ప్రపంచంలో ఏ ప్రాంత ప్రజలు ఎక్కువ కాలం జీవిస్తారు? ఆ రహస్యమేంటి?

లుసిల్లే రాండన్ జనవరిలో తుది శ్వాస విడిచారు. అప్పటికామె వయసు 118 ఏళ్లు. ప్రపంచంలోనే అత్యంత వృద్ధురాలిగా ఆమె పేరుందామెకు.

ఫ్రాన్స్‌కు చెందిన క్రైస్తవ సన్యాసిని లుసిల్లే స్థానికంగా సిస్టర్ అండ్రేగా సుపరిచితం. తన జీవితంలో రెండు ప్రపంచ యుద్ధాలను చూశారామె.

చంద్రుడిపై మనిషి కాలు మోపినప్పటి కాలాన్ని, ప్రస్తుత డిజిటల్ యుగాన్ని ఆమె కళ్లారా చూశారు.

మనిషి సగటు ఆయుర్ధాయం 73.4 సంవత్సరాలుగా ఉన్న ప్రాంతంలో లుసిల్లే నివసిస్తున్నారు. అందుకే ఆమె స్టోరీ కాస్త ప్రత్యేకం.

ప్రజల జీవన కాలం పెరుగుతోంది. ఐక్యరాజ్య సమితి అంచనాల ప్రకారం ఈ శతాబ్దం మధ్య కాలం నాటికి ప్రజల సగటు ఆయుర్ధాయం 77 ఏళ్లకి చేరనుంది.

ప్రజల జీవన కాలం పెరుగుతుండగా.. పుట్టే వారి సంఖ్య తగ్గిపోతోంది. ఈ పరిస్థితిలో, వృద్ధుల జనాభా పెరుగుతోంది.

ప్రపంచంలో అయిదేళ్ల లోపున్న పిల్లల జనాభా కంటే 65 ఏళ్లు పైబడిన వారి జనాభా రెండింతలు ఎక్కువగా ఉంది.

అయితే, ప్రపంచంలో అన్ని దేశాల్లో పరిస్థితి ఇలా లేదు.

మోనాకో దేశంలో ప్రజల సగటు ఆయుర్ధాయం 87 ఏళ్లు. ఆఫ్రికాలో అతి పేద దేశమైన రిపబ్లిక్ ఆఫ్ చాడ్ ప్రజల సగటు వయసు కేవలం 53 ఏళ్లే.

మోనాకో తర్వాత ప్రజలు ఎక్కువ కాలం జీవించే దేశాల్లో చైనా పాలనలో ఉన్న హాంకాంగ్ రెండో స్థానంలో ఉంది. మకావు మూడు, జపాన్ నాలుగో స్థానంలో ఉన్నాయి.

ప్రపంచంలో శక్తిమంతమైన దేశాల్లో, జపాన్‌లోనే ప్రజల సగటు వయసు ఎక్కువగా ఉంది.

ఐక్యరాజ్యసమితి విడుదల చేసిన వరల్డ్ పాపులేషన్ ప్రాస్పెక్ట్స్ రిపోర్టు ప్రకారం, సగటు ఆయుర్ధాయం అధికంగా ఉన్న మిగిలిన దేశాల జాబితాలో స్విట్జర్లాండ్, సింగపూర్, ఇటలీ, దక్షిణ కొరియా, స్పెయిన్‌ దేశాలు లాంటి దేశాలు ఉన్నాయి.

కరోనా మహమ్మారిని, ప్రపంచ యుద్ధాలను పక్కన పెడితే, రెండు వందల ఏళ్లకు పైగా ప్రపంచవ్యాప్తంగా ప్రజల సగటు ఆయుర్ధాయం పెరుగుతూ ఉంది.

వ్యాక్సిన్లు, యాంటీబయాటిక్స్, మెరుగైన ఔషధాల అభివృద్ధితో పాటు.. ప్రజలకు సురక్షితమైన జీవన విధానాలను, సరిపడా ఆహారాన్ని అందిస్తుండటంతో ప్రజల సగటు జీవన కాలం పెరుగుతోంది.

సరియైన నిర్ణయాలు, మెరుగైన ఫలితాలు

ప్రజల ఆయుర్ధాయం పెంచేందుకు జన్యుపరమైన అంశాలతో పాటు, ఇతర అంశాలు కూడా కీలక పాత్ర పోషిస్తున్నాయి.

ఉదాహరణకు, ఒక వ్యక్తి ఎక్కడ జన్మించాడు, ఆయన జీవన పరిస్థితులు ఏమిటి? ఒక వ్యక్తిగా వారు తమ జీవితంలో ఎలాంటి నిర్ణయాలు తీసుకున్నారు? వంటివి సగటు ఆయుర్ధాయం పెంచేందుకు కీలకంగా ఉంటున్నాయి.

మెరుగైన వైద్య విధానాలు, మంచి ఆహారం మాత్రమే కాకుండా.. పైన పేర్కొన్న ఈ నిర్ణయాలు కూడా ప్రజలు ఎక్కువ కాలం జీవించేందుకు ముఖ్యమైనవిగా ఉంటున్నాయని నిపుణులంటున్నారు. వీటిని స్మార్ట్ నిర్ణయాలుగా పేర్కొంటున్నారు.

