"ህወሓት ኣብ ውሽጢ ኢህወዴግ ሎሚ'ውን ኣብነታዊ ግደ ኣለዎ"

"ትግራይ ሕልፊ ተሰዊኡ ሕልፊ ዘይተረበሐን ክርባሕ ዘይደልን ህዝቢ እዩ" ኢሎም ዶ/ር ደብረ ጽዮን ኣብ መግለፂኦም::

ልዕና ህዝቢ ትግራይ ወይ ድማ ህወሓት እናተበሃለ ዝዝረብ ብፍላይ ኣብ ገምጋም ኢህወዴግ ብዘይምሕረት ተቐጥቂጡ እዩ::" ዝበሉ ዶክተር ደብረጽዮን፡ 'ኣብ ውሽጢ ኢህወዴግ ልዕልና ህወሓት ኣሎ' በሃልቲ ውድባት ብኣዴንን ኦህዴውን እሞ ድማ ኣባላት ፈፀምቲ ስራሕ ምንባሮም ኣዘኪሮም::ኣብ ትግራይ ከተማ መቐለ ኣብ ዝተኻየደ ኣኼባታት ማእከላይ ኮሚቴን ካድረታትን ህወሓት ዝተረኸቡ ካድረታትን ካልኦት ኣባላትን ኢህወዴግ፡ ልዕልነት ህወሓት ዝበሃል ዋጋ ዘረባ ከምዝኾነ ተመሊሶም ንነውድቦም ከምዘረድኡ ሓቢሮም::"ከምቲ ህወሓት ምእንተ ባዕሉ ክብል ንባዕሉ ፈቲሹ ዝገምገመ: ኣብቶም ካልኦት ውድባት ከምኡ ዝበለ ዘይምህላዉ ኣብ ኢህወዴግ ተገምጊሙ እዩ:: ገምጋም ህወሓት ብኣምሓርኛ ተፃሒፉ ተዋሂብዎም እዩ::

ሎሚ'ውን ኣብነት ኮይንኩምና ተባሂሉ ኣብ ቤት ምኽሪ ኢህወዴግ ተገምጊሙን ተገሊፁን እዩ" ኢሎም ዶ/ር ደብረ ጽዮን::"ስለ'ዚ ዝኾነ ይኹን ሰብ ንሃገር ዝረብሕ ዝሰረሐ ዘርኡ ኣይኮነን ዝረአ ልኡኹ ይፍፅም ኣሎ ዶ የለን እዩ እቲ ቁዉም ነገር፤ ፤ እቲ ዝረአ ልኡኹ ይፍፅም ኣሎ ዶ ዝብል እዩ" እውን ኢሎም::ካልእ ዶ/ር ደብረጽዮን ተሓቲቶም መልሲ ዝሃብሉ ጉዳይ ርክብ ኢትዮጵያን ኤርትራ እዩ::

እቲ ዝሓርፈፈ ርክብ ብሰላም መዕለቢ ክረክብ ነቲ ሓሳብ ዘበገሶ ህወሓት እዩ:: ቅድሚ ሰለስተ ዓመታት ኣትሒዙ ከምዘልዐሎ እውን ተዛሪቦም::"ውዕል ኣልጀርስ ቅድሚ ሎሚ ኢና ተቐቢልናዮ:: እቲ ኣብ ቀረባ እዋን ዝተዘራረብናሉ ነቲ ጉዳይ ክነበራብር ኢልና ኢና እምበር ሓዱሽ ነገር ኣይኮነን::" ኢሎም።

ብፍላይ ኣብ ኣፈፃፅማ ንምዝርራብ ከምዝተልዓለ ዝገለፁ ዶክተር ደብረጽዮን፡ "ጉዳይ ምጥራር ዶብ ጥራሕ እውን ኣይኮነን:: ከምቲ ዝበልናዮ ብደረጃ ፓኬጅ እዩ ዝረእ:: ልዕሊ ኩሉ ግና ብድልየት ክልቲኡ ኣብ ዶብ ዝርከብ ህዝቢ ክውሰን ከምዘለዎ ድማ ብፅንዓት ኢና ንኣምን" እውን ኢሎም::"ብዛዕባ እቲ ጉዳይ ተቐዳዲምካ ብመራኸብቲ ሓፋሽ ምግላፅ ግና ጌጋ እዩ ኢና ዝበልና" ይብሉ ኣቦ መንበር ህወሓት ዶ/ር ደብረጽዮን::

ይመልእዎ!

