پر عمران خان برید لاریون ګډوډ کړ

د پاکستان تحریک انصاف ګوند د مشر عمران خان پر لېږدوونکي موټر پلازمېنه اسلام اباد کې ډزې شوې، خو هغه ته زیان نه دی اوښتی.

پاکستان کې د خپلواکۍ د لمانځنې په ورځ د عمران خان په مشرۍ د تحریک انصاف ګوند پلویانو د تېرې پنجشنبې په ورځ له لاهور ښاره د پلازمېنې اسلام آباد په لور اوږد لاریون پیل کړی و.

په ډزو کې عمران خان نه دی ټپي شوی، خو په لړ کې یې ګوجرانواله ښار کې د لاریونیانو او حکومتي ملاتړو ترمنځ اخ او ډب رامنځ ته شوی.

دا تر هغه وروسته چې نواز شریف لومړی وزیر شو، پاکستان کې تر ټولو لوی لاریون ننګونی لاریون دی.

د حکومت ضد یو بل ملا طاهر القادري هم پلازمېنې اسلام اباد ته له یوه لوی لاریون سره روان دی.

عمران خان پر خپله فېسبوک پاڼه ادعا کړې، چې ګني دغه برید حکومت پلوې پي ایم ایل نون ډلې کړې ده.

تر اوسه پي ایم ایل نون هېڅ غبرګون نه دی ښودلی، خو حکومت دا برید په دیموکراتیکه فضا کې غندلی او ګډوډوونکی یې بللی دی.

تېر کال نواز شریف د پاکستان لومړی وزیر شو، چې په سوله ییزه فضا کې له پوځ نه د حکومت چارې ملکي ادارې ته وسپارل شوې.

وړاندې، عمران خان په ګوجرانواله کې خپلو پلویانو ته ویلي وو چې "زه اسلام اباد ته روان یم او ډاډه یم چې موږ ټول ازاد یو".

دواړه لاریونونه د لومړي وزیر د استعفا غوښتونکي دي، ځکه چې په اقتصادي پرمختګ کې یې هغه ناکام بللی.

د عمران خان او القادري ډلې وايي، نواز شریف پخپله واکمنۍ کې پوځ پیاوړی نه کړ، او د برېښنا په څېر یې د خلکو د ژوند مهم ضرورتونه پوره نه کړل.

پر شریف د عمران خان بل تور دا دی، چې ګني د تېر کال ټاکنو د درغلیو څېړلو کې پاتې راغلی.