پرويز مشرف وايي پوليسو بايد د پېښې ځاى په اوبو نه واى مېنځلى خو دا تېروتنه وه

ولسمشر مشرف دا خبره رد کړه چې گواکې د بېنظير بوټو د وژنې په مخنيوي کې امنيتي ځواکونو خپله دنده سمه نه ده پر ځاى کړى .

دۀ دا تور هم رد کړ چې گواکې په يو نه يو ډول پاکستاني چارواکي د بېنظير بوټو په وژنه کې لاس لري .

پرويز مشرف دا خبره ومنله چې پاکستاني پوليسو ځينې تيروتنې کړي دي .

د بېنظير بوټو له وژنې سم لاسي وروسته پاکستاني پوليسو هغه سيمه په اوبو ومېنځله چې د دې د وژنې لپاره پکې بريد شوى و .

پاکستاني ولسمشر دا د پوليسو تېروتنه وبلله خو ټينگار يې وکړ چې دغه کار په لوى لاس نه و شوى .

د چارشنبې په ورځ ولسمشر پرويز مشرف ويل چې له برتانيا يې غوښتي دي چې د بېنظير بوټو د وژنې په باب تحقيقاتو کې مرسته ورسره وکړي .

پرويز مشرف د بېنظير بوټو له وژنې وروسته د سياسي بيا پخلاينې غوښتنه هم وکړه .

دۀ خبردارى ورکړ چې د بېنظير بوټو له وژنې وروسته روان تاوتريخوالي به نور ونه زغمي .

د پاکستان حکومت وايي د بېنظير بوټو له وژنې راهيسته تاوتريخواليو او ناکراريو کې په سلگونو ميليونه ډالره تاوان وراوښتى دى.