ካቢነ ስታርመር ተገሚዑ፤ ምኒስተራት ዘልዕልዎ ዘለዉ ወሳኒ ሕቶ

ብሰንኪ መጻኢ ቀዳማይ ምኒስተር ብሪጣንያ ዘንቀሎ ኣብ ላዕለዋይ መንግስቲ ዘጋጠመ ምክፍፋል፡ ካቢነ ምኒስተራት ሎሚ ንግሆ ብወግዒ ክእከብ እዩ፤ ብርክት ዝበሉ ምኒስተራት ሰር ከር ስታርመር ካብ ስልጣኑ ዝወርደሉ ግዜ ከቐምጥ ይጽውዑ ኣለዉ።

እዚኦም፡ ምኒስተር ዘቤታዊ ጉዳያት ሻባና ማሕሙድ እትርከቦም ምኒስተራት ኰይኖም፡ እቲ ቀዳማይ ምኒስተር ካብ ስልጣን ዝወርደሉ ሰሌዳ ግዜ ከቐምጥ ኣለዎ ድዩ ኣይግባእን ካብ መንጐ ዝብሉ ውሑዳት ኣባላት ካቢነ ምኒስተራት ምዃኖም ተፈሊጡ።

ሽዱሽተ ሓገዝቲ ምኒስተራት - ዝተሓተ ደረጃ መንግስቲ ዘለዎም - ስታርመር ስራሕ ደዉ ከብል ወይ ንዕኡ ንምትካእ ዘኽእል ግዜ ገደብ ከቐምጥ ድሕሪ ምጽውዖም ተተኪኦም ኣለዉ።

ከምኡ'ውን ቍጽሪ ናይቶም ሰር ኬር ካብ ስልጣኑ ክወርድ ዝጽውዑ ኣባላት ባይቶ ዕዮ 72 በጺሑ ኣሎ።

ኣብ ዝርዝር ናይቶም ብሰኑይ ካብ ስልጣኖም ዝተኣለዩ ሓገዝቲ ምኒስተራት፡ ጆ ሞሪስ፣ ውልቃዊ ጸሓፊ ባይቶ (ፒፒኤስ) ናይቲ ንመሪሕነት ክወዳደር ዝኽእል ጸሓፊ ጥዕና ዌስ ስትሪቲን ዘጠቓለለ እዩ።

ሞሪስ፡ እቲ ቀዳማይ ምኒስተር "ድሕሪ ሕጂ እምነት ህዝቢ የብሉን፡" ኢሉ።

ሜላኒ ዋርድ፡ ውልቃዊ ጸሓፊ ባይቶ ምክትል ቀዳማይ ምኒስተር ደቪድ ላሚ፡ ናውሻባ ካን፡ ውልቃዊ ጸሓፊ ባይቶ ንምኒስተር ቤት ጽሕፈት ካቢነ ምኒስተራት ዳረን ጆንስ፡ ከምኡ'ውን ቶም ሩትላንድ፡ ውልቃዊ ጸሓፊት ከባቢ ኤማ ረይኖልድስ እውን ካብ ስልጣኖም ወሪዶም።

ካልኦት ሰር ኬር ካብ ስልጣን ክወርድ ዝጽውዑ ሰብ መዚ'ውን ኣለዉ። እቲ ቀዳማይ ምኒስተር ኣቐዲሙ ኣብ ዝሃቦ መግለጺ፡ እቶም "ተጠራጠርቲ" ከም ዝተጋገዩ ብምግላጽ ስርሑ ደው ከም ዘየብል ተዛሪቡ ነይሩ።

መንግስቲ ጌጋታት ከም ዝፈጸመ'ኳ እንተኣመነ፡ ኣብ "ዓበይቲ ፖለቲካዊ ምርጫታት፡" ግን ከም ዘይተጋገየ ገሊጹ።

እንተዀነ፡ ትማሊ እቲ ቀዳማይ ምኒስተር ካብ ስርሑ ክወርድ ዝግበር ጸቕጢ ሓይሉ ውዒሉ። ብተወሳኺ ኣባላት የማናዊ ሰልፊ እታ ሃገር'ውን ስታርመር ክወርድ ይጽውዑ'ዮም ዘለዉ።

