Ciidamada RSF ee Suudaan oo ku dhawaaqay dowlad gaar ah

Ciidamada Gurmadka Degdegga ah ee RSF ayaa ku dhawaaqay dhismaha dowlad ka soo horjeedda ciidamada qalabka sida ee dalkaas, iyadoo labo sano uu socday dagaal, kaas oo noqday dhibaatada bini'aadantinimo ee ugu weyn caalamka.

Hoggaamiyaha Ciidamada Gurmadka Degdegga ah (RSF), Maxmaed Xamdaan "Hemedti" Dagalo, ayaa sheegay in kooxdu "ay dhisayso mustaqbalka kaliya ee dhabta ah ee Suudaan".

Ku dhawaaqista ayaa timid iyadoo London ay martigelisay shir heer sare ah oo lagu xusayay sanadguuradii labaad ee dagaalka Suudaan, halkaas oo xoghayaha arrimaha dibadda ee UK David Lammy uu ku baaqay "dariiq nabadeed". Dagaalka ayaa socday, iyadoo ciidamadu ay sheegeen inay duqeeyeen fariisimo ay RSF-ta ku lahaayeen duleedka magaalada el-Fasher, taasoo ku qasabtay boqollaal kun inay ka cararaan xerada qaxootiga ee Zamzam.

Hemedti waxa uu sheegay in RSF ay dhisayso "Dowlad sharci ah" oo aysan ahayn dawlad ay shakhsiyaad gaar ahi xukumaan. "Ma raadineyno xukun, laakiin midnimo [ayaan rabnaa], waxaan aaminsanahay in aysan jirin qabiil, gobol, ama diin aan keli ku haysata aqoonsiga Suudaan," ayuu ku yidhi qoraalkiisa oo la soo dhigay Telegram. Wuxuu intaas ku daray in dowladdiisu ay bixin doonto adeegyada muhiimka ah sida waxbarashada iyo caafimaadka oo keliya ma aha meelaha ay RSF maamusho, balse dalka oo dhan.

In ka badan 400 oo qof ayaa lagu dilay weerarradii ugu dambeeyay ee ay qaadday RSF, sida ay sheegtay Qaramada Midoobay, iyadoo soo xiganeysa "ilo lagu kalsoon yahay". Laba sano oo uu dagaalku socday, labadaba ciidanka iyo RSF waxaa lagu eedeeyay dambiyo dagaal, oo ay ku jiraan xasuuq iyo xadgudubyo galmo oo ballaaran.

Hemedti waxa uu loollan dhanka awoodda ah kula jiray taliyaha ciidamada Suudaan, Gen Abdel Fattah al-Burhan, tan iyo 15kii Abriil 2023, taas oo abuurtay dhibaato bini'aadantinimo oo galaaftay nolosha in ka badan 150,000 oo qof iyo barakaca in ka badan 12 milyan oo qof.

Dagaalladii ugu dambeeyay ee ka dhacay caasimadda Waqooyiga Darfur ee el-Fasher, ayaa ku qasbay tobnaan kun oo rayid ah oo ku sugnaa xerada qaxootiga ee Zamzam inay u lugeeyaan 70km (43 mayl) magaalada Tawila, sida ay sheegtay hay'adda samafalka caafimaadka ee MSF. Qaar badan oo ka mid ah ayaa halkaasi gaaray iyaga oo aad u fuuqbaxay, waxaana la sheegay in carruurta qaar ay u dhinteen harraad.

Hay'adaha samafalka ayaa soo sheegay xaalado macaluul oo kale ah oo soo food saartay in ka badan 700,000 oo qof oo ku jira xeryo ku meel gaar ah oo ku yaalla agagaarka el-Fasher, iyadoo khataro amni iyo jidgooyo ay hor istaageen gaarsiinta gargaarka muhiimka ah.

Intii lagu guda jiray kulan caalami ah Talaadadii, UK waxay ballan qaadday lacag dheeri ah oo dhan £ 120m ($ 159m) oo cunto iyo gargaar caafimaad ah, iyadoo ku boorisay caalamka in aan dhabarka loo jeedin Suudaan. "Qaar badan ayaa ka quustay Suudaan - taasi waa khalad - waa qalad anshax ahaan marka aan aragno dad badan oo rayid ah oo qoorta laga gooyay, dhallaanka da'doodu yar tahay ee loo geysto xadgudub galmo, dad badan oo wajahaya macaluul marka loo eego meel kasta oo kale oo adduunka ah ... Ma si fudud u eegi karno," Lammy ayaa tiri.

Shirka ayaa sidoo kale ku baaqay xabbad joojin degdeg ah oo joogto ah, balse Midowga Afrika ayaa sheegay inaysan ogolaan doonin in dalka ay kala qaybiyaan ciidamada iyo RSF-ta.