پاکستانی اور انڈین افواج کی سری لنکا میں ریسکیو کوششوں میں شرکت اور اسلام آباد کا نئی دہلی پر امدادی سامان کی فلائٹ کو کلیئرنس نہ دینے کا الزام

سری لنکا میں آنے والے سمندری طوفان کی تباہ کاریوں کے بعد ملک میں ایمرجنسی نافذ ہے اور متاثرہ علاقوں میں پھنسے افراد کو نکالنے کے لیے ریلیف اینڈ ریسکیو مشن جاری ہے۔ طوفان کے نتیجے میں اب تک 460 افراد ہلاک ہو چکے ہیں جبکہ سینکڑوں لاپتہ ہیں۔

اس قدرتی آفت کے دوران جہاں جنوبی ایشیا کے دو حریف ممالک پاکستان اور انڈیا کا سری لنکا میں امدادی کارروائیوں میں حصہ لینا ’خوش آئند‘ قرار دیا جا رہا ہے وہیں اسلام آباد نے انڈیا پر سری لنکا بھیجی جانے والی امداد روکنے کا الزام لگایا ہے۔ نئی دہلی نے اسے ’انڈیا مخالف گمراہ کن معلومات پھیلانے کی ایک اور کوشش‘ قرار دے کر مسترد کر دیا ہے۔

پاکستانی دفتر خارجہ کی جانب سے منگل کے روز جاری ہونے والے ایک بیان میں دعویٰ کیا گیا کہ ’انڈیا پاکستان کی جانب سے انسانی ہمدردی کی بنیاد پر سری لنکا بھیجی جانے والی امداد کو مسلسل روک رہا ہے۔ سری لنکا کے لیے پاکستانی امداد لے جانے والا خصوصی طیارہ انڈیا سے اس آپریشن میں حصہ لینے اور پرواز کے لیے منظوری کے انتظار میں اب تک 60 گھنٹے سے زائد کی تاخیر کا شکار ہے۔‘

دفترِ خارجہ نے اپنے بیان میں مزید کہا کہ ’انڈیا کی جانب سے گزشتہ رات 48 گھنٹے بعد دی گئی جزوی فلائٹ کلیئرنس عملی طور پر ناقابلِ عمل تھی۔ یہ صرف چند گھنٹوں کے لیے تھی اور واپسی کی پرواز کے لیے کوئی منظوری بھی نہیں دی گئی تھی، جس کی وجہ سے سری لنکا کے مُشکل میں پھنسے لوگوں کے لیے اس ہنگامی امدادی مشن میں شدید رکاوٹ پیدا ہوئی۔‘

انڈیا نے پاکستانی وزارت خارجہ کا الزام مسترد کرتے ہوئے کہا ہے کہ یہ 'انڈیا مخالف گمراہ کن معلومات پھیلانے کی ایک اور کوشش ہے۔'

پاکستان کے بیان پر ردعمل دیتے ہوئے ترجمان انڈین وزارت خارجہ نے کہا کہ یکم دسمبر کو قریب دن 1 بجے انڈین ہائی کمیشن کو پاکستانی طیارے کے لیے اوورفلائٹ کلیئرنس کی درخواست موصول ہوئی تھی۔ ’انڈین حکومت نے اسی دن تیزی سے درخواست منظور کی اور یکم دسمبر کو قریب ساڑھے پانچ بجے اوورفلائٹ کی اجازت دی۔‘

اس سے قبل پاکستانی ذرائع ابلاغ میں ایسی اطلاعات سامنے آئی تھیں کہ سری لنکا میں سیلاب متاثرین کے لیے امداد اور ماہرین کی ٹیم کارگو جہاز کے ذریعے سری لنکا جانا چاہتی تھی لیکن انڈیا نے اُسے فضائی حدود استعمال کرنے کی اجازت نہیں دی۔

یاد رہے کہ رواں سال کے تنازع کے بعد سے دونوں ممالک کی فضائی حدود ایک دوسرے کے لیے تاحال بند ہیں۔

لیکن اس سب کے برعکس سوشل میڈیا پر ریلیف آپریشنز میں پاکستان اور انڈین افواج کی شمولیت کو مثبت اقدام قرار دیا گیا اور کئی افراد کا کہنا ہے کہ بظاہر یہ چھوٹا اقدام ہے لیکن اس کی علامتی اہمیت بہت زیادہ ہے۔

’ایک مقصد نے دشمنوں کو اکٹھا کر دیا‘

’سری لنکا میں پاکستانی اور انڈین ہیلی کاپٹر ریسکیو کی کوششوں میں مصروف ہیں۔ ایک مقصد نے پرانے دشمنوں کو اکٹھا کر دیا، شکریہ بھائیوں۔‘

یہ پیغام سری لنکا کے شانے پریا وکرما کا ہے جو اپنے ملک میں ایک سمندری طوفان کے بعد دونوں ممالک کی افواج کی ریسکیو خدمات کا ذکر کرتے ہوئے شکریہ ادا کرنے والوں میں شامل ہیں۔

ان کا اشارہ یقیناً پاکستان اور انڈیا کے درمیان دیرینہ اختلافات کے ساتھ ساتھ حال میں اس چار روزہ تنازع کی جانب بھی ہے جس کی بازگشت اب تک سنائی دے رہی ہے۔

پاکستانی فوج کا کہنا ہے کہ ہیلی کاپٹرز کی مدد سے سری لنکا میں سیلاب میں پھنسے افراد کو نکالا جا رہا ہے جبکہ پاکستان نے متاثرہ افراد کے لیے امدادی بھی بھجوائی ہے۔

