Why President Tinubu dey Lagos for two-day visit

Nigeria President Bola Tinubu dey Lagos state for two-day visit wia e dey confam say e go commission different projects.

Dis two-day visit go happun on 8 April and 9 April, 2026, wia Tinubu go waka go different places for Lagos State wia di projects dey, in company of oda officials.

Already, traffic dey expected for different parts of Lagos sake of di visit as road users go dey find alternative routes to reach wia dem dey go.

According to Lagos state govment, dis Tinubu visit na im first official State Visit to Lagos State, even though di president dey always come steadi, especially during holidays.

Sake of dis visit, Lagos State ministry of transport go close some roads for sometimes while di commissioning dey go on.

Dem announce say about 500 Lastma personnel go dey to manage traffic movement during Tinubu visit.

As usual, heavy securiti dey expected for different locations of Lagos both far and near to di locations of di projects commissioning.

Which Lagos road go close for Tinubu visit

Di Lagos State govment announce partial closure of roads for di state sake of Tinubu State Visit on Wednesday, 8 April, 2026, and Thursday, 9 April, 2026.

Lagos govment through di commissioner of Transport, Oluwaseun Osiyemi, tok say Tinubu visit and di commissioning of projects require make dem close some roads 'to ensure di safety and smooth conduct of proceedings.'

"Motorists dey advised to plan dia movement and avoid di affected corridors during di designated times to minimise traffic disruptions and travel delays," di commissioner tok.

On Wednesday, 8 April, 2026, dem go commission di link bridge between 9am. and 1pm, and e go affect motorists for di Opebi-Allen, Ikeja and Ojota

areas.

Dem say make all motorists wey dey pass dis route go find aternative routes, so dem go fit avoid trafiic congestion and to ensure say dem arrive dia destination witout delay.

On Thursday, 9 April, 2026, e get two commissioning events wey go happun for morning and afternoon from 9am to 1pm.

Di commissioning go affect traffic for Olodi Apapa and Ajegunle areas.

Di advisory na say make road users and drivers go find and plan anoda route wey dem go pass reach wia dem dey go.

Dat same Thursday Thursday, 9 April, 2026, anoda event go happun for evening from 4pm to 7pm .

Di event go take place around EkoHotel and Victoria Island.

Road users wey wan pass dat area gatz go find anoda route, as Lagos govment tok say some delays and traffic go dey.

Men of di Lagos State Traffic Management Authority (LASTMA) dey expected to stand for affected areas so dem go fit manage traffic flow.

Projects wey carry President Tinubu come two-day visit to Lagos

President Tinubu dey expected to commission several projects during im State Visit to Lagos.

Di Ojota–Opebi Link Bridge dey designed to ease movement across one of Lagos busiest corridors wia areas like Ojota, Maryland, Opebi and Allen dey struggle wit heavy traffic.

Di bridge na about 5.04 km wit bridge sections, space for pedestrians and cyclists.

According to Lagos commissioner for Information, e say di Opebi-Ojota Link Bridge project dey originally conceived ova 20 years ago, during di administration of former Lagos Govnor Bola Tinubu.

But na Sanwo-Olu bin revive di project for January 2022.

"Di infrastructure na both legacy project and continuation of long-term urban planning for Lagos," Omotoso tok.

Tolu Schools for Ajegunle dey among di projects wey Tinubu go commission for Lagos.

According to di ministry of information, dem establish Tolu Schools for1981.

Na cluster of schools wey comprise of 16 Senior Secondary Schools, 15 Junior Secondary Schools and 5 Primary Schools wit about 20,000 pupils wey dey learn for Ajegunle.

Dis na to create sustainable food distribution network for Ajah, to supply fresh produce to residents of communities within Eti Osa corridor.