යුද අපරාධ චෝදනා පරීක්ෂණයට යුරෝපයත් එක්වෙයි

යුද සමයේ කැරුණු බරපතල අපරාධ පිලිබඳ චෝදනා සම්බන්ධ විශ්වසනීය සහ ස්වාධීන පරීක්ෂණයක් සඳහා ක්‍රියාකාරී ව සහාය දක්වන්නට යුරෝපා සංගමය තීන්දු කොට තිබේ.

ශ්‍රී ලංකාවේ වගකීම් සහගත භාවය සහ සංහිඳියාව වැඩි දියුණු කිරීම සඳහා දරන උත්සාහයටත් තම සහාය පළ කරන බවයි සඳුදා සම්මත කැරුණු <link type="page"><caption> යෝජනාවේ</caption><url href="http://www.consilium.europa.eu/uedocs/cms_data/docs/pressdata/EN/foraff/140973.pdf" platform="highweb"/></link> දැක්වෙන්නේ.

එමෙන්ම, රටේ වර්තමාන මානව හිමිකම් තත්වය වෙත යොමු වන බව ද යෝජනාවේ සඳහන් වෙයි.

යුරෝපා සංගම් මුලස්ථානය පිහිටි බ්‍රසල්ස් නුවර රැස් වූ සංගමයේ විදේශ කටයුතු පිලිබඳ කමිටුව පවසා ඇත්තේ එක්සත් ජාතීන් ගේ මානව හිමිකම් සමුළුවේ විසි පස් වැනි සැසි වාරය ට පෙරාතුව මේ තීරණයට එළැඹි බවයි.

ඉහළ පෙළේ නියෝජනය

විදේශ කටයුතු සහ ආරක්ෂක පිළිවෙත පිලිබඳ උත්තම නියෝජිත කැතරින් ඇෂ්ටන් ගේ ප්‍රධානත්වයෙන් සාමාජික රටවල් විසි අටේ ම විදේශ අමාත්‍ය නියෝජිතයන් සහභාගි වූ බවයි යුරෝපා සංගමය පවසා තිබුනේ.

ශ්‍රී ලංකාවේ යුද්ධයේ දීත්, ඉන් පසුවත් දෙපාර්ශවය ම විසින් කළ බවට වාර්තා වී ඇති යුද අපරාධ, මානව වර්ගයා ට එරෙහි අපරාධ සහ වෙනත් මානව හිමිකම් උල්ලංඝන පිලිබඳ වගකීම විනිශ්චය සඳහා ස්වාධීන,ජාත්‍යන්තර යාන්ත්‍රණයක් පිහිටුවන ලෙස ඇමරිකානු උත්තර මන්ත්‍රී මණ්ඩලයට <link type="page"><caption> යෝජනාවක්</caption><url href="http://www.bbc.co.uk/sinhala/sri_lanka/2014/02/140210_us_senate_lanka.shtml" platform="highweb"/></link> ගෙන එනු ලැබීමෙන් දින කීපයකට පසුයි යුරෝපා සංගමය ස්වාධීන යුද අපරාධ පරීක්ෂණයක් සඳහා සහාය පළ කොට ඇත්තේ.