ਕੈਨੇਡਾ: ਵੈਨਕੂਵਰ 'ਚ ਲਾਪੂ ਲਾਪੂ ਫੈਸਟੀਵਲ ਦੌਰਾਨ ਕਾਰ ਦਰੜਨ ਮਾਮਲੇ ਵਿੱਚ ਹੁਣ ਤੱਕ 11 ਲੋਕਾਂ ਦੀ ਮੌਤ, ਜਾਣੋ 30 ਸਾਲਾ ਸ਼ੱਕੀ ਕੌਣ
ਤਸਵੀਰ ਸਰੋਤ, Reuters
- ਲੇਖਕ, ਜੋਰਾਸਲਾਵ ਲੂਕਿਵ ਅਤੇ ਐਮਾ ਰੋਸੀਟਰ
- ਰੋਲ, ਬੀਬੀਸੀ ਪੱਤਰਕਾਰ
ਕੈਨੇਡਾ ਦੇ ਵੈਨਕੂਵਰ ਵਿੱਚ ਲਾਪੂ ਲਾਪੂ ਡੇਅ ਦੌਰਾਨ ਭੀੜ ʼਤੇ ਕਾਰ ਚੜ੍ਹਨ ਕਾਰਨ 11 ਲੋਕਾਂ ਦੀ ਮੌਤ ਹੋ ਗਈ ਹੈ ਅਤੇ ਦਰਜਨ ਤੋਂ ਵੱਧ ਲੋਕ ਜ਼ਖ਼ਮੀ ਹਨ।
ਵੈਨਕੂਵਰ ਪੁਲਿਸ ਦਾ ਕਹਿਣਾ ਹੈ, "ਇੱਕ ਵਿਅਕਤੀ ਵੱਲੋਂ ਲਾਪੂ ਲਾਪੂ ਫੈਸਟੀਕਲ ਦੌਰਾਨ ਕਾਰ ਚੜ੍ਹਾਉਣ ਕਾਰਨ ਹੁਣ ਤੱਕ ਅਸੀਂ 11 ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਕਰਦੇ ਹਾਂ।"
ਇਹ ਹਾਦਸਾ ਸ਼ਨੀਵਾਰ ਨੂੰ ਸਥਾਨਕ ਸਮੇਂ ਅਨੁਸਾਰ ਲਗਭਗ 20:14 ਵਜੇ ਇੱਕ ਸਟ੍ਰੀਟ ਫੈਸਟੀਵਲ ਦੌਰਾਨ ਵਾਪਰਿਆ।
ਪੁਲਿਸ ਦਾ ਕਹਿਣਾ ਹੈ ਕਿ ਕਾਇ ਜੀ ਐਡਮ ਲੋ ਨਾਮ ਦੇ 30 ਸਾਲਾ ਸ਼ੱਕੀ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ ਹੈ।
ਨਾਲ ਹੀ ਪੁਲਿਸ ਨੇ ਸਾਫ ਕੀਤਾ ਹੈ ਕਿ "ਇਹ ਕੋਈ ਅੱਤਵਾਦੀ ਘਟਨਾ ਨਹੀਂ ਹੈ।"
ਪੁਲਿਸ ਨੇ ਕਿਹਾ ਕਿ ਸ਼ੱਕੀ ਨੇ ਵੈਨਕੂਵਰ ਦੇ ਦੱਖਣ ਵਿੱਚ ਈਸਟ 43ਵੇਂ ਐਵੇਨਿਊ ਅਤੇ ਫਰੇਜ਼ਰ ਵਿਖੇ ਫਿਲੀਪੀਨੋ ਸੱਭਿਆਚਾਰ ਦਾ ਜਸ਼ਨ ਮਨਾਉਣ ਵਾਲੇ ਸਾਲਾਨਾ ਲਾਪੂ ਲਾਪੂ ਫੈਸਟੀਵਲ ਦੌਰਾਨ ਪੈਦਲ ਚੱਲਣ ਵਾਲਿਆਂ 'ਤੇ ਗੱਡੀ ਚੜ੍ਹਾ ਦਿੱਤੀ।
