارتی رقص سے ناظرین کا دل جیتا۔

	ایشوریہ رائے اپنی پرفارمنس کے دوران

ایک عرصہ سے اس پروگرام کی تیاریاں چل رہی تھیں ۔ سیف کو گھبراہٹ تھی کیونکہ وہ پہلی مرتبہ اسٹیج پر بھنگڑہ کرنے جا رہے تھے اسی لیئے وہ رانی مکھرجی کے ساتھ گھنٹوں اس رقص کی ریہرسل کررہے تھے۔ سابقہ ملکہ حسن ایشوریہ رائے برازیل سے چونتیس گھنٹوں کا سفر کر کے فلم ’دھوم 2‘ کی شوٹنگ سے براہِ راست آسٹریلیا پہنچیں۔

اس سے قبل انہوں نے کوریوگرافر شیامک داور سے ان کے اسسٹنٹ کو برازیل طلب کیا تھا تاکہ وہ ان سے رقص کے کچھ سٹیپ سیکھ سکیں ۔ ایشوریہ کے سیکرٹری ہری سنگھ کا کہنا ہے کہ ’معاملہ چونکہ اپنے ملک کی ناموس کا تھا اس لیئے ایشوریہ نے اتنی مصروفیت کے باوجود وقت نکالا‘۔