’پیار ثابت کرنے کے لیے بھوکی کیوں رہوں ‘
بالی وڈ کی معروف اداکارہ کرینہ کپور نے جب اپنی آنے والی فلم ’گوری تیرے پیار میں‘ کے پروموشن سے چھٹی لی تھی تو یہ خبر گرم تھی کہ وہ ہندو مذہب سے تعلق رکھنے والی بیشتر خواتین کی طرح اپنے خاوند کی لمبی عمر کے لیے کروا چوتھ کا برت یعنی روزہ رکھیں گی۔
لیکن جب گذشتہ روز منگل کے دن ورت رکھنے کا دن آیا تو کرینہ نے یہ کہہ کر سب کو چونکا دیا کہ وہ ورت نہیں رکھیں گی۔
انھوں نے کہا کہ ’مجھے یہ پتہ ہے کہ جب ساری عورتیں بھوکی پیاسی ہوں گی تو میں کھا رہی ہوں گی۔ سیف کے لیے اپنا پیار ثابت کرنے کے لیے مجھے بھوکا رہنے کی ضرورت نہیں ہے۔‘
یہ بات دلچسپی سے خالی نہیں کہ ہندو مذہب سے تعلق رکھنے والی بہت سی خواتین اس ورت کو اپنے خاوند کی درازیِ عمر کے لیے اہمیت دیتی ہیں۔ کرینہ کپور نے ورت رکھنے والی خواتین کو اس انداز میں نصیحت کر ڈالی کہ ’وہ سب آج کے دن کھانا کھائیں، مٹھائی کھائیں، محبت میں بھوکوں کیوں مرنا۔‘
اپنے بارے میں بات کرتے ہوئے کرینہ نے کہا: ’میں کپور خاندان سے تعلق رکھتی ہوں، میں کھانے کے بغیر نہیں جی سکتی، میں کروا چوتھ کا تہوار کھاتے ہوئے اور مزے کرتے ہوئے گزارتی ہوں۔‘
اس سے قبل 16 اکتوبر کو کرینہ کپور اور سیف علی خان نے اپنی شادی کی پہلی سالگرہ لندن میں منائی تھی اور یہ خبر گرم تھی کہ وہ کروا چوتھ کا ورت بھی رکھیں گی۔
اور یہ خبر تقریباً تمام تر اخباروں کی سرخی بنی تھی کہ کرینہ کپور اپنے شوہر سیف علی خان کے لیے کروا چوتھ کا ورت رکھ رہی ہیں اور اسی لیے انہوں نے اپنی آنے والی فلم’گوری تیرے پیار میں‘ کے پروموشن سے چھٹی بھی مانگ لی ہے۔
سیف ان دنوں لندن میں اپنی فلم ’ہم شکل‘ کی شوٹنگ کر رہے ہیں۔
End of سب سے زیادہ پڑھی جانے والی
اس سے قبل جب ان سے رمضان کے مہینے میں روزے رکھنے کے بارے میں پوچھا گیا تھا تو انھوں نے کہا تھا کہ میں نے ایک بھی روزہ نہیں رکھا ہے اور نہ ہی رکھنے کا کوئی ارادہ ہے کیونکہ بچپن سے ہی رمضان میری زندگی کا حصہ نہیں رہا ہے تو پھر اچانک روزے رکھنا کس طرح شروع کر دوں۔
صحافیوں سے بات کرتے ہوئے کرینہ نے یہ بھی واضح کیا کہ اگرچہ سیف اور ان کی شادی کو نو مہینے ہو گئے ہوں پر آج تک انہوں نے کبھی بھی سیف کے لیے کھانا نہیں بنایا ہے۔