ਵੈਨਕੂਵਰ ਪੁਲਿਸ ਦੇ ਅੰਤਰਿਮ ਮੁਖੀ ਸਟੀਵ ਰਾਏ ਨੇ ਇੱਕ ਨਿਊਜ਼ ਕਾਨਫਰੰਸ ਵਿੱਚ ਦੱਸਿਆ ਕਿ ਇਸ ਘਟਨਾ ਵਿੱਚ ਇੱਕ ਵਾਹਨ ਅਤੇ ਇੱਕ ਸ਼ੱਕੀ ਸ਼ਾਮਲ ਸੀ। ਉਨ੍ਹਾਂ ਕਿਹਾ ਕਿ ਹੋਰ ਵੇਰਵੇ ਸਵੇਰੇ (ਕੈਨੇਡਾ ਸਮੇਂ ਅਨੁਸਾਰ) ਜਾਰੀ ਕੀਤੇ ਜਾਣਗੇ।
ਤਸਵੀਰ ਸਰੋਤ, Reuters
ਕਾਰ ਦਰੜਨ ਵਾਲਾ 30 ਸਾਲਾ ਸ਼ੱਕੀ ਕੌਣ
ਤਸਵੀਰ ਸਰੋਤ, Pool
ਪੁਲਿਸ ਨੇ ਸ਼ੱਕੀ ਦਾ ਨਾਮ ਕਾਇ ਜੀ ਐਡਮ ਲੋ ਦੱਸਿਆ ਹੈ।
30 ਸਾਲਾ ਕਾਈ 'ਤੇ ਦੂਜੀ ਡਿਗਰੀ ਕਤਲ ਦੇ ਅੱਠ ਇਲਜ਼ਾਮ ਲਗਾਏ ਗਏ ਹਨ।
ਵੈਨਕੂਵਰ ਪੁਲਿਸ ਨੇ ਇੱਕ ਬਿਆਨ ਵਿੱਚ ਕਿਹਾ, "ਇਲਜ਼ਾਮਾਂ ਦਾ ਮੁਲਾਂਕਣ ਜਾਰੀ ਹੈ ਅਤੇ ਹੋਰ ਇਲਜ਼ਾਮ ਲੱਗਣ ਦੀ ਉਮੀਦ ਹੈ।"
ਸ਼ਨੀਵਾਰ ਨੂੰ ਹੋਈ ਪ੍ਰੈਸ ਕਾਨਫਰੰਸ ਵਿੱਚ, ਵੈਨਕੂਵਰ ਪੁਲਿਸ ਦੇ ਕਾਰਜਕਾਰੀ ਮੁਖੀ ਸਟੀਵ ਰਾਏ ਨੇ ਕਿਹਾ ਕਿ ਪੀੜਤਾਂ ਵਿੱਚ ਮਰਦ, ਔਰਤਾਂ ਅਤੇ ਨੌਜਵਾਨ ਸ਼ਾਮਲ ਹਨ ਜਿਨ੍ਹਾਂ ਦੀ ਉਮਰ 5 ਸਾਲ ਤੋਂ 65 ਸਾਲ ਤੱਕ ਹੈ।
ਹਾਲਾਂਕਿ ਜਾਂਚਕਰਤਾਵਾਂ ਨੇ ਕਿਸੇ ਇਰਾਦੇ ਦੀ ਪੁਸ਼ਟੀ ਨਹੀਂ ਕੀਤੀ ਹੈ, ਪਰ ਰਾਏ ਮੁਤਾਬਕ ਪੁਲਿਸ ਨੂੰ ਭਰੋਸਾ ਹੈ ਕਿ "ਇਸ ਮਾਮਲੇ ਵਿੱਚ ਸਬੂਤ ਕਿਸੇ ਵੀ ਅੱਤਵਾਦੀ ਹਮਲੇ ਦਾ ਸੰਕੇਤ ਨਹੀਂ ਦਿੰਦੇ।"
ਰਾਏ ਨੇ ਅੱਗੇ ਦੱਸਿਆ ਕੀ ਸ਼ੱਕੀ ਦਾ ਪਹਿਲਾਂ ਵੀ 'ਪੁਲਿਸ ਅਤੇ ਮਾਨਸਿਕ ਸਿਹਤ ਅਧਿਕਾਰੀਆਂ' ਨਾਲ ਜੁੜਿਆ ਰਿਕਾਰਡ ਰਿਹਾ ਹੈ।
ਵੈਨਕੂਵਰ ਦੇ ਮੇਅਰ, ਕੇਨ ਸਿਮ ਨੇ ਵੀ ਇਸ ਪਹਿਲੂ 'ਤੇ ਜ਼ੋਰ ਦਿੰਦਿਆ ਕਿਹਾ ਕਿ "ਮਾਨਸਿਕ ਸਿਹਤ ਇੱਥੇ ਮੁਖ ਮੁੱਦਾ ਜਾਪਦਾ ਹੈ।"
