قطرینہ کیف کا کپور فیملی کے ساتھ ڈنر

بالی وڈ اداکارہ قطرینہ کیف کی گذشتہ دنوں رنبیر کپور کے اہل خانہ سے ملاقات ہوئی جس میں رنبیر کے والد رشی کپور نظر نہیں آئے۔

در اصل سنیچر کی شب قطرینہ کیف اور رنبیر کپور کے خاندان کے چند افراد ممبئی میں ایک عشائیے پر نظر آئے۔

بھارتی اخبار ہندوستان ٹائمز کی رپورٹ کے مطابق اس موقعے پر رنبیر کپور کی والد اور اپنے زمانے کی معروف اداکارہ نیتو سنگھ کے علاوہ ان کی بہن ریدھیما کپور، دادی کرشنا کپور اور چچا اور معروف اداکار رندھیر کپور موجود تھے۔

دونوں اداکار قطرینہ اور رنبیر ایک ساتھ کار میں آئے اور دونوں نے عام کپڑے پہن رکھے تھے۔

خیال رہے کہ رنبیر کپور اور ان کی دوست قطرینہ کیف ایک ساتھ رہتے ہیں۔

اس سے قبل رنبیر کے والد اور معروف اداکار رشی کپور نے دونوں کے ساتھ رہنے کی بات کی تصدیق کرتے ہوئے کہا تھا کہ انھوں رنبیر کے فیصلے کا احترام کیا اور اسے اس کی گرل فرینڈ کے ساتھ جا کر رہنے کی اجازت دی۔

اس سے قبل ان کے تعلق سے صاف چھپتے بھی نہیں سامنے آتے بھی نہیں والی بات کہی جاتی رہی ہے۔

رواں سال مارچ میں ایک کتاب کی تقریب رونمائی میں میڈیا کی جانب سے قطرینہ کیف کے بارے میں پوچھے گئے سوال پر ’ارے یار‘ کہہ کر رنبیر اپنی کرسی سے اٹھ کھڑے ہوئےاور وہاں سے چلے گئے تھے۔

رنبیر اور قطرینہ کی دوستی کے چرچے تب ہوئے جب سپین میں تنہائی میں چھٹی مناتے ہوئے ان کی خفیہ طور پر لی گئی تصاویر ایک جریدے نے شائع کی تھیں۔

حالانکہ دونوں نے کبھی کھلے الفاظ میں اسے قبول تو نہیں کیا ہے لیکن ایک دوسرے کو ’خاص‘ ضرور بتایا ہے۔