'لو اب پرینکا چوپڑہ بھی پاکستان کی ہوئیں'

پرینکا چوپڑہ جنھیں انڈیا میں کبھی دیسی تو کبھی پردیسی گرل کے نام سے یاد کیا جاتا تھا اور لوگ انھیں ہالی وڈ میں انڈیا کی شان کہا کرتے تھے اچانک لوگوں کے عتاب کا نشانہ بن گئیں۔

دراصل پرینکا امریکی جاسوسی ٹی وی شو کوانٹیکو میں لیڈ کردار میں ہیں۔ یکم جون کو براڈکاسٹ ہونے والے شو میں پاکستان کو بدنام کرنے کے لیے ہندو قوم پرست مسلمان بن کر حملے کی منصوبہ بندی کرتے ہیں اور پرینکا اس سازش کا پردہ فاش کرتی ہیں۔

اس کے بعد سے بھکت لوگ پرینکا کو پاکستان بھیجنے کا مشورہ نہیں بلکہ دھمکی دے رہے ہیں۔ ابھی تک تو بالی وڈ کے دو سپر سٹارز کو پاکستان بھیجنے کی سفارش ہو رہی تھی لو اب پرینکا بھی پاکستان کی ہوئیں۔

یہ بھی پڑھیے

'دیسی گرل‘ پر انڈینز کا غصہ

’رنگت سانولی ہے:‘ پرینکا کو ہالی وڈ سے انکار

یہ تو پاکستانی فلم انڈسٹری کے لیے خوش خبری ہے اب بالی وڈ کی فلمیں پاکستان میں دیکھنے کے ساتھ ساتھ بنائی بھی جا سکیں گی۔

ان دنوں پرینکا دوسری وجوہات کی وجہ سے بھی خبروں میں ہیں۔ امریکی سنگر، نغمہ نگار اور اداکار نِک جونز کے ساتھ پرینکا کی گہری دوستی کی خبروں نے اب افواہوں کا روپ دھار لیا ہے۔

ہالی وڈ میں آجکل پرینکا تقریباً ہر تقریب میں نِک جونز کے ہاتھ میں ہاتھ ڈالے نظر آتی ہیں۔ حال ہی میں نک کے بھائی کی شادی میں پرینکا اور جونز کی اینٹری نے کئی طرح کے سوالوں کو جنم دیا کہ 'کیا پرینکا کو اپنا مسٹر رائٹ مل گیا ہے؟'

یہ بھی پڑھیے

پرینکا چوپڑہ کے لیے سٹائل آئیکون ایوارڈ

پرینکا چوپڑا کا اسرائیلی اداکارہ سے سخت مقابلہ

نِک نے اپنا کریئر محض سات سال کی عمر میں تھیئٹر سے شروع کیا تھا اور ابھی وہ محض 25 سال کے ہیں۔ کہا جا رہا ہے کہ ان دونوں کی دوستی کی شروعات گذشتہ سال میٹ گالا میں ہوئی تھی جہاں ان دونوں نے ایک ہی ڈیزائنر کے لیے ریمپ پر واک کی تھی۔

اس کے بعد سے ہی دونوں گاہے بگاہے ملتے نظر آئے اور کئی تقریب میں ہاتھ میں ہاتھ ڈالے دکھائی دیئے۔ اب ان دونوں کے درمیان یہ رشتہ صرف دوستی تک محدود ہے یا پھر بات کچھ اور ہے یہ ابھی واضح نہیں ہے۔

سلمان خان ہر عید کی طرح اس عید پر بھی آئے ہیں اور اس بار وہ ریس تھری لیکر آئے ہیں۔ اس فلم کی ریلیز سے پہلے ہی تمام میڈیا فلم، اس کی کاسٹ اور سلمان کی خبروں سے بھرا ہوا ہے اور فلم نے رلیز سے پہلے ہی اپنے سیٹلائٹ رائٹس 132 کروڑ روپے میں بیچ دیے ہیں۔

توقع ہے کہ فلم اپنے پہلے ہی ہفتے ہیں سو کروڑ کا ہندسہ پار کر لے گی۔ فلم میں کہانی کا تو پتہ نہیں ہاں ایکشن اور سلمان خان ہیں اور بقول کچھ لوگوں کے یہی فلم کی کامیابی کی ضمانت ہے۔

یہ بھی پڑھیے

دل میں آتا ہوں سمجھ میں نہیں: سلمان خان

حالانکہ رنبیر کپور کی فلم 'سنجو' کے ٹریلر کو بہت اچھا ریسپانس ملا ہے اور کہا جا رہا ہے کہ فلم کی کہانی سے لیکر اس کی میکنگ تک سبھی کچھ اعلٰی میعار کی ہے۔ لیکن اچھی بات یہ ہے کہ فلم اس ہفتے نہیں 29 جون کو ریلیز ہوگی۔