ਲੋ ਦੀ ਪੁਲਿਸ ਨਾਲ ਪਿਛਲੀ ਗੱਲਬਾਤ, ਉਨ੍ਹਾਂ ਵਿੱਚ ਕੀ ਕੇਸ ਸ਼ਾਮਲ ਸੀ ਜਾਂ ਉਹ ਕਦੋਂ ਹੋਏ, ਇਸ ਬਾਰੇ ਕੋਈ ਹੋਰ ਵੇਰਵੇ ਜਨਤਕ ਨਹੀਂ ਕੀਤੇ ਗਏ ਹਨ।
ਰਾਏ ਨੇ ਸਿਰਫ ਇਹ ਕਿਹਾ ਕਿ ਹਮਲੇ ਤੋਂ "ਤੁਰੰਤ" ਪਹਿਲਾਂ ਲੋ ਦੀ ਪੁਲਿਸ ਅਧਿਕਾਰੀਆਂ ਨਾਲ ਕੋਈ ਗੱਲਬਾਤ ਨਹੀਂ ਹੋਈ ਸੀ।
ਚਸ਼ਮਦੀਦ ਨੇ ਕੀ ਦੱਸਿਆ
ਇੱਕ ਚਸ਼ਮਦੀਦ ਫੂਡ ਵੈਨ ਵਾਲੇ ਯੋਸੇਬ ਵਰਦੇ ਨੇ ਬੀਬੀਸੀ ਨੂੰ ਦੱਸਿਆ ਕਿ ਇਹ ਹਾਦਸਾ ਉਨ੍ਹਾਂ ਦੀ ਵੈਨ ਦੇ ਸਾਹਮਣੇ ਵਾਪਰਿਆ।
ਉਨ੍ਹਾਂ ਨੇ ਕਿਹਾ, "ਉਸ ਨੇ ਮੇਰੇ ਕੁਝ ਗਾਹਕ ਵੀ ਮਾਰ ਦਿੱਤੇ। ਕੁਝ ਲੋਕ ਅਜਿਹੇ ਸਨ ਜੋ ਆਪਣੇ ਬਨ ਦੇ ਬਣਨ ਦਾ ਇੰਤਜ਼ਾਰ ਹੀ ਕਰ ਰਹੇ ਸਨ ਤੇ ਉਨ੍ਹਾਂ ਨੂੰ ਟੱਕਰ ਮਾਰ ਦਿੱਤੀ ਗਈ।"
ਵਰਦੇ ਨੇ ਅੱਗੇ ਦੱਸਿਆ, "ਮੈਂ ਆਪਣੇ ਫੂਡ ਟਰੱਕ ਤੋਂ ਬਾਹਰ ਨਿਕਲਿਆ ਅਤੇ ਲੋਕਾਂ ਦੇ ਫੂਡ ਟਰੱਕਾਂ ਦੇ ਹੇਠਾਂ ਲਾਸ਼ਾਂ ਦੇਖੀਆਂ, ਪਤੀ ਆਪਣੀਆਂ ਪਤਨੀਆਂ ਜਾਂ ਆਪਣੇ ਬੱਚਿਆਂ ਲਈ ਰੋ ਰਹੇ ਸਨ... ਇਹ ਬਹੁਤ ਭਿਆਨਕ ਸੀ।"
ਸੋਸ਼ਲ ਮੀਡੀਆ 'ਤੇ ਪੋਸਟ ਕੀਤੀ ਗਈ ਅਣ-ਪ੍ਰਮਾਣਿਤ ਫੁਟੇਜ ਵਿੱਚ ਕਈ ਪੁਲਿਸ ਕਾਰਾਂ, ਐਂਬੂਲੈਂਸਾਂ ਅਤੇ ਫਾਇਰ ਇੰਜਣਾਂ ਨੂੰ ਘਟਨਾ ਸਥਾਨ 'ਤੇ ਦਿਖਾਇਆ ਗਿਆ ਜਿੱਥੇ ਜ਼ਖਮੀ ਲੋਕ ਜ਼ਮੀਨ 'ਤੇ ਪਏ ਸਨ।
ਤਸਵੀਰ ਸਰੋਤ, Reuters
ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਐਕਸ ਹੈਂਡਲ ʼਤੇ ਇੱਕ ਪੋਸਟ ਸਾਂਝਾ ਕਰਦਿਆਂ ਕਿਹਾ ਕਿ ਉਹ "ਵੈਨਕੂਵਰ ਵਿੱਚ ਲਾਪੂ ਲਾਪੂ ਫੈਸਟੀਵਲ ਦੌਰਾਨ ਵਾਪਰੀਆਂ ਭਿਆਨਕ ਘਟਨਾਵਾਂ ਬਾਰੇ ਸੁਣ ਕੇ ਬਹੁਤ ਦੁਖੀ ਹੋਏ।"
ਉਨ੍ਹਾਂ ਨੇ ਅੱਗੇ ਕਿਹਾ, "ਮੈਂ ਮਾਰੇ ਗਏ ਅਤੇ ਜ਼ਖਮੀ ਹੋਏ ਲੋਕਾਂ ਦੇ ਪਰਿਵਾਰ ਵਾਲਿਆਂ ਨੂੰ, ਫਿਲੀਪੀਨੋ ਕੈਨੇਡੀਅਨ ਭਾਈਚਾਰੇ ਅਤੇ ਵੈਨਕੂਵਰ ਵਿੱਚ ਹਰ ਕਿਸੇ ਨਾਲ ਆਪਣੀ ਡੂੰਘੀ ਹਮਦਰਦੀ ਪ੍ਰਗਟ ਕਰਦਾ ਹਾਂ। ਅਸੀਂ ਸਾਰੇ ਇਸ ਦੁੱਖ ਦੀ ਘੜੀ ਵਿੱਚ ਤੁਹਾਡੇ ਨਾਲ ਹਾਂ।"
ਉਨ੍ਹਾਂ ਨੇ ਐਮਰਜੈਂਸੀ ਜਵਾਬ ਦੇਣ ਵਾਲਿਆਂ ਦਾ ਉਨ੍ਹਾਂ ਦੀ "ਤੇਜ਼ ਕਾਰਵਾਈ" ਲਈ ਧੰਨਵਾਦ ਵੀ ਕੀਤਾ।
ਤਸਵੀਰ ਸਰੋਤ, NOEL CELIS/AFP VIA GETTY IMAGES
ਕੀ ਹੈ ਲਾਪੂ ਲਾਪੂ ਡੇਅ ਫੈਸਟੀਵਲ
ਲਾਪੂ-ਲਾਪੂ ਡੇਅ ਹਰ ਸਾਲ ਫਿਲੀਪੀਨਜ਼ ਵਿੱਚ 27 ਅਪ੍ਰੈਲ ਨੂੰ ਮਨਾਇਆ ਜਾਂਦਾ ਹੈ। ਇਹ ਲਾਪੂ-ਲਾਪੂ ਦੀ ਯਾਦ ਵਿੱਚ ਮਨਾਇਆ ਜਾਂਦਾ ਹੈ।
ਲਾਪੂ ਲਾਪੂ ਇੱਕ ਰਾਸ਼ਟਰੀ ਨਾਇਕ ਸਨ ਜਿਨ੍ਹਾਂ ਨੇ ਸਪੈਨਿਸ਼ ਬਸਤੀਵਾਦ ਦੇ ਵਿਰੁੱਧ ਖੜ੍ਹੇ ਹੋਏ ਸਨ।
ਇਹ ਤਿਉਹਾਰ ਅਧਿਕਾਰਤ ਤੌਰ 'ਤੇ 2023 ਵਿੱਚ ਵੈਨਕੂਵਰ ਵਿੱਚ ਸ਼ੁਰੂ ਹੋਇਆ ਸੀ।
ਇਸ ਦੀ ਵੈੱਬਸਾਈਟ 'ਤੇ ਇੱਕ ਬਿਆਨ ਵਿੱਚ ਕਿਹਾ ਗਿਆ ਹੈ, "ਇਹ ਐਲਾਨ ਨਾ ਸਿਰਫ਼ ਦਾਤੂ ਲਾਪੂ-ਲਾਪੂ ਦੀ ਬਹਾਦਰੀ ਵਾਲੀ ਵਿਰਾਸਤ ਦਾ ਸਨਮਾਨ ਕਰਦੀ ਹੈ ਬਲਕਿ ਬ੍ਰਿਟਿਸ਼ ਕੋਲੰਬੀਆ ਸੂਬੇ ਵਿੱਚ ਪ੍ਰਫੁੱਲਤ ਹੋਣ ਵਾਲੇ ਸੱਭਿਆਚਾਰਕ ਸਦਭਾਵਨਾ ਅਤੇ ਆਪਸੀ ਸਤਿਕਾਰ ਦਾ ਵੀ ਪ੍ਰਤੀਕ ਹੈ।"
