صلاح الدین بی بی سی اردو ڈاٹ کام، دلّی

	بھارتی عوام امیتابھ بچن کو ایک رول ماڈل تصور کر تے ہیں

غیر سرکاری تنظیم نیشنل آرگنائزیشن فار ٹوبیکو ایریڈیکشن نے امیتابھ بچن کے معذرتی خط کےموصول ہونے کی تصدیق کی ہے۔

تنظیم کے سیکرٹری شیکھر سالکار کا کہنا ہے کہ امیتابھ بچن نے اپنے رقعہ میں اپنی غلطی تسلیم کرلی ہے اور کہا ہے کہ وہ خودگزشتہ تیس برسوں سے شراب نوشی بھی نہیں کرتے ہیں۔ اپنے خط میں امیتابھ نے لکھا ہے کہ’میں نے تمباکو نوشی کے خلاف قوانین پر توجہ دی اور فوراً ہی اپنے پروڈیوسر سے کہا ہے کہ وہ ایسے اقدامات کریں جس سے کہ قوانین کی خلاف ورزی نہ ہو‘۔

شیکھر سالکر نے کہا ہے کہ وہ امیتابھ کے اس جواب سے مطمئن ہیں۔ اہوں نے کہا کہ’میں بہت خوش ہوں۔ امیتابھ جیسی شخصیت سے مجھے یہی امید بھی تھی‘۔ تاہم تنظیم کا کہنا ہے کہ وہ اس کمپنی کے خلاف ابھی عدالت میں جانے کی تیاری کر رہی ہے جس نے اس طرح کی ہورڈنگز لگائی تھیں۔

نئے سال کے موقع پر کیشو رمسی کی آنے والی فلم ’فیملی‘ کی تشہیر کے لیےگوا کے نیشنل ہائی وے پر بڑی تعداد میں اشتہاری بورڈ لگائےگئے ہیں۔ ان ہورڈنگز اور پوسٹرز میں فلم کے ہیرو امتیابھ بچن ہونٹوں کے نیچے سگار دبائے دھواں اڑاتے نظر آ رہے ہیں۔ این او ٹی ای نے اس کے خلاف گزشتہ ہفتے امیتابھ بچن کےخلاف ایک قانونی نوٹس جاری کیا تھا اور جواب کے لیے انہیں ایک ہفتے کا وقت دیا گیا تھا۔