2024 වසරේ ICC ටෙස්ට් සහ එක්දින හොඳ ම ක්‍රීඩකයින් අතර ශ්‍රී ලංකා ක්‍රීඩකයින් 5 දෙනෙක්

2024 වසරේ ජාත්‍යන්තර ක්‍රිකට් කවුන්සිලය විසින් නම් කරන ලද වසරේ ටෙස්ට් සහ එක්දින කණ්ඩායම් සඳහා ශ්‍රී ලංකා ක්‍රීඩකයින් 5 දෙනෙක් නම් කර තිබේ.

ඒ, එක්දින කණ්ඩායම සඳහා ශ්‍රී ලාංකික ක්‍රීඩකයින් 4 දෙනෙකු සහ ටෙස්ට් කණ්ඩායම සඳහා එක් ශ්‍රී ලාංකික ක්‍රීඩකයෙකු වශයෙනි.

එක්දින කණ්ඩායමේ නායකත්වයට ශ්‍රී ලංකා නායක චරිත් අසලංක නම් කර තිබීම ද විශේෂත්වයකි.

2024 වසරේ එක්දින කණ්ඩායම

2024 සඳහා ජාත්‍යන්තර ක්‍රිකට් කවුන්සිලය නම් කළ වසරේ එක්දින ක්‍රිකට් කණ්ඩායමට ශ්‍රී ලංකා කණ්ඩායමේ ක්‍රීඩකයින් සිව් දෙනෙකු ඇතුළත් කර තිබේ.

එම කණ්ඩායමේ නායකත්වය සඳහා ශ්‍රී ලංකා නායක චරිත් අසලංක නම් කර තිබීම විශේෂත්වයකි.

2024 වසරේ එක්දින තරගවලදී දැක්වූ දක්ෂතා පදනම් කරගෙන මෙම කණ්ඩායම නම් කර තිබේ.

එම කණ්ඩායමේ ආරම්භ පිතිකරුවාගේ සිට පිළිවෙළින් ක්‍රීඩකයින් 11 දෙනා වසර තුළදී දැක්වූ දක්ෂතා පහත දැක්වේ.

සයිම් අයුබ් 2024 වසර තුළදී තරග 9කට ක්‍රීඩා කර ලකුණු 113ක් රැස් කළ අතර, එහි සාමාන්‍යය 64.37කි.

ඊට ශතක 3ක් සහ එක් අර්ධ ශතකයක් ඇතුළත් විය.

2024 වසරේදී තරග 11කට ක්‍රීඩා කළ ගුර්බාස් ලකුණු 531ක් රැස් කර තිබේ.

ඊට ශතක 3ක් සහ අර්ධ ශතක 2ක් ඇතුළත් විය.

පසුගිය වසරේ තරග 12කදී ලකුණු 694ක් රැස් කළ පැතුම් නිස්සංක තුන් වන පිතිකරු ලෙස නම් කර තිබේ.

පසුගිය වසරේ පෙබරවාරි මාසයේදී ඇෆ්ඝනිස්ථානයට එරෙහිව ඔහු නොදැවී රැස් කළ ලකුණු 210, එක්දින ක්‍රිකට් ඉතිහාසයේ ආරම්භක පිතිකරුවෙකු රැස් කළ 6 වන වැඩි ම ලකුණු සංඛ්‍යාව යි.

වසර පුරා ලකුණු 63.1ක සාමාන්‍යයක් පවත්වා ගත් පැතුම් නිස්සංක 2024 වසරේදී ශතක 3ක් සහ අර්ධ ශතක 2ක් රැස් කිරීමට සමත් විය.

එම වසරේ එක්දින තරගවලදී වැඩි ම ලකුණු රැස් කළ පිතිකරු ලැයිස්තුවේ දෙවන ස්ථානයට පත්වූයේ, කුසල් මෙන්ඩිස්ට පමණක් දෙවැනි වෙමිනි.

2024 වසරේදී තරග 17කදී ලකුණු 742ක් රැස් කර ඇති කුසල් මෙන්ඩිස් එක් ශතකයක් සහ අර්ධ ශතක 6ක් රැස් කිරීමට සමත් විය.

ඔහු 2024 වසර අවසන් කළේ, නවසීලන්තය සමග පැවති අවසන් එක්දින තරග දෙකේදී පමණක් ලකුණු 217ක් රැස් කරමිනි.

2024 වසරේ එක්දින ක්‍රිකට් කණ්ඩායමේ නායකත්වයට නම් කර ඇති චරිත් අසලංක වසර තුළ තරග 16කට සහභාගි වී තිබේ.

එහිදී ඔහු ලකුණු 605ක් රැස් කළ අතර, ඊට එක් ශතකයක් සහ අර්ධ ශතක 4ක් ඇතුළත් විය.

