ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
IPL ජයග්රහණය සැමරීමට එක්රැස් වූ RCB රසිකයින් පිරිසක් තෙරපීමකින් ජීවිතක්ෂයට
- Author, බීබීසී සිංහල
වසර 18කට පසු ප්රථම වරට IPL ශූරතාව දිනා ගත් රෝයල් චැලෙන්ජර්ස් බැංගලෝර් කණ්ඩායමේ ජයග්රහණය සැමරීම සඳහා පැවති උත්සවයකදී ඇති වූ තෙරපීමකින් පුද්ගලයින් 11 දෙනෙකු ජීවිතක්ෂයට පත්ව ඇතැයි ඉන්දීය මාධ්ය වාර්තා කර තිබේ.
එම වාර්තාවල දැක්වෙන්නේ, බෙංගලූරුහි චින්නස්වාමි ක්රීඩාංගණයේ පැවති එම උත්සවයට රසිකයන් විශාල පිරිසක් සහභාගි වී සිටි බව ය.
ජීවිතක්ෂයට පත්වූවන් අතර කාන්තාවක ද වන බව මාධ්ය වාර්තාවල දැක්වෙයි.
තෙරපීමෙන් තවත් 15 දෙනෙකු පමණ තුවාල ලබා තිබේ.
RCB රසිකයින්ට ක්රීඩාංගණයට ඇතුළු වීම සඳහා ගේට්ටු විවෘත කළ අවස්ථාවේ විශාල පිරිසක් එකවර ඇතුළු වීමට උත්සහ කිරීමේදී එකිනෙකා තෙරපීමක් සිදුව තිබේ.
පොලිස් නිලධාරීන්ට ද තත්ත්වය පාලනය කර ගැනීමට නොහැකි වී තිබිණි.
අද දහවල් රෝයල් චැලෙන්ජර්ස් බෙංගලූරු කණ්ඩායම ගාර්ඩ්න් සිටි වෙත ළඟා වූයේ වීදි දිගේ පෙළ ගැසී සිටි රසිකයින්ගේ ජය ඝෝෂා මධ්යයේ ය.
පසුව ඇති වූ තෙරපීම් දැක්වෙන වීඩියෝ ද සමාජ මාධ්ය ඔස්සේ පළ වී තිබිණි.
ඉන්දීය සුපිරි පිතිකරු විරාට් කෝලි ඉන්දීය ප්රිමියර් ලීග් (IPL) තරගාවලිය ආරම්භයේ සිට අපේක්ෂාවෙන් සිටි ජයග්රහණය හිමි කර ගැනීමට ඊයේ (ජූනි 03) සමත් විය.
ඒ, අවසන් තරගයේදී පන්ජාබ් කිංග්ස් කණ්ඩායමට එරෙහිව ලකුණු 6ක ජයක් හිමි කර ගනිමිනි.
රෝයල් චැලෙන්ජර්ස් බෙංගලූරු කණ්ඩායම ඉන්දීය ප්රිමියර් ලීග් තරගාවලියක අවසන් තරගයට සුදුසුකම් ලැබුවේ, වසර 11කට පසුව ය.
