مانچسٹر دھماکے کے بعد میرا دل ٹوٹ گیا ہے: آریانا گرینڈے

امریکی سٹار آریانا گرینڈے نے مانچیسٹر میں شو کے بعد ہونے والے دھماکے اور 22 ہلاکتوں پر گہرے دکھ کا اظہار کیا ہے۔

آریانا گرینڈے جو اس حملے میں محفوظ رہیں نے ایک ٹویٹ کے ذریعے کہا کہ ’افسردہ، دلی طور پر، میں معذرت خواہ ہوں، میرے پاس الفاظ نہیں ہیں۔'

’نفرت سے نفرت کو حل نہیں کیا جا سکتا‘

برطانیہ کے خودکش حملہ آور

خیال رہے کہ پیر کی شب یہ دھماکہ اس وقت ہوا جب 23 سالہ گلوکارہ آریانا گرینڈے کے مانچیسٹر ارینا میں کنسرٹ کا اختتام ہوا۔

آریانا گرینڈے آج کل یورپی ممالک کے دورے پر ہیں اور مختلف شہروں میں کنسرٹ کر رہی ہیں۔

اس سلسلے میں مانچیسٹر ارینا میں ہونے والے کنسرٹ کے موقع پر ان کے ہزاروں مداح وہاں موجود تھے۔ ان مداحوں میں نوجوان لڑکیوں کی ایک بڑی تعداد بھی شامل تھی۔

ان کے مینیجر سکوٹر براؤن نے بھی ایک ٹویٹ کی جس میں انھوں نے کہا ہے کہ ’ہمارے دل ٹوٹ چکے ہیں۔‘

سکوٹر براؤن نے اس حوالے سے مزید کہا کہ ’اس بیہمانہ حملے میں ہلاک اور زخمی ہونے والوں کے لیے الفاظ ہمارے دکھ کو بیان نہیں کر سکتے۔‘

’ہم اس بزدلانہ حملے جانے والی بچوں اور پیاروں کی جانوں کے لیے غمگین ہیں۔‘

ان کا کہنا تھا کہ ’ہم ان اہلکاروں کے شکر گزار ہیں جنھوں نے سب سے پہلے پہنچ کر جانیں بچانے میں مدد فراہم کی۔‘

’ہم آپ سب سے کہتے ہیں کہ ہلاک شدگان، زخمیوں اور متاثرہ افراد کو اپنے دلوں اور دعاؤں میں یاد رکھیں۔‘

آریانا گرینڈے کون ہیں؟

آریانا گرینڈے کے ساتھی گلوکاروں نے بھی اس واقعے کے بعد پیغامات بھیجے ہیں۔ ان موسیقاروں میں لٹل مکس بھی شامل ہیں۔

اولی مرس نے ٹویٹ کی: ’ایسا نہیں ہونا چاہیے کہ کوئی کنسرٹ پر جائے اور واپس نہ آئے۔‘

ڈیمی لواٹو نے لکھا: ’یہ سوچ کر دکھ ہو رہا ہے کہ کنسرٹ پر جانے والے اپنی جان کھو بیٹھے۔ سب کے لیے دعا گو ہوں۔‘

اس بارے میں لارڈ نے لکھا کہ ’ہر موسیقار کو دکھ اور خود کو ذمہ دار محسوس کرنا چاہیے۔ شو کو آپ کے لیے محفوظ ہونا چاہیے۔ حقیقت میں بدترین خواب ہے۔ مانچیسٹر اور ارینا کے لیے پیار۔‘

آریانا گرینڈے نے اس کے بعد لندن میں پرفارم کرنے کے علاوہ بیلجیئم، پولینڈ، جرمنی، سوئٹزرلینڈ، فرانس، پرتگال، سپین، اٹلی اور جنوبی امریکہ میں بھی کنسرٹ کرنے ہیں۔