"ፕረዚደንት ኢሳይያስ ኣፈወርቂ ተወከልትና ክንሰድድ ኢና ምባሎም ብእወንታ ኢና ንርእዮ" ዝበሉ ዶ/ር ደብረጽዮን "ፅቡቕ ጀሚሮም ኣለዉ:: ንሕና እውን ንዛተ ንቀራረብ ኢና ዝበልና: ይመልእዎ" ኢሎም::'መንግስቲ ኤርትራ ንፃውዒት ኢትዮጵያ ሎሚ ዝተቐበለሉ ምኽንያት እንታይ ትግምቱ?' ተባሂሎም ዝተሓተቱ እቶም በዓል ስልጣን "እቲ ፀገም ነዊሕ ስለዝገበረ ንሳቶም እውን ረብሪቦም ይኾኑ:: ተጎዲእና ኣለና ናብ ዝብል በፂሖም ይኾኑ:: ናይ ክልቴና ህዝብን ሰራዊትን ሰላም ይደሊ:: መንእሰይ ናብ ባሕሪ እናኣተወ ይመውት ኣሎ:: ስለዚ ፀቕጥን ድልየትን ስለዘሎ እዩ:: ካልእ ምኽንያት የብሉን" ብምባል መልሲ ሂቦም::

"ጌም ኦቨር"

ኢሳይያስ ኣፈወርቂ ንዝተጠቐምሉ "ጌም ኦቨር" ዝብል ቃል ዶ/ር ደብረፅዮን ተዛሪቦምሉ እዮም::'ጌም ኦቨር'ዝበልዎ እታ ዓዲ ስለዘይተረድእዋ ከምዝኾነ ገሊፆም:: "ሕገ መንግስታዊ ስርዓት ዘለዎ: ኣብ መንጎ ፖለቲካዊ ውድባት ውድድር ዝግበረሉ ዓዲ እዩ:: ሕዚ እውን ነታ ሃገር ዝመርሕ ዘሎ ኢህወዴግ እዩ:: መን ዶ ቀይርዎ እዩ? ሎሚ ኦሮሞ ኮይኑ ኣሎ ቅድሚኡ ድማ ካብ ደቡብ ነይሩ::" ክብሉ ተዛሪቦም።

"ፅባሕ እውን ሶማል ኢትዮጵያ ናብ ኢህውዴግ እንተኣትዩ ክመርሕ ይኽእል እዩ:: ስለዚ እዛ ዓዲ እዚኣስ ናይ ኩሉ እያ:: ኢህወዴግ ተዝሰዓር እኳስ ጌም ኦቨር ኣይበሃልን:: ስርዓት ሃኒፅና ኢና" ኢሎም::

ዶ/ር ኣብዪ ኣሕመድ ብዛዕባ ዝተፈትሑ ሰባት ኣብ ሃገራዊ ባይቶ እንትዛረቡ፡ መንግስቲ ብመደብ ይቅርታ ንቶም ብምፍጣር ራዕዲ ዝተኸሰሱን ዝተፈረዱን ከምዝፈተሐ ምግላፆም ይዝከር:: እኳ ደኣስ መንግስቲ እዩ ፈጣሪ ራዕዲ ኢሎም እዮም::

እቲ ዝወፀ ሕጊ ክሳብ ዘይተመሓየሸ ክትግበር ግድን እናሃለወ ተግባርን ዘረባን እቶም ቀዳማይ ሚኒስትር ግቡእን ሕጋውን ድዩ ንዝብል ሕቶ ከምዚ ዝስዕብ መልሲ ሂቦም::"ንሕና ከም ኢህወዴግ ብፖለቲካዊ መርገፂኦም ተይኮነስ ፖለቲከኛታት ኮይኖም ብገበን ተኸሲሶም ዝተኣሰሩ ንፍታሕ ኢልና ኢና:: ሰብ ዝቐተለ ይፈታሕ ግን ኣይበልናን::" ኢሎም።

ዶ/ር ኣብዪ ናይ ኣፈፃፅማ ፀገም እንተሃልይዎ ክንርእዮ ኢና ዝብሎ ዝነበረ እውን ነዚ እዩ:: ህወሓት እዚ ጌጋ እዩ ኣብ ቤት ምኽሪ ኢህወዴግ ክረአ ኣለዎ ዝበለሉ ምኽንያት እውን ግቡእ ስለዘይኮነ እዩ:: ልዕልነት ሕጊ ክኽበር ግድን እዩ::