ముఖ్యంగా సమతుల్యమైన ఆహారాన్ని తీసుకోవడం, సరిపడా నిద్రపోవడం, ఒత్తిడిని అధిగమించడం, వ్యాయామం చేయడం వంటివి వ్యక్తి సగటు జీవన కాలాన్ని పెంచుతున్నాయి.

సగటు ఆయుర్ధాయం అత్యధికంగా ఉండి టాప్‌లో ఉన్న దేశాల్లో ఒక విషయం కామన్‌గా ఉంటోంది. అదేమిటంటే ఈ దేశాల ఆదాయం ఎక్కువగా ఉండటం.

అలాగే మరో విషయమేమిటంటే, ఈ దేశాల పరిమాణం కూడా ముఖ్య భూమిక వహిస్తోంది.

ఈ జాబితాలోని మోనాకో, లిక్టెంస్టెయిన్ వంటి దేశాలు చాలా చిన్నవని ఐక్యరాజ్య సమితి జనాభా అంచనాల విభాగపు హెడ్ పాట్రిక్ గెర్లాండ్ అన్నారు. ఇతర దేశాల్లో మాదిరి ఆ దేశ జనాభాల్లో ఎలాంటి వైవిధ్యం లేదన్నారు.

‘‘ఈ దేశాలు చూడటానికి చాలా ప్రత్యేకమైనవి. వాస్తవంగా ఈ దేశ జనాభా ఇతర దేశాలతో పోలిస్తే చాలా భిన్నంగా ఉంటోంది. ఇతర దేశాల్లో వివిధ రకాల జనాభాల కలయికను మనం చూడొచ్చు. కానీ ఇక్కడ అలా ఉండదు’’ అని ఆయన అన్నారు.

‘‘అత్యంత ఉన్నతమైన జీవన ప్రమాణాలు ఈ దేశాల్లో ఉంటాయి. వైద్య, విద్య సౌకర్యాలు చాలా బాగుంటాయి’’ అని పాట్రిక్ బీబీసీతో చెప్పారు.

పలు దేశాల్లో మనం వివిధ రకాల తేడాలను గమనించవచ్చు. ఒకే దేశంలో కూడా మనం చాలా కేసుల్లో భిన్నత్వాన్ని చూడొచ్చు. ముఖ్యంగా ఎక్కడైతే అసమతుల్యత అత్యధికంగా ఉంటుందో అక్కడ వివిధ సామాజిక వర్గాల్లో సగటు ఆయుర్ధాయంలో కూడా తేడాలుంటున్నాయి.

యూరప్‌లో చాలా దేశాల్లో వయసు 80కి పైబడిన ప్రజలు ఎక్కువగా ఉన్నారని పాట్రిక్ అన్నారు. అక్కడ సగటు ఆయుర్ధాయం అధికంగా ఉందని చెప్పారు.

వృద్ధులకు వరంగా ‘బ్లూ జోన్’

ప్రపంచ జనాభాలో చాలా చిన్న భాగం ‘బ్లూ జోన్’. ఇతరులతో పోలిస్తే ఇక్కడి ప్రజలు చాలా ఎక్కువ కాలం నివసిస్తున్నారు.

కొన్ని దశాబ్దాల క్రితం, జనాభా గణాంకాల నిపుణులు మైఖెల్ పుల్లాన్, వృద్ధ వైద్య నిపుణులు జాని పీస్‌లు ప్రపంచంలో అత్యంత వృద్ధులు ఎక్కడ నివసిస్తున్నారో తెలుసుకోవడానికి ఒక ప్రాజెక్ట్ ప్రారంభించారు.

వందేళ్ల వరకు జీవించిన వారు ఎక్కువగా ఏ ప్రాంతాల్లో, నగరాల్లో నివసిస్తున్నారో గుర్తించారు. ఆ ప్రాంతాలను బ్లూ మార్కర్‌తో మ్యాప్‌లో సర్కిల్ చేశారు.

మ్యాప్‌లో నీలం రంగులో మార్క్ చేసిన ప్రాంతాలను బార్బాజాగా వారు గుర్తించారు. ఇది ఇటలీ ఆధీనంలో ఉన్న సార్డినీయా దీవిలో ఉంది. దీన్ని ‘బ్లూ జోన్’ వారు పేర్కొన్నారు.

అప్పటి నుంచి, అత్యుత్తమ జీవన ప్రమాణాలతో ప్రజలు ఎక్కడైతే ఎక్కువ కాలం జీవిస్తారో ఆ ప్రాంతాలను బ్లూ జోన్‌లుగా పిలుస్తున్నారు.

ఈ అధ్యయనాన్ని ఆధారంగా చేసుకుని, జర్నలిస్ట్ డాన్ బ్యూట్నర్ కూడా ఒక నిపుణుల బృందంతో ఇలాంటి కమ్యూనిటీలు ఇంకెక్కడ ఉన్నాయో ఇన్వెస్టిగేట్ చేశారు.

