ኣብ ሶማልያ ግዝኣት ኪስማዮ ኣብ ሓደ ሆቴል ብዝተፈጸመ መጥቃዕቲ 26 ሰባት ሞይቶም

ኣብ ደቡባዊ ሶማልያ ኣብ ሓደ ሆቴል ብዝተፈጸመ መጥቃዕቲ፡ 26 ሰባት ከምዝተቐተሉ ተገሊጹ።

በቲ መጥቃዕቲ ካብ ዝተቐትሉ፡ ካናዳዊት-ሶማልያዊት ውርይቲ ናይ ቴሌቪዥን ጋዜጠኛ ሆዳን ናላየህ ሓንቲ ከምዝኾነት ጸብጻባት ሓቢሮም።

ውጻእ መዓት ናይቲ መጥቃዕቲ ነጊሮምና ክብሉ ሰብ-መዚ ሶማልያ ከምዝብልዎ፤ እቲ መጥቃዕቲ፡ ነታጕ ዝጸዓነት መኪና ናብቲ ሆቴል ጥሒሳ ድሕሪ ምእታዋ ዘጋጠመ ርእሰ ቅትለታዊ መጥቃዕቲ እዩ።

ድሕሪ እቲ ምፍንጃር ድማ፡ ሓደ ዕጡቕ ውልቀሰብ ናብቲ ሆቴል ኣትዩ ብኣልማሚት ናብ ሰባት ክትኩስ ከምዝጀመረ ተገሊጹ።

በቲ መጥቃዕቲ ካብ መንጎ ዝተቐትሉ፡ ሰለስተ ኬንያውያን፣ ሰለስተ ታንዛንያውያን፣ ክልተ ኣመሪካውያንን ሓደ እንግሊዛውን ወጻእተኛታት'ውን ይርከብዎም።

ኣልሸባብ ነቲ መጥቃዕቲ ከምዝፈጸሞ ብምግላጽ ሓላፍነት ወሲዱ'ሎ።

ፖለቲከኛታትን ዓበይቲ ዓዲን ኣብቲ ሆቴል ኮይኖም ብዛዕባ እቲ ኣብ ቀረባ እዋን ክካየድ መደብ ተታሒዝሉ ዘሎ ከባብያዊ መረጻ ብዝምልከት ዘተ እናገበሩ ከምዝነበሩ ተገሊጹ።

መሰኻኽር ዓይኒ ከምዝብልዎ፡ ድሕሪ'ቲ ምፍንጃር ሽዑ ንሽዑ እዩ ኣድራጋ ጠያይቲ ተተኲሱ።

በዓል መዚ ጸጥታ ዝኾነ ኣብዲ ድሑል ንወኪል ዜና ፈረንሳይ ከምዝበሎ፡ ካብቶም ዝተቐተሉ ኣመሓዳሪ ሚኒስትር ነበር ናይቲ ከባቢን ሓጋግን ከምዝርከብዎም ሓቢሩ።

መራኸብቲ ሓፋሽን ማሕበር ጋዜጠኛታት ሶማልያን ድማ፡ ጓል 43 ዓመት ጋዜጠኛ ሆዳን ናላየህን በዓል ቤታን'ውን በቲ መጥቃዕቲ ከምዝተቐተሉ ገሊጾም እዮም።

ጋዜጠኛ ሆዳን ናላየህ ብዛዕባ ህይወት ሶማልያውያን ኣብ ውሽጢ ዓድን ወጻእን ኣድሂባ እያ መደባታ ተዳሉ ነይራ።

ቆልዓ ሽድሽተ ዓመት እንከላ ምስ ስድራኣ ናብ ካናዳ ዝተጉዓዘት ሆዳን ናላየህ፡ ኣብ ቀረባ እዋን እያ ናብ ሶማልያ ተመሊሳ።