ኬንያ ሺሻ ኣብ ጥቕሚ ንከይውዕል ኣጊዳ

ኬንያ ካብ 19 ታሕሳስ 2010 ዓ.ም ጀሚሩ ሺሻ ናብ ዓዲ ምእታው፣ ምሻጥን ምጥቃምን ዝኽልክል ሓድሽ ሕጊ ተግባራዊ ገይራ።

ሚኒስትር ጥዕና ኬንያ ክሌዎፖ ማይሉ ከምዝገለፅዎ፡ ሺሻ እንትጥቀሙን ኣምፂኦም ኽሸጡን ዝተሓዙ ውልቀ ሰባት፡ 50 ሸሕ ናይ ኬንያ ሽልንግን (500 ዶላር) ካብ 6 ወርሒ ዘይንእስ ማእሰርትን ይቕፅዑ።

ኬንያ ሺሻ ብምእጋድ ካብ ታንዛንያን ሩዋንዳን ቀፂላ፡ ሳልሰይቲ ሃገር ኮይና ኣላ።

"ሽሻ ዝኸልከልና፡ ኣብ ልዕሊ ጥዕና ማሕበረሰብ ቅልውላው ስለዘብፅሕ እዩ" ብምባል ድማ እቶም ሚኒስትር ኣገንዚቦም።

ኣብ ኬንያ ብርክት ዝበሉ ተጠቀምቲ ሺሻ ዘለዉ እንትኾኑ፡ እዚ ሓድሽ ሕጊ ተግባራዊ ምዃኑ ስዒቡ ብርክት ዝበሉ ኬንያውያን ኣብ መረባ ትዊተሮም ተዘራሪቦምሉ።

ውድብ ጥዕና ዓለም ኣብ ቀረባ እዋን ሺሻ ምትካኽ ንጥዕና ከምዝጎድእ ዝሕብር መፅናዕቲ ከመዘውፅአ ይዝከር።

ፓኪስታን፣ ዮርዳኖስ፣ ሲንጋፖርን ስዑድ ዓረብን ሺሻ ካብ ሞንጎ ዝኸልከላ ሃገራት ዓለም እየን።