ኬቨን ማካርቲ ኣፈ ጉባኤ ባይቶ ኣሜሪካ ኮይኑ ተመሪጹ

ኬቨን ማካርቲ ኣፈ ጉባኤ ባይቶ ወከልቲ ህዝቢ ኣሜሪካ ኮይኑ ተመሪጹ።

ዋላ'ኳ ሰልፉ ኣብቲ ባይቶ ዝበዝሐ ድምጺ እንተሃለዎ፡ ማካርቲ ኣብ መወዳእታ ድሕሪ 15 ዙር መረጻ እዩ ተዓዊቱ።

ስራሕ እቲ ኣፈ ጉባኤ ኣጀንዳ ባይቶ የቐምጥን ንስራሕ ሓጋጊ ኣካል ይከታተልን።

እዚ ጽፍሒ: ኣብ መስርዕ ፕረዚደንትነት ድሕሪ ምክትል ፕረዚደንት ይስራዕ።

ማካርቲ ዓወት ድሕሪ ምርግጋጹ፡ "ድሕሪ እዚ ሰሙን ሓደ ነገር ንጹር ክኸውን ተስፋ እገብር፡ ተስፋ ኣይቆርጽን እየ። ንዓኻትኩም ህዝቢ ኣመሪካ ድማ ተስፋ ኣይቆርጽን እየ" ክብል ኣብ ትዊተር ጽሒፉ።

ፕረዚደንት ኣሜሪካ ጆ ባይደን ንሚስተር ማካርቲ እንቋዕ ሓጎሰካ ብምባል ምስ ሰልፊ ሪፓብሊካን ንምትሕብባር ብሃንቀውታ ከም ዝጽበዮ ገሊጹ።

"ህዝቢ ኣሜሪካ፡ መራሕቱ ልዕሊኩሉ ድሌታቱ ብዘቐምጥ መንገዲ ክመሓደሩ እዩ ዝጽበ፡ ሕጂ ድማ ንሱ እዩ ክንገብሮ ዘለና" ኢሉ።

ሪፓብሊካን ድሮ ኣብ ልዕሊ ስድራቤታዊ ንግዳዊ ርክባትን ምምሕዳርን ባይደን መርመራታት ክጅምሩ ቃል ኣትዮም ኣለዉ።

መበል 13 መረጻ ምሃብ ምስተናወሐ፡ ማካርቲ ኣብ ዝቕጽል ዙርያ ኣፈ-ጉባኤ ንኽወስድ "ድምጺ ክህልዎ'ዩ" ክብል ንጋዜጠኛታት ኣጽኒዑ።

ኣብ መበል 12 ዙር ድምጺ ኣብ ዘጋጠመ ዘደንቕ ለውጢ፡ ማካርቲ ን14 ሪፓብሊካን ድምጾም ክህብዎ ከእምኖም ክኢሉ።

እቲ ኣባል ኮንግረስ ካሊፎርንያ ግን ገና ንምዕዋት ካብቲ ዘድልዮ 217 ድምጺ ሰለስተ ኣይረኸበን ነይሩ፡ ኣብ ቅልውላውን ድራማውን ትርኢታት ዝመልኦ መበል 14 መረጻ'ውን ክዕወት ኣይከኣለን።

ማካርቲ ነቶም ተቓወምቲ ኣብታ ኣብቲ ባይቶ ብዛዕባ ሕጊ ክትዕ ዝግበረሉ ውዕላት ዘቐምጥ ጽልዋ ዘለዎ ኮሚተ ሕግታት መንበር ምሃብ ሓዊሱ ዝፈላለየ ሕድገታት ኣቕሪቡሎም እዩ።

ብተወሳኺ ነቲ ኣፈኛ ባይቶ ካብ ስልጣኑ ክእለ ድዩ ኣይኮነን ዝብል መረጻ ንምብጋስ ዝዓለመ ደረት ናብ ሓደ ኣባል ባይቶ ጥራይ ክወርድ ተሰማሚዑ፡ እዚ ድማ ድሕሪ ዓወት ማካርቲ እውን እንተኾነ ጥምረት ሪፓብሊካን ብቐሊሉ ዳግማይ ክስበር ክገብር ዝኽእል እዩ።

ላዕለዎት ኣባላት ባይቶ ሰልፊ ዲሞክራት፡ ማካርቲ ስልጣን ንሓደ ጽንፈኛ ክንፊ ሰልፉ ኣሕሊፉ ክብሉ ከሲሶም።

ነቲ ምትፍናን ምስቲ ልክዕ ቅድሚ ክልተ ዓመት ኣብ ካፒቶል ሂል ብደገፍቲ ትራምፕ ዝተፈጸመ ናዕቢ ኣመሳሲሎምዎ።

ከምኡ’ውን ኣባል ኮንግረስ ቨርጂንያ ዶን ቤየር ነቲ ድሕሪ መበል 14 መረጻ ኣብ መንጎ ሪፓብሊካን ዝተራእየ ቁጥዐ ዝመልኦ ትርኢታት ጠቒሱ።

"እዚ መስርሕ ኣብ ባይቶ ብዓመጽ ምፍርራሕ ምውድኡ ዘየረጋግእ እዩ" ኢሉ። "ምናልባት ነቲ ውጽኢት ኣይጸለወን ይኸውን፡ እዚ ግን ጉዳይ ህዝቢ ንምክያድ ዝሕግዝ መንገዲ ኣይኮነን። እዚ ምስ ተዛዘመ ነዊሕ ጸኒሑ ጸልማትን ዘሕዝንን ህሞት ክዝክረና ይኽእል'ዩ።"

እቶም ዲሞክራትስ ንመራሒኦም ኒውዮርክ ዝኾነ ሓኪም ጀፍሪስ ብሓደ ድምጺ ምድማጾም ቀጺሎም ነይሮም፣ እዚ ድማ ኣብ ኮንግረስ ንፈለማ እዋን ሰልፊ ዝመርሐ ጸሊም ኣመሪካዊ እዩ።

ዓርቢ ቁጽሪ ድምጺ ማካርቲ ብሓቂ ካብ ድምጺ ጀፍሪስ ብሓደ ዝበለጸሉ ናይ መጀመርታ መዓልቲ እያ ነይራ።

ካብ 1860 ጀሚሩ ኣብ ህንጸት ኲናት ሓድሕድ ኣመሪካ ታሕተዋይ ባይቶ ኮንግረስ ኣፈኛ ንምምራጽ ክንድ’ዚ ዝኣክል ዙር መረጻ ኣየካየደን። ሽዑ 44 ዙር መረጻ ተኻይዱ ነይሩ።