குவாட்டமாலா எரிமலை வெடிப்பு: 10 கிலோமீட்டர் வரை எழும்பிய சாம்பல்

கடந்த ஞாயிற்றுக்கிழமையன்று குவாட்டமாலாவிலுள்ள எரிமலை வெடித்து சிதறியதில் அப்பகுதியிலுள்ள வீடுகளை பறந்து வந்து தாக்கிய சூடான கருங்கற்கள், சாம்பல் மற்றும் லாவாவினால் ஏற்பட்ட பாதிப்புகளில் இறந்துபோன மற்றும் காணாமல் போன பொதுமக்களை தேடும் பணியில் தீயணைப்பு வீரர்களுக்கு அந்நாட்டு ராணுவ வீரர்கள் உதவி செய்து வருகின்றனர்.

குவாட்டமாலாவிலுள்ள பேகோ என்ற எரிமலை வெடித்ததில் இதுவரை 62 பேர் உயிரிழந்துள்ளதாகவும், நூற்றுக்கணக்கானோர் காயமடைந்துள்ளதாகவும் அந்நாட்டு அதிகாரிகள் தெரிவித்துள்ளனர்.

இந்த எரிமலை வெடிப்பினால் பாதிக்கப்பட்டுள்ள ஆயிரக்கணக்கானோர் தற்காலிக முகாம்களில் தங்கவைக்கப்பட்டுள்ளனர்.

வானத்தை நோக்கி சுமார் 10 கிலோமீட்டர் (33,000 அடி) தூரம் வரை சாம்பலை கக்கிய எரிமலையின் சீற்றம் முடிவுற்றுள்ளதாக எரிமலையியலாளர்கள் தெரிவித்துள்ளனர்.

குவாட்டமாலாவின் தலைநகரான குவாட்டமாலா சிட்டிக்கு தென்-மேற்கு திசையில் 40 கிலோமீட்டர் தொலைவிலுள்ள இந்த எரிமலையானது வானத்தை நோக்கி கரும் புகையையும், சாம்பலையும் வெளியிட்டது.

முன்னதாக, ஒரு பெரும் ஆறு போன்று வெளியேறிய எரிமலை குழம்பான லாவா அருகிலுள்ள எல் ரோடியோ என்ற கிராமத்தை சூழ்ந்து நகர்ந்ததில் அங்கிருந்த வீடுகளும், அதிலிருந்தவர்களும் தீயில் சிக்கி பலியாயினர் என்று அந்நாட்டின் தேசிய பேரிடர் மேலாண்மை முகமையான கான்ரெட் தெரிவித்துள்ளது.

எரிமலை தொடர்ந்து கக்கி வரும் சாம்பலின் காரணமாக குவாட்டமாலா நகரத்திலுள்ள விமான நிலையம் மூடப்பட்டுள்ளது.

தேசிய அளவில் அவசர நிலை அறிவிக்கப்பட்டுள்ளதாக அந்நாட்டின் அதிபர் ஜிம்மி மொராலஸ் தெரிவித்துள்ளார்.

கடந்த 1974ஆம் ஆண்டுக்கு பிறகு நடைபெறும் மிகப் பெரிய எரிமலை வெடிப்பு என்று உள்ளூர் வல்லுநர்கள் தெரிவிக்கின்றனர்.

"துரதிஷ்டவசமாக எல் ரோடியோ கிராமம் லாவாவினால் அழிந்துவிட்டது. அதே வேளையில், லாவாவால் சூழப்பட்டுள்ள மற்றொரு கிரமமான லா லிபேர்ட்டட்டை எங்களால் இன்னும் நெருங்க முடியவில்லை. எனவே, அங்கும் உயிரிழப்புகள் ஏற்பட்டிருப்பதற்கான வாய்ப்புகள் உள்ளதாக கருதுகிறோம்" என்று தேசிய பேரிடர் மேலாண்மை குழுவின் தலைவரான செர்ஜியோ கேபனாஸ் உள்ளூர் வானொலி ஒன்றில் தெரிவித்துள்ளார்.

பிற செய்திகள்:

சமூக ஊடகங்களில் பிபிசி தமிழ்: