آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
شادی کے تحفے میں چھپا بم پھٹنے سے دولہے کی ہلاکت، دلہن کا سابقہ دوست گرفتار
انڈیا میں ایک شخص نے شادی کے تحفے کے طور پر ملنے والا ہوم تھیٹر ابھی چلایا ہی تھا کہ ایک زور دار دھماکہ ہوا جس میں وہ شخص اور اس کا بھائی ہلاک ہو گئے۔
پولیس کا کہنا ہے کہ اس تحفے میں دھماکہ خیز مواد چھپایا گیا تھا جو اس وقت پھٹ گیا جب ہوم تھیٹر کا پلگ لگا کر اسے چلانے کی کوشش کی گئی۔
دلہا تو موقع پر ہی ہلاک ہو گیا جبکہ اس کا بھائی زخموں کی تاب نہ لاتے ہوئے علاج کے دوران چل بسا۔
پولیس کا دعوی ہے کہ یہ بم مبینہ طور پر دلہن کے سابق عاشق نے بھجوایا تھا جس کو غصہ تھا کہ اس کی محبوبہ کسی اور شخص سے کیوں شادی کر رہی ہے۔
پولیس نے مدھیا پردیش ریاست کے رہائشی سرجو مارکم کو بطور ملزم حراست میں لے لیا ہے جن کی جانب سے اب تک کوئی بیان سامنے نہیں آ سکا۔
اس دھماکے میں چار افراد زخمی ہوئے تھے جن میں ایک 18 ماہ کا بچہ بھی شامل ہے۔ یہ دھماکہ تین اپریل کو انڈیا کی وسطی ریاست چھتیس گڑھ کے کبیرڈھم ضلع میں دلہے کے گھر پر ہوا تھا۔
یہ بھی پڑھیے
End of سب سے زیادہ پڑھی جانے والی
پولیس کا دعوی ہے کہ 33 سالہ مارکم کا انتیس سالہ خاتون سے تعلق تھا اور اس کا اصرار تھا کہ یہ خاتون اس کی دوسری بیوی بن جائے۔
تاہم اس خاتون کے اہلخانہ نے اس رشتے سے انکار کر دیا اور کہیں اور شادی طے کر دی۔
پولیس کا کہنا ہے کہ دھماکہ اتنا زوردار تھا کہ اس کی شدت سے کمرے کی چھت اور دیواریں گر گئیں۔
