እዚ ውሑድ ዳታ ብምጥቃም፡ ጽሑፍ ጥራይ እተንብቡሉ መርበብ ሓበሬታ ቢቢሲ ትግርኛ እዩ። ምሉእ ኣሳእልን ቪድዮታትን ንምርኣይ ድማ ቀንዲ መርበብ ሓበሬታና ተጠቐሙ።
ኢትዮ-ቴሌኮም ኣብ ዝህቦ ኣገልግሎት ናይ ዋጋ ምንካይ ገይሩ
ብትሑት ጽሬትን ልዑል ኽፍሊት ኣገልግሎት ብምሕታትን ዝንቀፍ ኢትዮ ቴሌኮም ልዑል ናይ ታሪፍ ምንካይ ከምዝገበረ ኣፍሊጡ።
ዋና ፈጻሚት ስራሕ ኢትዮ-ቴሌኮም፡ ወይዘሮ ፍረህይወት ታምሩ ሎሚ ኣብ ዝሃበኦ መግለጺ፡ ኣብ ኣገልግሎት ኢንተርኔት ሞባይል (ሞባይል ዳታ) 43 ሚኢታዊት፣ ናይ ዉሽጢ ሃገር ጻዉዒት ስልኪ 40 ሚኢታዊት ከምኡ'ዉን ናይ ጽሑፍ መልእኽቲ (SMS) ናይ 43 ሚኢታዊት ምንካይ ገይሩ ኣሎ ኢለን።
እቲ ምንካይ ዋጋ ካብ ሎሚ መዓልቲ ጀሚሩ ተግባራዊ ዝኸዉን'ዩ።
ኣብ መርበብ ሓበሬታ ኢትዮ ቴሌኮም ዝወጽአ ሓበሬታ ከምዘመላኽቶ፡ ብደቂቕ 83 ሳንቲም ዝኽፈሎ ዝነበረ ጻዉዒት ስልኪ፡ ሕዚ 50 ሳንቲም ኾይኑ ኣሎ።
35 ሳንቲም ዝኽፈሎ ዝነበረ ሓደ ሜጋ ባይት፡ ሕዚ ናብ 20 ሳንቲም ወሪዱ ኣሎ ክብል ኢትዮ ቴሌ ኮም ገሊጹ።