సార్డినీయా కాకుండా మరో నాలుగు బ్లూ జోన్లను వారు గుర్తించారు. ఇవి జపాన్‌లోని ఒకినావా, కోస్టా రికాలో నికోయా, గ్రీస్‌లోని ఐకారియా ద్వీపం, కాలిఫోర్నియాలోని లోమా లిండా అడ్వెంటిస్ట్ కమ్యూనిటీలు.

ప్రజలు ఎక్కువ కాలం జీవించేందుకు జన్యుపరమైన కారణాలు కూడా కీలకంగా ఉన్నాయడంలో ఎలాంటి సందేహం లేదు.

అయితే, బ్లూ జోన్లను ప్రభావితం చేస్తున్న ఇతర అంశాలేమిటన్నది అర్థం చేసుకునేందుకు వైద్యుల బృందం, ఇతర రంగాలకు చెందిన శాస్త్రవేత్తలు పనిచేస్తున్నారు.

ఈ సమాచారాన్ని సేకరించేందుకు బ్యూట్నర్ ప్రపంచంలో వివిధ ప్రాంతాలకు వెళ్లారు.

2008లో ‘బ్లూ జోన్స్: సుదీర్ఘ కాలం జీవిస్తున్న ప్రజల నుంచి ఎక్కువ కాలం జీవించేందుకు నేర్చుకోవాల్సిన పాఠాలు’ అనే పేరుతో ఒక పుస్తకాన్ని ప్రచురించారు.

అప్పటి నుంచి, దీన్ని ప్రజల్లోకి తీసుకెళ్లేందుకు తన జీవితాన్ని అంకితం చేశారు.

కమ్యూనిటీలపై బ్యూట్నర్, ఆయన బృందం చేపట్టిన అధ్యయనంలో కొన్ని సారూప్యతలను గుర్తించారు. వీటి ఆధారంగా, ప్రపంచంలో ఇతర ప్రాంతాల ప్రజలతో పోలిస్తే ఈ కమ్యూనిటీల్లో ప్రజలు ఎక్కువ కాలం, మెరుగైన జీవితాన్ని ఎలా బతకగలుగుతున్నారని ఆయన వివరించారు.

ఆయన గుర్తించిన కొన్ని సారూప్యతలు.....

ఒంటరిగా ఉండట్లేదు

ఆర్థిక పరిస్థితులు, అక్కడి ప్రజల డీఎన్ఏలో ఉన్న నైపుణ్యాలు మాత్రమే కాక.. ఇప్పటి వరకు మనం తక్కువ శ్రద్ధ చూపిన ఎన్నో అంశాలు ప్రభావితం చేస్తున్నట్టు నిపుణులు చెప్పారు.

ఈ విషయాలు మనకు చాలా చిన్నవిగా అనిపించొచ్చు. కానీ, ఎక్కువ కాలం పాటు ఎవరైతే మెరుగైన జీవనాన్ని సాగించాలనుకుంటారో వారికి ఇవొక పెద్ద సవాలుగా ఉంటున్నాయని అన్నారు.

ఆరోగ్యకరమైన వృద్ధులు శారీరకంగా చాలా చురుకుగా ఉంటున్నారని నేషనల్ ఇన్‌స్టిట్యూట్ ఆన్ ఏజింగ్ సైంటిఫిక్ డైరెక్టర్ లుయిగి ఫెరుచి అన్నారు.

ఇంటి బయట కూడా వారు కొంత సమయాన్ని గడుపుతున్నారు. స్నేహితులు, బంధువులతో వారికి మంచి సంబంధాలు ఉంటున్నాయని చెప్పారు.

ఒక వ్యక్తి ఎక్కువ కాలం జీవించేందుకు వారిలోని జన్యువులు, జీవన విధానాలు ఏ మేర ఉపయోగపడుతున్నాయనే దాన్ని నిపుణులు వర్గీకరించారు.

ఒక వ్యక్తి ఎక్కువ కాలం బతికేందుకు వారి శరీరంలోని జన్యువులు 25 శాతం కారణం కాగా, మిగతా అంశాలే కీలక పాత్ర పోషిస్తున్నట్టు కొందరు శాస్త్రవేత్తలు అభిప్రాయపడ్డారు.

వాటిల్లో ఆ వ్యక్తి ఎక్కడ నివసిస్తున్నారు, ఏ ఆహారం తింటున్నారు, ఎంత సేపు వ్యాయామం చేస్తున్నారు, తన స్నేహితులు, కుటుంబంతో సంబంధాలు ఎలా ఉన్నాయనే విషయాలు కీలకంగా ఉన్నట్లు పేర్కొన్నారు.

అయితే, సైంటిఫిక్ కమ్యూనిటీలో ఒక వ్యక్తి ఎక్కువ కాలం, ఆరోగ్యకరంగా బతకడంలో జన్యుపరమైన అంశాల పాత్రపై ఇప్పటికీ చర్చనీయాంశంగానే ఉంది.