رئیس جمهوری تاجیکستان با بلندگو به مردم بدخشان افغانستان وعده کمک داد

امام علی رحمان، رئیس جمهوری تاجیکستان، در اقدامی غیر معمول از طریق بلندگو با باشندگان ولسوالی شکی ولایت بدخشان افغانستان صحبت کرده است.

روز گذشته (چهارشنبه ۲۹ اسد/مرداد) رئیس جمهوری تاجیکستان از مناطق مرزی در امتداد آمو دریا (رودخانه آمو) در مرز با افغانستان دیدار می‌کرد که با استقبال باشندگان ولسوالی شکی ولایت بدخشان افغانستان، در آن سوی مرز روبرو شد.

در ویدئویی که از روز گذشته در شبکه‌های اجتماعی همرسانی شده، شماری از باشندگان ولسوالی شکی در حالی که پرچم کشورهای افغانستان و تاجیکستان را در دست دارند در این سوی دریای آمو جمع شده و با استفاده از بلندگو از امام علی رحمان، رئیس جمهوری تاجیکستان که در آن سوی دریا توقف کرده استقبال می‌کنند.

مردم ولسوالی شکی ولایت بدخشان، از رئیس جمهوری تاجیکستان خواسته‌ اند تا برای تهیه آب آشامیدنی، خدمات بهداشتی، تامین برق و خدمات مخابراتی این ولسوالی را کمک کند. در پاسخ، آقای رحمان به باشندگان این ولسوالی وعده همکاری داده است.

رئیس جمهوری تاجیکستان گفته است که پروژه‌های عمرانی در این طرف مرز برای افغان‌ها و برای آبادی افغان‌ها نیز هست و با ساخت نیروگاه‌های تازه، برق بیشتر نیز به افغانستان انتقال می‌یابد.

مقام‌های محلی در بدخشان در این مورد اظهار بی‌خبری می‌کنند.

محمد دین خواهانی، یکی از باشندگان منطقه درواز بدخشان به قربان‌العلی همزی، خبرنگار بی‌بی‌سی گفت که فرزندان‌شان برای دفاع از نظام هر روز در صفوف نیروهای امنیتی قربانی می‌دهند، اما در دو دهه اخیر برای بهبود زندگی آن‌ها کمترین توجه صورت نگرفته است.

از سوی دیگر، محمدحنیف اتمر، وزیر خارجه افغانستان صبح امروز صحبت تلفنی با سراج الدین مهرالدین، وزیر امور خارجه جمهوری تاجیکستان داشته است.

در خبرنامه وزارت خارجه افغانستان آمده که در این صحبت از امکان افزایش صادرات برق از تاجیکستان به افغانستان بحث و تبادل نظر شده است.

ساکنان ولسوالی شکی بدخشان در مرز با تاجیکستان در حالی از کشور همسایه درخواست کمک می‌کنند که گفته می‌شود در سال‌های گذشته صدها میلیون دلار برای اجرای پروژه‌های توسعه‌ای در افغانستان به مصرف رسیده، اما به گفته باشندگان منطقه درواز بدخشان آنان از این کمک‌ها کمتر بهره‌مند شده‌اند.