ਤਸਵੀਰ ਸਰੋਤ, Reuters
ਹੋਰਨਾਂ ਸਿਆਸੀ ਆਗੂਆਂ ਦੀ ਪ੍ਰਤੀਕਿਰਿਆ
ਐੱਨਡੀਪੀ ਆਗੂ ਜਗਮੀਤ ਸਿੰਘ ਨੇ ਹਾਦਸੇ ਤੋਂ ਪਹਿਲਾਂ ਇਸ ਫੈਟਸੀਵਲ ਵਿੱਚ ਸ਼ਿਰਕਤ ਕੀਤੀ ਸੀ।
ਉਨ੍ਹਾਂ ਨੇ ਪ੍ਰਤੀਕਿਰਿਆ ਦਿੰਦਿਆਂ ਕਿਹਾ ਹੈ ਕਿ ਉਹ "ਡਰ ਗਏ" ਹਨ ਕਿ ਹਾਦਸੇ ਵਿੱਚ ਮਾਸੂਮ ਲੋਕ ਮਾਰੇ ਗਏ ਹਨ ਅਤੇ ਕਈ ਜਖ਼ਮੀ ਹੋ ਗਏ ਹਨ।
ਉਹ ਅੱਗੇ ਆਖਦੇ ਹਨ, "ਅਸੀਂ ਵਧੇਰੇ ਜਾਣਕਾਰੀ ਦੀ ਉਡੀਕ ਵਿੱਚ ਹਾਂ। ਸਾਡੀ ਹਮਦਰਦੀ ਪੀੜਤਾਂ, ਉਨ੍ਹਾਂ ਦੇ ਪਰਿਵਾਰਾਂ ਅਤੇ ਵੈਨਕੂਵਰ ਵਿੱਚ ਫਿਲੀਪੀਨੋ ਭਾਈਚਾਰੇ ਨਾਲ ਹਨ।"
ਤਸਵੀਰ ਸਰੋਤ, Reuters
ਉੱਧਰ ਵੈਨਕੂਵਰ ਦੇ ਮੇਅਰ ਕੇਨ ਸਿਮ ਨੇ ਕਿਹਾ ਕਿ ਉਹ "ਇਸ ਭਿਆਨਕ ਘਟਨਾ ਤੋਂ ਹੈਰਾਨ ਅਤੇ ਬਹੁਤ ਦੁਖੀ" ਹਨ, ਇੱਕ ਸੋਸ਼ਲ ਪੋਸਟ ਵਿੱਚ ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਦੀ "ਹਮਦਰਦੀ ਇਸ ਬੇਹੱਦ ਮੁਸ਼ਕਲ ਸਮੇਂ ਦੌਰਾਨ ਪ੍ਰਭਾਵਿਤ ਸਾਰੇ ਲੋਕਾਂ ਅਤੇ ਵੈਨਕੂਵਰ ਦੇ ਫਿਲੀਪੀਨੋ ਭਾਈਚਾਰੇ ਨਾਲ ਹਨ।"
ਕੈਨੇਡਾ ਦੀ ਕੰਜ਼ਰਵੇਟਿਵ ਪਾਰਟੀ ਦੇ ਨੇਤਾ ਪਿਅਰ ਪੋਲੀਏਵ ਨੇ ਇਸ ਘਟਨਾ ਨੂੰ "ਮੂਰਖਤਾਪੂਰਨ ਹਮਲਾ" ਕਿਹਾ, ਜਦਕਿ ਬ੍ਰਿਟਿਸ਼ ਕੋਲੰਬੀਆ ਨਿਊ ਡੈਮੋਕ੍ਰੇਟਿਕ ਪਾਰਟੀ ਦੇ ਨੇਤਾ ਡੇਵਿਡ ਏਬੀ ਨੇ ਕਿਹਾ ਕਿ ਉਹ "ਹੈਰਾਨ ਹਨ ਅਤੇ ਦਿਲ ਟੁੱਟਿਆ ਹੋਇਆ" ਹੈ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
