Budget பட்ஜெட் 2020: 15 லட்சம் வரை வருமானம் உள்ளவர்களுக்கு வருமானவரி குறைப்பு - தகவல்கள்

நாடாளுமன்றத்தில் மத்திய பட்ஜெட்டை நிதித்துறை அமைச்சர் நிர்மலா சீதாராமன் இன்று தாக்கல் செய்தார்.

நேரடி வரிகள் குறித்து பேசிய மத்திய அமைச்சர் நிர்மலா சீதாராமன், தனி நபர் வருமான வரி செலுத்தும் முறையை மேலும் எளிதாக்கி உள்ளோம் என்றார். மேலும் அவர் தனி நபர் வருமான வரிகளில் செய்யப்பட்டுள்ள மாற்றங்கள் குறித்தும் அறிவித்தார். அதன்படி,

0 - 2.5 லட்சம் வரை வருமானம் - வரி இல்லை

2.5 லட்சத்திலிருந்து 5 லட்சம் வரை - வரி இல்லை

5 லட்சத்திலிருந்து 7.5 லட்சம் வரை - 10% (குறைக்கப்பட்டுள்ளது)

7.5 லட்சத்திலிருந்து 10 லட்சம் வரை - 15% (குறைக்கப்பட்டுள்ளது)

10 லட்சத்திலிருந்து 12.5 லட்சம் வரை - 20% (குறைக்கப்பட்டுள்ளது)

12.5 லட்சத்திலிருந்து 15 லட்சம் வரை வருமானம் - 25% (குறைக்கப்பட்டுள்ளது)

15 லட்சத்துக்கு மேல் - 30% (குறைக்கப்படவில்லை)

ஒருவர் 15 லட்சம் சம்பாதித்தார் என்றால் இதுவரை அவர் ஆண்டுக்கு 2.73 லட்சம் வரி செலுத்தினார். இனி புதிய வருமானவரி அறிவிப்புகளின்படி அவர் 1.95 லட்சம் ரூபாய் வரியாக கட்டுவார். இது முன்பை காட்டிலும் 78 ஆயிரம் குறைவு என்பது குறைப்பிடத்தக்கது. அவர், முறையான வரி விலக்குகளை பெற்றால் மேலும் அவரது வரி குறையும்.

குறைந்த விலை வீடு வாங்குவோருக்கு கடந்தாண்டு கூடுதலாக 1,50,000 ரூபாய் வருமான வரி விலக்கு பெற அனுமதிக்கப்பட்டிருந்தது. தற்போது, அதே திட்டம் மேலும் ஒராண்டுக்கு நீடிக்கப்பட்டுள்ளது.

இதனிடையே, மும்பை பங்குச் சந்தை மற்றும் தேசிய பங்குச் சந்தைகள் வீழ்ச்சி அடைந்துள்ளன. மும்பை பங்குச் சந்தை 01.40 மணியளவில் 40,220 புள்ளிகளில் வர்த்தகமாகி வந்தது. தேசிய பங்குச் சந்தை 11,719 புள்ளிகளில் வர்த்தகமாகி வந்தது.

வருமான வரிவிதிப்பில் செய்யப்பட்டுள்ள மாற்றங்களால் மத்திய அரசுக்கு சுமார் 40,000 கோடி இழப்பு ஏற்படும்.

தனது உரையில் இது குறித்து பேசிய நிர்மலா சீதாராமன், ''ஜி.எஸ்.டி அமல்படுத்தப்பட்டதிலிருந்து ஒவ்வொரு குடும்பமும் மாதம் 4 சதவீதம் வரை சேமிக்கிறது.ஜி.எஸ்.டி அறிமுகப்படுத்தப்பட்டதிலிருந்து 60 லட்சம் பேர் புதிதாக வரி செலுத்தி உள்ளனர்'' என்று கூறினார்.

மத்திய அமைச்சர் நிர்மலா சீதாராமன் பட்ஜெட் தாக்கல் செய்துவரும் நிலையில், சரிவுடன்தொடங்கிய பங்கு சந்தைகள் தற்போது ஏற்றம் கண்டு வருகின்றன.

12 மணி நிலவரப்படி, சென்செக்ஸ் 58 புள்ளிகள் உயர்ந்து 40,780 புள்ளிகளில் வர்த்தகமாகி வருகின்றது.

ஆத்திசூடியை மேற்கோள்கட்டிய நிர்மலா சீதாராமன்

மத்திய பட்ஜெட் தாக்கல் செய்துவரும் நிதித்துறை அமைச்சர் நிர்மலா சீதாராமன், தனது உரையில் 'பூமி திருத்தி உண்' என்னும் அவ்வை ஆத்திச்சூடியின் வரிகளை மேற்கோள் காட்டினார்.

மேலும் காஷ்மீரி மொழியில் பட்ஜெட்டின் சில குறிப்புகளை வாசித்தார் நிர்மலா சீதாராமன்.