ኣብ መላእ ዓዲ እንግሊዝ ኣብ ዝተኻየደ ከባብያዊ መረጻ ሰልፊ ዕዮ ዳርጋ 1500 ኣባላት ባይቶ ምስ ሰኣነ፡ ደገፍ ንሪፎርም ዓባይ ብሪጣንያ ወሰኽ ምስ ተርኣየ፡ ሰልፊ ግሪን'ውን ኣብ ለንደንን ካልኦት ከተማታትን ደገፍ ብምርካቡ፡ ኣብ ልዕሊ ሰር ኬር ጸቕጢ እናሓየለ መጺኡ'ዩ።

ሰልፊ ሌበር ኣብታ ንሓደ ዘመን ፖለቲካዊ ዕብለላ ዘስተማቐረላ ዌልስ እውን ካብ ስልጣን ተባሪሩ፡ ካብ 129 መናብር ባይቶ ስኮትላንድ ድማ 17 ጥራይ ሒዙ፡ እዚ ድማ ኣብ ውጽኢት ምርጫ ስኮትላንድ እቲ ዝኸፍአ እዩ።

ሞሪስ ኣብ ዝሃቦ መግለጺ፡ ኣባላት ባይቶን ሕጹያትን ሰልፊ ዕዮ "ኣብ መወዳእታ ብዘይወዓሉዎ ውሳነታት ተነቒፎም፡" ኢሉ።

"ዋላ'ኳ እቲ ቀዳማይ ምኒስተር ዝከኣሎ ጻዕሪ እንተገበረ፡ መረጽቲ ነቲ ዘድመጽዎ ለውጢ ክመርሖ እዩ ኢሎም ኣይቅበሉን'ዮም፡" ይብል እቲ ኣባል ባይቶ ሄክስሃም።

"እምነት ህዝቢ ዳግማይ ንምርካብን መንግስቲ ዝኣተዎ መብጽዓ ንኽፍጽም ዘኽእል ሓድሽ መራሒ ኣብ ቦታኡ ከም ዘሎ ንምርግጋጽ፡ እቲ ቀዳማይ ምኒስተር ንረብሓ ሃገርን ውድብን ክብል ካብ ስልጣኑ ዝወርደሉ ሰሌ ግዜ ከቐምጥ ኣለዎ፡" ይብል።

ኣባል ባይቶ ምብራቕ ዎርዚንግን ሾርሃምን ሩትላንድ፡ "እቲ ቀዳማይ ምኒስተር ኣብ ውሽጢ ባይቶ ሰልፊ ዕዮ ጥራይ ዘይኰነስ ኣብ መላእ ሃገር ስልጣን ከም ዝሰኣነን ዳግማይ ክረኽቦ ከም ዘይክእልን ንጹር'ዩ፡" ኢሉ።

ኣባል ባይቶ ጊሊንግሃምን ራይንሃምን ዝዀነት ካን፡ እቲ ቀዳማይ ምኒስተር "እምነት ህዝቢ ስኢኑ'ዩ፤ እናወደቕና ኣብ ጎድኑ ደው ክብል ኣይኰንኩን ናብ ፖለቲካ ኣትየ። ሕጂ ንጹር ናይ ለውጢ ኣንፈት የድልየና ኣሎ፤ ጸወታ ኣየድልን፡" ትብል።

"እምነት ህዝቢ ዳግም ንምርካብን ንዝመረጸና ህዝቢ ብሪጣንያ ዝሓሸ መጻኢ ንኽንሃንጽን፡ ሓድሽ መሪሕነት ክህሉ ይጽውዕ ኣለኹ።"

ተራ ውልቃዊ ጸሓፊ ባይቶ፡ ዘይክፈሎ ስራሕ ኰይኑ ከም ተሓጋጋዚ ኰይኑ ክሰርሕ ብምኒስተር ይምዘዝ።