ජනාධිපති අනුරගේ කච්චතිව් සංචාරය උපායමාර්ගිකව වැදගත් වන හේතු 5ක්

ඓතිහාසික සංචාරයක් සනිටුහන් කරමින් ජනාධිපති අනුර කුමාර දිසානායක (සැප්තැම්බර් 01වැනිදා) කච්චතිව් දූපතේ අනපේක්ෂිත නිරීක්ෂණ සංචාරයක නිරත විය. මෙම සංචාරය සුවිශේෂී වන්නේ ශ්‍රී ලංකා ජනාධිපතිවරයෙකු කච්චතිව්හි සංචාරය කළ පළමු අවස්ථාව මෙය විය හැකි බැවිනි.

ශ්‍රී ලංකාවේ උතුරු පළාතේ අගනගරය වන යාපනයට දුරින්ම පිහිටි සහ ඉන්දියාවට සමීපව පිහිටා ඇති කච්චතිව් දූපත අතිශයින්ම ආන්දෝලනාත්මක වන්නේ, ඉන්දීය දේශපාලනඥයින් සහ දකුණු ඉන්දීය දේශපාලන ක්‍රියාකාරීන් ශ්‍රී ලංකාවට අයත්, මෙම දූපත ඉන්දියාව වෙත ලබා ගත යුතු බවට විටින් විට කරන ප්‍රකාශ හේතුවෙනි.

ඒ පිළිබඳ මෑතකදී දේශපාලන රැලියක එවැනි ආන්දෝලනාත්මක ප්‍රකාශයක් කර තිබුණේ, දකුණු ඉන්දීය ජනප්‍රිය සිනමා නළුවෙකු මෙන්ම දේශපාලනඥයෙකු වන තලපති විජේ ය.

මෙම කච්චතිව් සංචාරය තුළින් ජනාධිපති අනුර කුමාර දිසානායක භූ දේශපාලනිකව ලබා දුන් පණිවිඩය කුමක්ද?

මේ සම්බන්ධයෙන් පැහැදිලි කරගැනීමට බීබීසී සිංහල විසින් ඕස්ට්‍රලියාවේ ඉන්දු-පැසිෆික් අධ්‍යයන මධ්‍යස්ථානයේ ජාත්‍යන්තර සබඳතා පර්යේෂක ආචාර්ය හසිත් කන්දඋඩහේවා සම්බන්ධ කර ගත්තේය.

01. නෛතික පිළිගැනීමක්

කච්චතීව් දූපත මෙරටට අයත් දූපත් සමූහයට අයත් එක් දූපතක් වන අතර, ශ්‍රී ලංකාවට වඩාත් දුරින් ම පිහිටි දූපත වන්නේ ද කච්චතිව් දූපත යි.

දකුණු ඉන්දියාවේ රාමේශ්වරම් නගරයට වඩාත් ආසන්නව කච්චතිව් දූපත පිහිටා තිබේ.

ඕස්ට්‍රලියාවේ ඉන්දු-පැසිෆික් අධ්‍යයන මධ්‍යස්ථානයේ ජාත්‍යන්තර සබඳතා පර්යේෂක ආචාර්ය හසිත් කන්දඋඩහේවා කියා සිටියේ මෙම සංචාරය තුළින් එහි අයිතිය පිළිබඳ නෛතික පිළිගැනීමක් හිමිවන බව යි.

"ඇත්තටම මේ සංචාරයට බලපාන හේතු සාධක කිහිපයක් තියෙනවා. මොකද පසුගිය මාසය තුළ දකුණු ඉන්දීය තමිල්නාඩු දේශපාලනයේ මැතිවරණ ක්‍රියාවලිය තුළ ප්‍රධාන අපේක්ෂකයෙකු වන තලපති විජේ විසින් ප්‍රකාශ කළා BJP ආණ්ඩුව විසින් කච්චතිව් දූපත නැවත ඉන්දියාවට පවරා ගත යුතුයි කියලා. මේ සම්බන්ධයෙන් දීර්ඝ වශයෙන් කතිකාවතක් ඇති වෙලා තියෙනවා. ජාත්‍යන්තර වශයෙන් බලපෑමක් ඇති වෙලා තියෙනවා මේ දූපතේ අයිතිය සම්බන්ධයෙන්. ඉන්දියානු අභ්‍යන්තර දේශපාලනයයි, ඉන්දියානු ජාත්‍යන්තර දේශපාලනයයි එක්ක."

