پرائڈ اینڈ پریجوڈس نے بہت سی خواتین کو متاثر کیا ہے

رومانوی ناولوں کے بارے میں کیے جانے والے ایک سروے کے مطابق اٹھارہ سو تیرہ میں تحریر کئے گئے اس ناول نے شارلٹ برانٹے کے جین آئر کو بھی مات کر دیا ہے۔ اس سروے میں سات سو ارکان پر مشتمل رومانوی ناول لکھنے والوں کی ایسوسی ایشن کے ارکان سے رائے حاصل کی گئی تھی۔

’گون ود دا ونڈ‘ بھی اس فہرست کے پہلے پانچ ناولوں میں شامل ہے۔ دریں اثناء ’وائٹ بریڈ اینڈ اورنج‘ کی اعزاز یافتہ آندرے لیوی کو سن دو ہزار پانچ کے رومانوی ناولوں کا ایوارڈ دیا گیا ہے۔

مصنف اور رومانوی ناول ایسوسی ایشن کے رکن جینی ہاڈن کا کہنا ہے کہ یہ وہ لازوال ناول ہیں جو کہ وقت کی کسوٹی پر پورے اترتے ہیں۔

انہوں نے کہا کہ ان کہانیوں میں ان رویوں کو آشکار کیا ہے جو ایک عام آدمی پیار میں مبتلا ہونے کے بعد اپناتا ہے۔ انہوں نے کہا ان مصنفین نے یہ رویے ہمارے سامنے اس طرح پیش کیے ہیں کہ آج کہ معاشرے میں بھی یہ اتنے ہی نئے ہیں جتنے یہ کہانیاں تحریر کرتے وقت تھے۔

جین آسٹن کا ناول ’پرسوایشن‘ اس فہرست میں ساتویں نمبر پر ہے۔

اس کے بعد بی بی سی ریڈیو فور پر ’وومن آور‘ میں ہونے والے سروے میں بھی ’پرائڈ اینڈ پریجوڈس‘ کو ایک ایسی کتاب قرار دیا گیا ہے جو بہت سے خواتین کی زندگیوں پر اثرا انداز ہوئی اور انہیں اپنے رویے تبدیل کرنے پر مجبور کیا۔