ናይ ባዕሉ ዘርኢ ተባዕታይ ተጠቒሙ፡ 49 ኣንስቲ ዘጥነሰ ዶክተር

ኣብ ኔዘርላንድ፡ ሓደ በዓል ሞያ ስነ-ተዋልዶ ብናይ ባዕሉ ዘርኢ፡ 49 ኣንስቲ ከምዘጥነሰ ተገሊጹ።

እተን ኣንስቲ፡ ካብ ወለንተኛታት ለገስቲ፡ ዘርኢ ወዲ ተባዕታይ ደልየን ዝመጻ እኳ እንተነበራ፤ እቲ በዓል ሞያ ግን እተን ኣንስቲ እንተይፈለጣ፡ ናይ ባዕሉ ዘርኢ ብምጥቃም ክጠንሳ ገይሩወን።

ቅድሚ ክልተ ዓመታት ብሞት ዝተፈለየ እዚ ጃን ካርቦት ዝተብሃለ ዶክተር፡ ንኣስታት 30 ዓመታት ኣገልግሎት ዝሃበ እንትኾን፤ ውጽኢት ምርመራ ሰረት ዘርኢ (ዲ ኤን ኤ) ከም ዘረጋገጾ፡ ኣቦ 49 ቆልዑ እዩ።

ካብቶም 49 ቆልዑት ሓንቲ ዝኾነትን ን11 ዓመታት ወላዲኣ ክትደሊ ዝጸንሐትን ጆይ፡ ''ድሕሪ ሕዚ ኣቦይ መን እዩ ዝብል ሕቶ ተመሊሱለይ'ዩ። ኣቦይ ቅድሚ ክልተ ዓመት ሞይቱ እዩ'' ክትብል ነቲ ሓቂ ኣሚና ተቐቢላ።

ጠበቓ ናይተን ግዳያት፡ እቲ ጉዳይ ንነዊሕ እዋን ኣብ ቤት-ፍርዲ ከምዝጸንሐ ብምሕባር፡ እቲ ምርመራ ብቤት ፍርዲ ምርግጋጹ ከምዘሐጎሶ ገሊጹ።

እቲ ኣብ 89 ዓመቱ ኣብ 2017 ኣቆፃፅራ ኣውሮጳውያን ናብ ቤት ፍርዲ ቀሪቡ ዝነበረ ዶክተር፡ ኣብቲ እዋን ሓደ ንዕኡ ዝመስል ቆልዓ ከም ኣብነት ቀሪቡ ነይሩ።

እቲ ቤት ፍርዲ፡ ምርመራ ሰረት ዘርኢ ክግበር ኣዚዙ ዝነበረ እንትኾን፡ እቲ ውጽኢት ግን ዕላዊ ከይኮነ እዩ ጸኒሑ።