"සාමාන්‍යයෙන් රාජ්‍ය නායකයෙක් යම් ප්‍රදේශයකට යනවා නම් නෛතික පිළිගැනීමක් හම්බ වෙනවා ඒ ප්‍රදේශය අදාළ රටට අයිතියි කියන එක ගැන. ජනාධිපතිවරයා කච්චතිව් දූපතට යාම තුළින් එක්තරා විදහකට රාජ්‍ය නායකයා විදිහට පෙන්වනවා අදටත් හෙටට ත්, ඉදිරියට ත් කච්චතිව් දූපත සම්බන්ධයෙන් ලංකාව අයිතිවාසිකම් කියාපාන බව." ඔහු කියා සිටියේය.

දකුණු ඉන්දියාවේ රාමේශ්වරම් සිට කච්චතීව් දූපත දක්වා ඇති දුර කිලෝමීටර 24කට ආසන්න වන අතර, යාපනය සිට කච්චතීව් දූපත දක්වා කිලෝමීටර 63කට ආසන්න දුරක් පවතින බව ගූගල් සිතියම අනුව පැහැදිලි වෙයි.

කච්චතීව් දූපතේ භූමි ප්‍රමාණය අක්කර 280කට ආසන්න වපසරියකින් යුක්ත වේ.

මෙම දූපත ශ්‍රී ලංකාවට මෙන් ම ඉන්දියාවට ද ධීවර කර්මාන්තය ඇතුළු ක්ෂේත්‍ර කිහිපයක් හේතුවෙන් ඉතා වැදගත් ය.

02. ජාත්‍යන්තර ප්‍රතිරූපය

"මේ සංචාරය හරහා ජානාධිපතිවරයා පෙන්වනවා තවදුරටත් ශ්‍රී ලංකාව තමන්ගේ භෞමික අඛණ්ඩතාව ස්වාධීනත්වය ආරක්ෂා කරගනිමින් ඉදිරියට යන්න කටයුතු කරන බව. ඒ කියන්නේ තමිල්නාඩු ඉල්ලීම් ප්‍රතික්ෂේප කරන බව සෘජුවම කියා පානවා මේ සංචාරය තුළින්."

"කච්චතිව් පැත්තේ ඉදිරියට වීමට නියමිත සංවර්ධන ව්‍යාපෘති සඳහා ඉඟියක් ලබා දීම තමයි මේ සංචාරය තුළ කරන්නේ. අපි දැනට බලාපෙරොත්තුවෙනවා තෙල් ගවේෂණ කටයුතු ආරම්භ කරන්න ඉන්දීය සාමාගමක් හරහා. දෙවැනි එක තමා බලශක්ති ව්‍යාපෘතියක් සම්බන්ධයෙන් යම් යම් මතවාදයන් යනවා." හෙතෙම කියා සිටියේය.