මෙම කණ්ඩායමට නම් කර ඇති එක ම බටහිර ඉන්දීය කොදෙව් ක්‍රීඩකයා වන රදර්ෆර්ඩ්, 2024 වසරේදී තරග 9කදී ලකුණු 425ක් රැස් කළේ ය.

ඔහුගේ ලකුණු රැස් කිරීමේ සාමාන්‍යය 106.2ක පැවතීම විශේෂත්වයකි.

ඔහු වසර තුළදී ශතකයක් සහ අර්ධ ශතක 4ක් රැස් කිරීමට සමත් විය.

2024 වසරේදී එක්දින තරග 12කට සහභාගි වූ ඕමාර්සායි ලකුණු 417ක් රැස් කළේ ය.

ඊට එක් ශතකයක් සහ අර්ධ ශතක 3ක් ඇතුළත් විය.

තුන් ඉරියව්වෙන් ම දක්ෂතා දැක්වූ ඔහු පන්දු යැවීමේදී ද කඩුලු 17ක් බිඳ හෙළීමට සමත් විය.

පසුගිය වසරේ තරග 10කට ක්‍රීඩා කළ වනිඳු හසරංග කඩුලු 26ක් බිඳ හෙළා තිබේ.

ඒ අනුව, ඔහු එක් තරගයකදී කඩුලු 2.6ක සාමාන්‍යයක් බිඳ හෙළා ඇත.

පසුගිය ජනවාරි මාසයේදී සිම්බාබ්වේ කණ්ඩායමට එරෙහිව ලකුණු 19කට කඩුලු 7ක් බිඳ හෙළී ය.

එය එක්දින තරග ඉතිහාසයේ හොඳ ම පස් වන පන්දු යැවීම බව ජාත්‍යන්තර ක්‍රිකට් කවුන්සිලය පවසයි.

වේග පන්දු යවන්නෙකු ලෙස වසරේ කණ්ඩායමට නම් කර ඇති පකිස්ථානයේ ෂහීන් ෂා අෆ්රිඩි තරග 6කදී කඩුලු 15ක් බිඳ හෙළී ය.

පසුගිය වසරේ තරග 8කට ක්‍රීඩා කරමින් හරිස් රාවුෆ් කඩුලු 13ක් බිඳ හෙළී ය.

තරග 11කට ක්‍රීඩා කළ තවමත් 18 හැවිරිදි ඇෆ්ඝනිස්ථාන දඟ පන්දු යවන්නෙකු වන ඝනස්ෆාර් කඩුලු 21ක් බිඳ හෙළීමට සමත් විය.

ඔහුගේ කඩුලු දවා ගැනීමේ සාමාන්‍යය 13.57කි.

ඔහු සිය පළමු එක්දින ක්‍රිකට් තරගයට සහභාගි වූයේ ද, 2024 මාර්තු මාසයේදී ය.

ඔහු එම කාලය තුළදී අවස්ථා දෙකකදී කඩුලු 5කට වඩා දවා ගැනීමට සමත් විය.

නොවැම්බර් මාසයේදී බංග්ලාදේශයට එරෙහිව ලකුණු 26කට කඩුලු 6ක් බිඳ හෙළූ ඔහු, එක්දින තරගයකදී කඩුලු 5ක් බිඳ හෙළූ ළාබාලතම පන්දු යවන්නන් අතර 5 වන ස්ථානයට පත්විය.

2024 වසරේ ටෙස්ට් ක්‍රිකට් කණ්ඩායම

2024 වසර වෙනුවෙන් ජාත්‍යන්තර ක්‍රිකට් කවුන්සිලය නම් කළ ටෙස්ට් කණ්ඩායමේ නායකත්වය හිමිව ඇත්තේ, ඔස්ට්‍රේලියානු නායක පැට් කමින්ස්ට ය.

එම කණ්ඩායමට නම් කර ඇති එක ම ශ්‍රී ලාංකික ක්‍රීඩකයා වන්නේ, කමිඳු මෙන්ඩිස් පමණි.

වසර දෙකක විරාමයකට පසු යළිත් ටෙස්ට් පිටියට පැමිණි ඔහු 2024 වසරේදී ලකුණු 1049ක් රැස් කිරීමට සමත් විය.

ඒ අනුව, ඒ වසරේදී වැඩි ම ටෙස්ට් ලකුණු රැස් කළ පිතිකරුවන් අතර ඔහු 5 වන ස්ථානය හිමි කර ගත්තේ ය.

2024 වසරේ හොඳ ම ටෙස්ට් කණ්ඩායම පිළිවෙළින් මෙසේ ය.