د افغانستان پولې ته څېرمه شمالي او سويلي وزيرستان يو له هغو ناارامه سيمو څخه دى چې پکې هروخت دا ډول بريدونه کېږي .

په سويلي وزيرستان کې يو ځايي چارواکى وايي دغه پېښه د اعظم ورسک په سيمه کې شوې ده .

د رپوټونو له مخې له يوه نامعلوم ځايه يو ميزايل د اعظم ورسک په کلوشه سيمه کې پر يوه کور لگېدلى، چې په پايله کې يې ددغه کور لس کسان ووژل .

دمگړۍ نه ده معلومه چې دغه بريد له کوم لوري څخه شوى دى .

بل پلو په سيمه کې ځايي خلک وايي چې دغه بريد د افغانستان له پورې غاړې شوى دى .

په سيمه کې چارواکي ادعاکوي چې په دغه بريد کې وسله وال طالبان په نښه شوي وو، خو ځايي خلک دا نه مني او وايي چې د نوموړي بريد ټول لس کسان قربانيان د يوه عادي کور غړي وو .

د سيمه ييزو خلکو پروينا، تراوسه له دغه کور څخه د لسو کسانو مړي او درې ټپيان راويستل شوي دي .

د افغانستان پولې ته څېرمه شمالي او سويلي وزيرستان يو له هغو ناارامو سيمو څخه دى چې پکې هروخت دا ډول بريدونه کېږي .

له دې وړاندې هم د شمالي او سويلي وزيرستان په سيمو کې د القاعده او وسله والو طالبانو گڼ شمېر غړي په نښه شوي او وژل شوي وو .

د روانې فبرورۍ مياشت په پيل کې هم په شمالي وزيرستان کې د يوه راکټي بريد له امله ١٢ کسان وسله وال وژل شوي وو .