Jamb put university admission cut off mark for 150

Nigeria goment don announce cut off marks for admission into Universities, Polytechnics and colleges across di kontri.

Minister of Education Dr Maruf Olatunji Alausa say di cut off marks for universities go be 150, Colleges of nursing go be 140, Polytechnics go be 100 while Colleges of Education go be 100.

Di minister make di announcement afta policy meeting wit Vice Chancellors, Rectors, Provosts and Joint Admission and Matriculation Board (Jamb) for Abuja Nigeria capital.

Di meeting agree say all admission processing must end by December 2025.

Di meeting also agree say if any school offer pesin admission, di candidate get maximum of four weeks to accept di admission or reject am, or di admission go dey forfeited.

During Di meeting JAMB registrar Ishaq Oloyede announce say during dis year admission, candidate's admission document go carry dia score and dia rank for di general exam.

Nigeria admission age now 16

Di Minister for education during di meeting also announce say henceforth admission age go be 16 as against di age 18 wey dem bin announce last year.

E say d decision dey non negotiable as federal goment don decide.

Mr Tunji Alausa also announce say any admission wey any school offer outside di Central Admission Processing System CAPS dey illegal.

CAPS na online admission platform wey Jamb introduce for 2017 to handle admission processing across di kontri, but despite di introduction, Jamb say some schools still dey give some students admission outside di CAPS system.

For di meeting, di Minister announce say moving forward any school wey fail to follow di rules go collect sanction.

“Some of di sanctions fit include to withdraw institutional assets and prosecution of di concerned officers or governing council members," na so di minister tok.

2025 Jamb result lead to candidate death

Candidates bin write di 2025 Jamb examination across di kontri between Friday 25 April and end on 5 May.

Wen Jamb release breakdown of how di 2025 results be, di examination body say dem record di lowest performance in di history of di Computer Based Test [CBT].

According to Jamb, na about 1,955,069 candidates bin write di 2025 UTME examination. Out of dat candidates, ova 50 per cent score below 200.

Na only 4,756 candidates score 320 and above, while 12,414 candidates score 300 and above, according to Jamb analysis.

"As part of di results, 40,247 underage candidates dey permitted to demonstrate dia exceptional abilities.

Dis results bin no sweet di belle of candidates, dia parents and guardians, plus oda pipo wey dey concerned about education for Nigeria.

Dem begin drag Jamb for social media, sotay pipo begin ask kwesions about why students dey underperform wey force di body to do dia review sharp-sharp.

One candidate Faith Opesusi take her life after she fail to score better result pass her last year result.

According to her papa, di victim score high score di previous year, but score only 146 for di latest exam.

19 years old Faith Opesusi Timileyin been dey hope to study Microbiology for university but dat dream no fit come to pass again as she take her life shortly after she see her 2025 Jamb result.

Faith na just one out of plenti young pipo wey write di 2025 UTME.

Dis make Jamb to make promise say if dem chook eye for dis complaints and find out say errors bin dey, di candidates wey dey involved go rewrite di exam.

JAMB confirm say errors affect candidates

According to Jamb some errors bin happun for some centres wey affect di performance of candidates during di exam.

Jamb Registrar, Prof Ishaq Oloyede tok for media briefing for Abuja say “wetin suppose be moment of joy don change due to one or two errors."

Di Registrar announce say di technical error affect about 379,997 candidates.

"We apologise and assure you say dis incident represent a significant setback for… we remain committed to emerge stronger in our core values of transparency, fairness and equity", Oloyede tok as e cry wen e address tori pipo.

E add say na di function of di exam bodi to admit error sake of say dem sabi say inspite of dia efforts dem no dey perfect.

Di mass failure make Jamb to reschedule di exam for some state dem feel dey affected.

Dem say dem discover glitches for dia system wey affect 157 exam centres inside di Lagos and Owerri exam zones.

Under Lagos zone, 65 exam centres dey affected inside Lagos and Oyo states only. For Owerri zone, 92 exam centres dey affected across Imo, Abia, Anambra and Ebonyi.

Di rescheduled exams hold from Friday 16 May 2025, di affected candidates begin rewrite di exams. Most of of di exam fall into Saturday and candidates reprint dia exam slips to follow rewrite di exam.