انڈیا کی وزارتِ خارجہ کے مطابق سری لنکا میں انڈین فضائیہ اور نیوی بھی ریلیف اینڈ ریسکیو آپریشن میں حصہ لے رہی ہیں۔

سری لنکا میں کیا ہوا تھا؟

سری لنکا میں 28 نومبر کو آنے والے سمندری طوفان ’سائیکلون دیتوا‘ کے بعد ایمرجنسی نافذ ہے اور ملک کا تقریباً ایک تہائی حصہ بجلی اور پانی سے محروم ہے۔

سری لنکا میں سمندری طوفان اور مٹی کے تودے گرنے کے واقعات میں اب تک 460 افراد ہلاک اور ہزاروں افراد بے گھر ہو گئے ہیں۔ ایک لاکھ سے زیادہ افراد سرکاری شیلٹرز میں پناہ لیے ہوئے ہیں۔

سری لنکا کے صدر کمارا ڈسینائکے نے کہا ہے کہ یہ ملکی تاریخ کی سب سے مشکل قدرتی آفت ہے اور ان کے مطابق تباہی اتنی شدید ہے کہ تعمیر نو کا اندازہ لگانا بھی آسان نہیں۔

پاکستان بحریہ کی امدادی کارروائیاں

پاکستان اور انڈیا کے حکام کا کہنا ہے کہ سری لنکا میں سیلاب سے متاثرہ علاقوں میں ریلیف اور بحالی کے لیے بحریہ کے اہلکار اور ہیلی کاپٹرز حصہ لے رہے ہیں۔

پاکستان کی افواج کے مطابق سری لنکا میں سیلاب کے بعد پاکستان کا ریلیف مشن سری لنکا پہنچا ہے۔

پاکستان نیوی کا بحری جہاز پی این ایس سیف سری لنکا کی بندرگاہ پر لنگر انداز ہے اور متاثرہ علاقے کوتیکاواتا میں پھنسے افراد کو نکالنے کے لیے پاکستانی فوج کے ہیلی کاپٹر نے بھی حصہ لیا جبکہ پاکستان نے امدادی سامان بھی سری لنکا بھجوایا ہے۔

پاکستان میں قدرتی آفات سے نمٹنے کے ادارے این ڈی ایم اے کا کہنا ہے کہ ماہرین کی 45 رکنی ریسکیو ٹیم سری لنکا روانہ کی جائے گی جس کے ساتھ موبائل ہسپتال کا نظام، کشتیاں، خیمے، کمبل، کھانے کے پارسل اور ادویات بھی ہوں گی۔

’انڈین ہیلی کاپٹروں نے پاکستانی شہریوں کو بھی بچایا‘

انڈیا کی وزارتِ خارجہ کا کہنا ہے کہ انڈیا نے امدادی سامان کے بھرے بحری جہاز اور تین امدادی پروازیں سری لنکا روانہ کیں جبکہ میڈیکل ٹیم اور سرچ اینڈ ریسکیو کے ماہرین کی ٹیم بپی سری لنکا بھجوائی ہیں۔

انڈیا کی وزارتِ خارجہ کے بیان کے مطابق انڈیا کے طیارہ برادار بحری بیڑے آئی این ایس وکرانت سے انڈین ایئر فورس کے ایم ائی 17 ہیلی کاپٹرز متاثرہ علاقوں میں پھنسے افراد کو نکالنے کے مشن میں حصہ لے رہے ہیں۔

بیان میں کہا گیا ہے کہ متاثرہ علاقوں میں سری لنکن کے مقامی افراد کے علاوہ برطانیہ، جرمنی، ایران، آسٹریلیا اور پاکستان سمیت مختلف ممالک سے تعلق رکھنے والے افراد کو ریسکیو کیا گیا ہے۔

سوشل میڈیا پر چرچا

دونوں ممالک کی افواج کا سری لنکا میں امدادی آپریشن میں شمولیت کو کئی افراد نے بھی مثبت قرار دیا ہے۔

ایکس پر ایک صارف سیہان مادوا کا کہنا ہے کہ ’اس مشکل وقت میں پاکستان اور انڈیا ملک کر سری لنکا کی مدد کر رہے ہیں۔‘ انھوں نے کہا کہ ’دونوں ممالک کاانسانیت کی مدد پر دل کی گہرائیوں سے شکریہ۔‘

اسی طرح سری لنکا کے وزیر خارجہ وجیتھا ہیراتھ نے پاکستان کی مدد پر شکریہ ادا کیا۔ ایکس پر جاری پوسٹ پر انھوں نے کہ ’پاکستان کی مدد دونوں ممالک کے درمیان مضبوط رشتے کو ظاہر کرتی ہے۔ ہم اس دوستی اور تعاون کو قدر کی نگاہ سے دیکھتے ہیں۔‘

سوشل میڈیا سائٹ ایکس پر ایک صارف شین پرییاوک کراما نے لکھا کہ ’انڈیا نے ایک بار پھر ظاہر کیا ہے کہ وہ خطے میں ہر ایک کی مدد کرنے کی صلاحیت رکھتا ہے۔‘

انھوں نے کہا کہ ’پاکستان اور انڈیا کے مابین تاریخی تناؤ کے باوجود انڈیا نے انسانی ہمدردی کی بنیاد پر سری لنکا کے لیے پاکستان کی امدادی پرواز گزرنے کی اجازت دی ہے۔ ہم سری لنکز کے لیے یہ بہت بڑی بات ہے۔‘

ایکس پر اپنی پوسٹ میں انھوں نے کہا کہ ’انڈیا اور پاکستان آپ نے ایک بار پھر ثابت کیا ہے کہ مشکل اوقات میں وہ بہترین مدگار ہیں جن پر انحصار کیا جا سکتا ہے۔‘