"මේ කරුණු හරහා ජනාධිපතිවරයා ජාත්‍යන්තර ප්‍රජාවට, ඉන්දියාවට සහ දකුණු ඉන්දීය දේශපාලනයට සිග්නල්ස් තුනක් දෙනවා. ඒක හින්දා තමා මේ සංචාරය ඉතාම වැදගත් වන්නේ අපිට. මං හිතන්නේ අපි රාජ්‍යතාන්ත්‍රික මට්ටමෙන් දැනටමත් විරෝධය මතු කරලා ඉවරයි; මේ දකුණු ඉන්දීය අභ්‍යන්තර දේශපාලනඥයින් විසින් කලින් කළට මතු කරන ඉල්ලීම් සම්බන්ධයෙන්. මං හිතන්නේ BJP එක මෝදිගේ ආණ්ඩුව ඒක පිළිඅරගෙන තියෙනවා. මං හිතන්නේ නැහැ මෝදි විසින් කච්චතිව් දූපත නැවත පවරා ගැනීමක් සිද්ධ කරයි කියලා.ඒක තමා මගේ පෞද්ගලික අදහස." ඕස්ට්‍රලියාවේ ඉන්දු-පැසිෆික් අධ්‍යයන මධ්‍යස්ථානයේ ජාත්‍යන්තර සබඳතා පර්යේෂක ආචාර්ය හසිත් කන්දඋඩහේවා අවධාරණය කළේය.

03. 'මේක ඉන්දියාවට තර්ජනයක් නෙමෙයි'

ආචාර්ය හසිත් කන්දඋඩහේවා කියා සිටියේ, "මම හිතන්නේ නැහැ මේ හරහා වක්‍රාකාරයෙන් ඉන්දියාවට අපි තර්ජනයක් කරනවා කියලා. මොකද මං හිතන්නේ මේ සංචාරය සම්බන්ධයෙන් දෙපාර්ශවය පූර්ව දැනුවත් කිරීමක් වෙන්න ඇති කියලා. බොහොම හොඳ මිත්‍රශීලී සම්බන්ධතාවයක්… අපි කියනවා Open communication එකක් හරහා දෙපාර්ශවය ගනුදෙනු කරනවා. මං හිතන්නේ නැහැ මේකෙන් කිසිම වෙලාවක ඉන්දියාවට තර්ජනයක් එල්ල කරනවා කියලා. මොකද ඉන්දියාවේ BJP ආණ්ඩුව තවමත් ඉන්නේ කච්චතිව් ලංකාවේ කියන පදනම මත." යනුවෙනි.

04. මූලෝපායික වශයෙන් වැදගත් සංචාරයක්

"මෙරට විපක්ෂය මේක යොදා ගන්න පුළුවන් ඉන්දියාවට බයේ, දකුණු ඉන්දීය දේශපාලනයට බයේ මේ සංචාරය කලා කියලා. විපක්ෂය මේක යොදා ගන්න පුළුවන් ලංකාව ඉන්දියාවට ගැති භාවයක් දක්වනවා කියලා. මේ ගැතිභායේ සංකේතයක් හැටියට මේක යොදා ගන්න පුළුවන්."

"නමුත් මම දකින්නේ මේක මූලෝපායික වශයෙන් වැදගත් සංචාරයක්. මොකද එක්තරා විදිහකට අපේ ආධිපත්‍ය පෙන්වීමක් කියන එක තමා මට දකින්න පුළුවන් වෙන්නේ." යැයි ආචාර්ය හසිත් කන්දඋඩහේවා අවධාරණය කළේය.

05. උපායශීලීව උතුර දිනා ගැනීම

"උතුරේ ජනතාව මේක හොඳින් පිළිගන්න පුළුවන්. මොකද කච්චතිව් සිට යාපනය අර්ධද්වීපයේ ජනතාව බොහොම ධානත්මක ප්‍රතිචාරයක් තියෙනවා වත්මන් ආණ්ඩුවට. ඉතින් මේ සංචාරයත් එක්ක ජනාධිපතිවරයා උපායශීලීව උතුර දිනා ගැනීමේ කාර්යක ඉෂ්ට කරමින් පවතිනවා. එවගේ ම කච්චතිව් ඇතුළු උතුරේ ජනාතාවටත් මේක ලොකු දෙයක්. රාජ්‍ය නායකයෙක් තම ප්‍රදේශයට සංචාරයකට ආවා ම එක ඔවුන්ගේ ප්‍රදේශයේ සංචර්ධනය සඳහා විශාල පිටුවහලක් වෙන්න පුළුවන්." ඔහු කියා සිටියේ ය.

