ریحانہ بستی والا ممبئی

ممبئی میں یہ فلم 16 تھیٹروں میں لگی تھی جسے تھیٹر مالکان نے اتار لیا

شیوسینا ، بجرنگ دل اور بھارتیہ جنتا پارٹی کے رضاکار سلمان خان کے پوسٹر جلا رہے ہیں اور ان کی گرفتاری کا مطالبہ کر رہے ہیں ۔

ممبئی کے باندرہ علاقے میں سلمان خان کی رہائشگاہ کے باہر پولیس تعینات کر دی گئی ہے اور ان تمام تھیٹروں پر پولیس کا پہرا ہے جہاں فلم ’میں نے پیار کیوں کیا‘ کی نمائش ہو رہی ہے۔

ٹی وی چینل پر سلمان خان کی ایشوریہ رائے سے ٹیلی فون پرگفتگو کے ٹیپ کو لگاتار سنانے کے بعد سے پورے ملک میں ہنگامے شروع ہو چکے ہیں اور پورے ملک میں اس معاملے کو سیاسی اور فرقہ وارانہ رنگ دینے کی کوشش کی جا رہی ہے ۔

ریاست اتر پردیش کے شہر بنارس کے ساجن تھیٹر پر شیوسینکوں نے سلمان خان کے پوسٹرز پھاڑ دیے اور ان کی گرفتاری کا مطالبہ کیا ۔ ان کا کہنا تھا کہ سلمان خان نے جس طرح انڈرورلڈ سے اپنے تعلقات کا اظہار کیا ہے، وہ شرمناک ہے ۔

شیوسینا ، بجرنگ دل اور بھارتیہ جنتا پارٹی کے رضاکار سلمان کی گرفتاری کا مطالبہ کر رہے ہیں

بھوپال سمیت ریاست مدھیہ پردیش کے کئی شہروں میں بھی ہنگامے ہوئے ہیں۔ریاست چھتیس گڑھ کے شہر رائے پور، ریاست گجرات میں احمد آباد اور سورت اور ریاست سے بھی اسی نوعیت کی اطلاعات موصول ہو رہی ہیں۔

اگرچہ ممبئی کے صرف ایک سنیما گھر کے سامنے مظاہرہ ہوا، لیکن سکیورٹی کے خدشات کے پیش نظر شہر کے سولہ سنیما گھروں سے فلم ’میں نے پیار کیوں کیا‘ کو اتار دیا گیا۔

مہاراشٹر اسمبلی میں بی جے پی کے لیڈرگوپی ناتھ منڈے نے سلمان کے خلاف کارروائی کا مطالبہ کیا۔ آج منڈے نے پولس کمشنر اے این رائے کے تبادلہ کا بھی مطالبہ کیا انہوں نے کہا کہ جب وزیرِ اعٰلی اس معاملے کی تحقیقات کا حکم دے رہے ہیں تو پولیس کمشنر نے بغیر تحقیق کے یہ کیسے کہہ دیا کہ اس ٹیپ میں کچھ خاص نہیں ہے۔

اسمبلی میں وزیرِ داخلہ آر آر پاٹل اور وزیرِاعٰلی نے یقین دلایا کہ اس معاملہ کی مکمل تحقیقات جلد از جلد کرا لی جائیں گی اور اس کی رپورٹ بدھ کے روز ایوان میں پیش کی جائے گی۔

گزشتہ شب تھیٹر’ آئی نوکس‘ میں سلمان کی فلم کا پریمئیر تھا لیکن سلمان خان وہاں نہیں آئے۔ سہیل خان نے وہاں منتظر صحافیوں کو بتایا کہ ٹیپ جعلی ہے جبکہ کرن جوہر نے کچھ کہنے سے انکار کر دیا تھا ۔

اس موقع پر ایشوریہ رائے کے وکیل گری راج کلکرنی نےاس پورے معاملے پر کہا کہ انہیں اس ٹیپ پر شبہ ہے اور اگر یہ قبول کر بھی لیا جائے کہ یہ ٹیپ صحیح ہے تو یہ غلط طریقہ سے منظر عام پر آیا ہے۔