"ንኸም እኒ ዶ/ር መረራ ዝበሉ ፖለቲካዊ መራሕቲ ብይቕሬታ ምፍታሕ ንፖለቲካና እውን ፅቡቕ እዩ ኢልና ዝወሰንናዮ እዩ ተተግቢሩ:: ኣባላት ፖሊስን ካልኦትን ዝቐተለ ይፈታሕ ግን ኣይበልናን::" ክብሉ ኣረዲኦም።

"እዚ ብስም ውሳነ ኢህወዴግ ክዝረብ የብሉን ብዝግባእ ክፍተሽ ኣለዎ ኢልና ኣለና" እንትብሉ ፀቕጢ ሂቦም ተዛሪቦምሉ::

ህወሓት ኣብ ስራሕ እምበር ኣብ ዘረባ የለን

ህወሓት ኣብ ኢህወዴግ ዝነበሮ ተቐባልነት ይወርድ ከምዘሎ ይዝረብ::ሓዱሽ መራሒ እቲ ውድብ ዘሳልጦም ዘለዉ ገለ ስጉምታት ካብ ፖለቲካዊ እምነት ኢህወዴግ ዝፍልፍል ዘሎ ኣይመስልን ዝብሉ ወገናት ኣለዉ:: ብስሩ መራሕቲ ህወሓት ነቲ ህልው ሃገራዊ ባይታ ብናይ ቀደም መነፅር እዮም ዝርእይዎ ክሳብ ሎሚ ኣይተለወጡን ዝብሉ ነቐፍቲ እውን ኣለዉ:: ኣብዚ ዶ/ር ደብረጽዮን ነዊሕ ተዛሪቦም እዮም::"ኣብ መስመር ህወሓት እኮ ዝመፀ ለውጢ የለን:: ኣብቲ ሃገር ህውከት ኣሎ ኢና ዝበልና እምበር ኣብ መስመርና እኮ ህውከት የለን:: ህወሓት ነብሱ ብምፍታሽ ኣብ ውሽጢ ኢህወዴግ ኣብ ቁፅሪ ሓደ ተቐሚጡ::" ዝብል መብርሂ ሂቦም።

"ንሕና ንሰርሕ እምበር ኣይንዛረብን ዘለና:: ስለዚ ንደፍእ ኢና ዘለና:: ስለዚ ህወሓት ብፖለቲካዊ መለክዒ ምእንትኡን ምእንቲ ህዝቢ ትግራይን ኢሉ ተጠናኺሩ እዩ ዝቕፅል ዘሎ" ብምባል ህወሓት ብለውጢ ከምዝኣምንን ውፅኢት ለውጢ እውን ፅቡቕ ተስፋ ወሃቢ ዓወት ይምዝገብ ምህላዉ ገሊፆም:: ኣብ መወዳእታ ኣብ ቀረባ እዋን ዶ/ር ኣብዪ ኣሕመድ "ህወሓትን ህዝቢ ትግራይን በበይኖም እዮም" ምባሎም ከመይ ርኢኹምዎ ተባሂሎም ተሓቲቶም::"ፖለቲካዊ ውድብን ህዝብን ነንበይኑ ከምዝኾነ ርዱእ እዩ:: ናይ ህወሓትን ህዝቢ ትግራይን ርክብ ግና ብደምን ዓፅምን ዝተወሃሃደ ቤተሰባዊ ርክብ እዩ ዘሎ:: ርክብ ህወሓትን ህዝቢ ትግራይን ከም ታራ ርክብ ኣይረአን:: ህዝቢ ትግራይ ደቁ ሂብሉ እዩ:: ትማሊ ዝተዓወተ ዕጥቃዊ ቃልሲ ብተሳትፎ ህዝቢ እምበር ብህወሓት ጥራሕ ኣይኮነን:: ስለዚ ከም ክልተ ኣካላት ምርኣይ ይኸብድ እዩ:: እዚ ግና ዘኹሪ ኣይኮንን" ኢሎም።ኣብ ኣዲስ ኣበባ ብዛዕባ ዝተፀወዐ ሰልፊ ድጋፍ ንዶ/ር ኣብዪ ኣሕመድ ኣመልኪቱ ንዝተሓተትዎ እንትምልሱ ድማ "ከም ሃገርና ንሰምዖ ኣለና:: በዓል መን እዮም ኣበጊሶምዎ ምፍላጡ ኣየግድሰናን:: ህዝቢ ምድጋፍን ምቅዋምን መሰሉ እዩ:: ጥራሕ ሰላማዊ ክኸውን እዩ ዝድለ" ዝብል ሓፂር መልሲ ሂቦም::