اٹلی میں شدید زلزلے سے متعدد عمارتیں تباہ

اٹلی کے وسطی شہر نورسیہ کے قریب زلزلے کے شدید جھٹکے محسوس کیے گئے ہیں جس میں متعدد عمارتوں کے تباہ ہونے اور کم ازکم نو افراد زخمی ہوئے ہیں۔

یاد رہے کہ تقریباً دو ماہ قبل بھی اٹلی میں زلزلے کے نتیجے میں کئی قصبے تباہ اور 300 سے زیادہ افراد ہلاک ہوگئے تھے۔

اتوار کے روز آئے اس زلزلے کی ریکٹر سکیل پر شدت 6.6 بتائی گئی ہے جو کہ اگست میں آنے والے زلزلے سے زیادہ ہے۔

ابھی تک اس زلزلے کی وجہ سے اب تک نو افراد کے زخمی ہونے کی اطلاع موصول ہوئی ہے۔

مقامی میڈیا کے مطابق زلزلے سے مہندم ہونے والی عمارتوں سے نو افراد کو زخمی حالت میں باہر نکالا گیا ہے۔

زلزلے کے جھٹکے دارالحکومت روم اور وینس میں بھی محسوس کیے گئے ہیں۔ بتایا گیا ہے کہ زلزلے کی گہرائی ایک اعشاریہ پانچ کلومیٹر تھی۔

امریکی جیولوجیکل سروے کے مطابق اس زلزلے کا مرکز صوبہ پیروگیا کے وسط سے تقریباً 68 کلومیٹر جنوب مشرق میں نورسیہ کے قصبے کے پاس تھا۔

یہ زلزلہ مقامی وقت کے مطابق صبح پونے آٹھ بجے کے قریب آیا۔

حالیہ زلزلے کو گذشتہ دہائیوں میں ملک میں آنے والا سخت ترین زلزلہ قرار دیا جا رہا ہے۔