ኣብ ኬንያ ተራእዩ ዝተብሃለ "እየሱስ ክርስቶስ"

ኣብዚ ቕነ፡ ምስሊ ጽሑፍን ስእልን ዘሰነዮ፡ ብልምዲ እየሱሰ ክርስቶስ ዝተመሰለ ሓደ ውልቀሰብ፡ ኣብ ማሕበራዊ መራኸቢታት ይዘውር ኣሎ።

መን'ዩ? እንታይ'ከ ይገብር?

ነዚ ዝምልከት፡ ኣብ ትዊተር ሰባት ልዕሊ ሸሞንተ ሽሕ ግዜ ዝተቐባበሉዎ ደቡብ ኣፍሪቃዊ ፖለቲከኛ ጁሊየስ ማሌማ ዝጸሓፎ፡ "ደቡብ ኣፍሪቃዊ ፓስተር ናብቲ ዝሰብኸሉ ቤተክርስትያን ንእየሱስ ክርስቶስ ካብ መንግስተ ሰማያት ዓዲሙ ከም ዝምህር ገይሩ" ዝብል ጽሑፍ፡ ፍሉጣት ሰባት ከይተረፉ ተኻፊሎምዎ።

ይኹን'ምበር፡ እቶም ምስልታት፡ ካብ ናይሮቢ 25 ኪሎ ሜትሮ ናብ ደቡባዊ ምዕራብ ርሒቓ ኣብ እትርከብ ኪሴሪያ ተባሂላ ካብ እትጽዋዕ ከተማ ኬንያ ዝተወስዱ ምኻኖም ይዝረብ።

እቲ ዘዘራርብ ዘሎ ውልቀሰብ ሰብ ድማ፡ ማይክል ጆብ ዝተባህለ ኣሜሪካዊ ሰባኽን ተዋሳእን ኮይኑ፡ ኣብ ዝተፈላለዩ ጉባኤ ኣብያተ ክርስትያናት ዘረባ ከስምዕ ዕድመ ይግበረሉ።

ንነብሱ፡ "ህያው ቤተመዘክር ቅዱስ መጽሓፍ" ኢሉ ዝጽውዕ ኣብ ኦርላንዶ ፍሎሪዳ ዝነብር ማይክል ጆብ፡ እየሱስ ክርስቶስ ኮይኑ 'ዘ ሆሊላንድ ኤክስፒሪያንስ' ኣብ ዝብል ፊልሚ ተዋሲኡ'ዩ።

እዚ ውልቀሰብ ኣብቲ ዝሓለፈ ሰሙን ኣብ ፌስቡክ ገጹ ኣብ ዘውጽኦ ምስሊ፡ ኣብ ኬንያ ዘለው ናይ ሕርሻ ቦታ፡ መንበሪ ገዛን ዶኳኩንን ይርኣዩ፡ እዚ ኣብ ደቡብ ኣፍሪቃ ከም ዝኾነ ኣብ ዝገልጹ ናይ ማሕበራዊ ሚዲያ ጽሑፋት ድማ ተመሳሳሊ ነገር ይርአይ።

እዚ ምስሊ ተጠቒሙ ኣብ ዝተዘርግሐ ሓደ ጽሑፍ ድማ፡ "ኬንያዊ ፓስተር እየሱስ ክርስቶስ ኣብ ጎደናታት ኬንያ ረኺበዮ ኢሉ" ይብል።

እዚ ኣብ ትዊተር ዝዘውር ዘሎ ስእሊ ድማ፡ ማይክል ጆብ ዝሓለፈ ሰሙን ጊተንጋላ ኣብ ዝተባህለት ከተማ ኣብ ዝርከብ ሓደ ቤተ ክርስትያን እናሰበኸ ዝተሳእሎ'ዩ።

ኣብ ኬንያ ኣብ ዝነበረ ሓደ ሃይማኖታዊ ስነ ስርዓት ኣብ ዝተቐርጸ ምስሊ ድማ፡ እዚ ኣሜሪካዊ ተኣምርን ፈውስን ከም ዝፍጽም እናተዛረበ ይርአይ። በዚ፡ ብዙሕ ነቐፌታ በጺሑዎ'ዩ።