කච්චතීව් ශ්‍රී ලංකාවට පිරිනැමූ ගිවිසුම

කච්චතිව් දූපතේ අයිතිය සම්බන්ධයෙන් ගැටලුව ඉතිහාසය පුරා දක්නට ලැබුණු අතර, මෙරට අග්‍රාමාත්‍ය ලෙස කටයුතු කළ සිරිමාවෝ බණ්ඩාරනායක හා එවකට ඉන්දීය අග්‍රාමාත්‍යවරියව සිටි ඉන්දිරා ගාන්ධි අතර 1974 ජූනි 26 වන දා අත්සන් කළ ගිවිසුමක් මගින් කච්චතීව් දූපතේ අයිතිය ශ්‍රී ලංකාවට හිමි විය.

කච්චතීව් දුපත ඉන්දියාවේ කොටසක් නොවන බව ත්, එය ශ්‍රී ලංකාවේ කොටසක් වන බව ත් ගිවිසුමේ සඳහන් වෙයි.

කච්චතීව් දූපතේ අයිතිය 1974 දී ශ්‍රී ලංකාවට හිමි වූ අතර, කච්චතිව් අයිතිය හා කච්චතීව් සාගර සීමාව සම්බන්ධ ගැටලුව 20 වන සියවසේ මුල් කාලවකවානුව දක්වා දිව යයි.

කච්චතීව් දූපතේ අයිතිය සම්බන්ධයෙන් 1921 වසරේ ඉන්දීය නියෝජිතයින් පිරිසක් හා ශ්‍රී ලංකා නියෝජිතයින් පිරිසක් අතර, සාකච්ජාවක් පවත්වා තිබූ අතර, එහිදී ඉන්දීය නියෝජිතයින් සඳහන් කර තිබුණේ, කච්චතීව් දූපත බ්‍රිතාන්‍ය පාලන සමයේ රාමන්ඩි පාලකයෙකු යටතේ පැවති බව ය.

එහිදී ශ්‍රී ලංකා නියෝජිතයින් පවසා ඇත්තේ, කච්චතිව් දූපත කිසිදු කාලයක ඉන්දියාවට අයත්ව නොතිබු බව ය.

වර්ෂ 1800 දී පමණ ලන්දේසි යුගයේ ඇඳි සිතියමක් පාදක කර කරමින් 1950 දී ආර්.එල්. බ්‍රෝහියර් සම්පාදනය කළ කෘතියක ද කච්චතීව් දූපත ශ්‍රී ලංකාවට අයිති බව දක්වා ඇති අතර, ඉංග්‍රීසි ජාතික සිවිල් පරිපාලකයෙකු වු ශ්‍රීමත් ජේම්ස් එමර්සන් 1860 දී "සිලෝන්" නමින් එළිදක්වා තිබූ ග්‍රන්ථයක සිතියමක ද කච්චතීව් දූපත ඇතුළත් කර තිබූ බව පුරාවිද්‍යා නිලධාරීහු පෙන්වා දෙති.

1974 දී අත්සන් කළ ගිවිසුම අනුව කච්චතීව් දූපත ආශ්‍රිත ධීවර කටයුතු හා කච්චතීව් දූපත ආශ්‍රිත සාගර සීමාව සම්බන්ධයෙන් වූ ගැටලු හේතුවෙන් එදා සිට මේ දක්වා ඉන්දීය ධීවරයින් හා ශ්‍රී ලංකා ධීවරයින් අතර ගැටුම් පවතී.

1976 වසරේ ඉන්දු - ලංකා නායකයින් අත්සන් කළ තවත් ගිවිසුමක් අනුව කච්චතීව් දූපත ආශ්‍රිතව මසුන් ඇල්ලීමට ඉන්දීය ධීවරයින්ට අවසරය අහිමි කෙරිණි.

මේ හේතුවෙන් ඉන්දියාවේ තමිල්නාඩු ජනතාවට කච්චතීව් දූපත යළි ඉන්දියාවට පවරා ගැනීම අතිශය වැදගත් කරුණකි.