தனது உரையின் தொடக்கத்தில் "சலிமார் பூங்காவை போன்றது இந்தியா. தால் ஏரியில் உள்ள தாமரை மலரை போன்றது நம் நாடு, உலகத்திலேயே சிறந்த நாடு இது, " என்ற காஷ்மீர் கவிதையை இந்தியில் வாசித்தார் நிர்மலா சீதாராமன்

Budget 2020 Live:

நிர்மலா சீதாராமன் உரையின் முக்கிய அம்சங்கள்

பட்ஜெட் தாக்கல் தொடங்கியது

"இந்தியர்களின் வாங்கும் திறனை மேம்படுத்தவும், பொருளாதாரத்தை ஊக்குவிக்கும் வகையிலும் பட்ஜெட் வடிவமைக்கப்பட்டுள்ளது" - நிர்மலா சீதாராமன்

மத்திய அமைச்சரவை ஒப்புதல்

மத்திய நிதித்துறை அமைச்சர் நிர்மலா சீதாராமன் தாக்கல் செய்யவுள்ள பட்ஜெட்டுக்கு மத்திய அமைச்சரவை ஒப்புதல் வழங்கியுள்ளது.

சரிவுடன் தொடங்கிய பங்குச்சந்தை

மத்திய பட்ஜெட் தாக்கல் செய்யப்பட உள்ள நிலையில், மும்பை பங்குச்சந்தை 279.01 புள்ளிகள் குறைந்தன. தேசிய பங்குச்சந்தை 81.45 புள்ளிகள் குறைந்து 11,880.65 அளவுக்கு வர்த்தகம் ஆகி வருகிறது.

குடும்பத்துடன் நாடாளுமன்றம் வந்தார் நிதி அமைச்சர்

மகள் பரகலா உள்ளிட்ட குடும்பத்தினருடன் நாடாளுமன்றம் வந்தார் நிதி அமைச்சர் நிர்மலா சீதாராமன்.

மத்திய நிதிநிலை அறிக்கையின் அச்சடிக்கப்பட்ட தாள்கள் நாடாளுமன்றம் வந்தன.

மோதியும், அமித் ஷாவும் நாடாளுமன்றம் வந்தனர்

இந்திய பிரதமர் அமித் ஷாவும், உள்துறை அமைச்சர் அமித் ஷாவும் நாடாளுமன்றம் வந்தனர்.

நிதி அமைச்சகத்திலிருந்து நாடாளுமன்றத்துக்கு புறப்பட்டார் நிதி அமைச்சர் நிர்மலா சீதாராமன்.

இந்திய பொருளாதார ஆய்வறிக்கை 2019-2020: முக்கிய அம்சங்கள் என்னென்ன?

பொருளாதாரத்தை பொறுத்த வரை 2019ஆம் ஆண்டு உலகிற்கே கடினமான ஆண்டு என்பதால் அது இந்திய பொருளாதாரத்திலும் தாக்கத்தை ஏற்படுத்தியுள்ளது என்பதை அரசு ஒப்புக் கொள்கிறது.

வாங்கும் திறன் கடந்த ஏழு ஆண்டுகளில் குறைவான நிலையில் உள்ளது

தற்போதைய பொருளாதார வளர்ச்சி விகிதமான 5%, கடந்த 11 ஆண்டுகளிலேயே மிகவும் குறைவான அளவு. தனிநபர் வாங்கும் திறன் கடந்த ஏழு ஆண்டுகளில் குறைவான நிலையில் உள்ளது.

கடந்த 17 ஆண்டுகளில் இல்லாத அளவுக்கு முதலீடுகள் குறைந்துள்ளன. உற்பத்தி துறையின் வளர்ச்சி 15 ஆண்டுகளில் இல்லாத அளவு சரிந்துள்ளது.

முதல் பட்ஜெட்

இந்தியா காலணியாதிக்கத்தில் இருந்தபோது முதன் முதலில் 1860ஆம் ஆண்டு இந்தியாவுக்கு பட்ஜெட் தாக்கல் செய்தவர் ஜேம்ஸ் வில்சன். இவர் ஸ்டாண்டர்ட் சாட்டர்ட்வங்கியை நிறுவியவர் ஆவர்.

7 லட்சம் கோடி கடன் வாங்கி அதில் 6.6 லட்சம் கோடி வட்டி கட்டும் நிலை

கடந்த ஆண்டு மொத்த உள்நாட்டு உற்பத்தி வளர்ச்சி விகிதம் 6.8%. கடந்த காலாண்டின் வளர்ச்சி விகிதம் 5.8%தான். ஆனால், இந்த வளர்ச்சி விகிதம் எல்லாமே, திருத்தப்பட்ட முறையின் கீழ் காட்டப்பட்ட வளர்ச்சி விகிதம். அதாவது, 2014ல் இந்த அரசு பொறுப்பேற்ற உடனே பொருளாதார வளர்ச்சியைக் கணக்கிடும் முறையை மாற்றி அமைத்தார்கள். உடனே வளர்ச்சிவிகிதம் 2 சதவீதம் அதிகரித்தது. கணக்கிடும் முறையை மாற்றிய உடனேயே எதுவுமே நடக்காமல் ஒட்டுமொத்த உள்நாட்டு உற்பத்தி 2 சதவீதம் அதிகரித்தது.

பிற செய்திகள்:

சமூக ஊடகங்களில் பிபிசி தமிழ்: